2 KORIN 12 - Lai (Hakha) Common Language Bible 2006

Langhnak le Biathlam A Hmuhmi

¹ A ṭhathnemnak zeihmanh a um lo hmanh ah kaa porhlawt a hau ko. Atu cu Bawipa nih a ka pekmi langhnak le biathlam kong kha ka chim cang hna lai.

² Kan hnulei kum hleili ah khan Khrihfa mipa pakhat cu a van thumnak ah khin an cawi (langhnak a hmuh maw a si, a si taktak dik a si ka hngal lo, Pathian lawng nih a hngalh).

^3-4 Ka vun nolh ṭhan rih lai, hi pa cu Paradis ah an hun cawi (hihi langhnak a hmuh maw a si, a si taktak dik a si ka hngal ṭhiamṭhiam lo, Pathian lawng nih a hngalh). Cuka ah cun bia in chim khawh lomi kha a theih hna, minung hmur nih a chim thiam lomi thil kha a theih hna.

⁵ Cucaah cu pa cu kaa porhlaw tuah lai — keimah kong tu cu kaa porhlaw lai lo, zeitluk in dah a derthawmmi ka si a langhtertu thil hna kha dah ti lo cu, zeihmanh kaa porhlaw lai lo.

⁶ Porhlawt ka duh vekvek a si ahcun mihrut porhlawt in kaa porhlaw lai lo, zeicahtiah biatak pei ka chim lai cu. Sihmanhsehlaw kaa porhlaw lai lo, zeicahtiah ka tuahmi in mi nih an ka hmuhnak le ka chimmi in mi nih an ka theihnak nak sang in ka cungah ahohmanh nih ruahnak an ngeih ding kha ka duh lo.

⁷ Sihmanhsehlaw ka hmuhmi thil khuaruahhar a tam ruangah porhlaw ruamkai in ka um sualnak hnga lo ka pum ah hin hling pakhat a ka chiah i cu hling Satan lamkaltu cu porhlaw in ka um sualnak hnga lo a ka dawntu dingah a hman.

⁸ Hi kong ah hin voi thum thliahmah Bawipa sinah thla ka cam i, ka lakpiak ko tiah ka nawl.

⁹ A ka lehnak cu, “Ka vel hi na caah a za ko, zeicahtiah ka ṭhawnnak cu derthawmnak ah hin a lang,” ti a si. Cucaah cun Khrih ṭhawnnak nih a ka huhphenh ti kha ka hngalh nakhnga, ka derthawmnak ah hin lunglawm tein kaa porhlaw cang.

¹⁰ Ka derthawmnak ah siseh, nihsawhnak le harnak le hremnak le temhinnak ka hmuhmi ah siseh, Khrih ruangah kaa lawm ko; zeicahtiah ka derthawm tikah hin ka ṭhawn a rak si.

Korinth Khuami An Zawn A Ruah Hna

¹¹ Mihrut rianṭuan in rian ka ṭuan ai — nanmah nih cun pei nan ka hruhter ai cu. Nanmah hi a ka thangṭhattu ding nan si nain a ka hruhtertu nan si. Zeihmanh ka si lo nain “lamkaltu” ṭha khun, nan timi hna kha ka tluk lonak hna zeihmanh a um lo.

¹² Nanmah sin i lungsau thinfual in rian ka ṭuannak ah khan lamkaltu ngaingai ka sinak cu a lang ko, cucu hmelchunhnak hna le khuaruahharmi thil le thil lianngan tuahmi hna nih khan an fianter ko.

¹³ Khrihfabu dang nakin zeitindah chia hlei in kan ti hna? Bawmhnak ka pe u tiin hna kan hnawh hna lo lawng hi chia hlei in kan tinak hna a si ko lo maw? Nan cungah a tlari deuh in ka um rua lo caah ka ngaithiam u.

¹⁴ Atu hi nanmah tlawn kan timh hna a voi thumnak a si — zeihmanh kan hal hna lai lo. Ka duhmi cu nanmah nan si, nan tangka a si lo. A ngaingai ti ahcun, fale nih pale cu an cawm hna awk a si ṭung lo, pale nih pei fale cu an cawm hna awk a si deuh cu.

¹⁵ Nanmah bawmhnak dingah hin ka ngeihmi vialte le ka pum zong hi hman dih ka duh ko. Cu tlukin kan dawt hringhran hna caah cun, daw lo deuh in nan ka um awk a si maw?

¹⁶ Nan caah thilrit ka si lo cu nannih zong nih ahmaan nan ti ko lai. Asinain a cheu nih cun nan i thawh i, “A kan hlen, lih in a kan foih,” nan ti.

¹⁷ Zeitindah a si? Nan sin i ka rak thlahmi lamkaltu hna kha nanmah hlennak caah ka hmanmi hna an si maw?

¹⁸ Nan sin rat awk kha Titas cu ka nawl i a sinah khan Khrihfa kan unau pakhat ka rak thlah. Titas nih a kan hlen nan ti lai maw? Amah le keimah cu kan i tinhmi kha i khat in kan ṭuanning kha aa khat lo maw?

¹⁹ Kan hmaiah anmah le anmah humhak an i zuam tiah ruah zong nan kan ruah sual ko lai. Cucu a si lo. Khrih nih chim hna seh ti a kan duhning in Pathian hmaiah kan chim i ka dawtmi ka hawile hna, kan tuahmi thil vialte hi nanmah bawmhnak caah si seh ti kan duh.

²⁰ Nan sin ka phak tikah, si hna seh ti kan duhmi hna kha rak si loin kan hmuh sual hna lai ti kha ka phang i, si seh ti nan ka duhmi kha ka si lo sual lai ti zong kha ka phang ve. Pakhat le pakhat i si le i nahchuah le thintawi le mah zawn lawng ruat le i thangchiat i congoih le i porhlaw le ningcanglo khuasa in kan hmuh sual hna lai ti kha ka phang.

²¹ Nan sin ka rat nolh tik cu, ka Pathian nih nan hmaiah ningzak in a ka umter sual lai ti ka phang. Nun thur in a rak nung i nu le pa sualnak pumsa duhnak an tuahmi aa ngaihchih lomi hna ruangah khan ka ṭap lai.