2 KORIN 10 - Lai (Hakha) Common Language Bible 2006

Paul Nih A Rianṭuannak Kong A Chim

¹ Hmunkhat um vial ah zeihmanh chim ngam ṭung lo, a langhlat vial in a ral a ṭha ngai ṭung, nan ka timipa keimah Paul nih, Khrih lungnemnak le a zaangfahnak lungthin in kan nawl hna.

² Nan sin ka rat tikah ralṭha ngaiin ka um nan herhternak hnga lo thla ka cam lengmang, zeicahtiah an rian ṭuanmi hi, vawlei cung duhnak in pei a si ko cu, a kan timi hna sinah khan ralṭha ngaiin ka um kho ko.

³ Vawleicung ah cun kan um taktak, sihmanhsehlaw vawlei cung thil tinhmi ngei in ral kan do lo.

⁴ Raldohnak i kan hmanmi hriamnam cu vawlei cung hriamnam an si lo, ralhruang fekfek a hrawk khotu Pathian hriamnam tu kha an si. A hmaan loin bia i alnak kha kan hrawh,

⁵ Pathian hngal kho hna hlah seh tinak ca i chonmi vampang porhlawtnak vialte kha kan baoh dih; minung lungthin kha sal ah kan va tlaih hna i Khrih nawl kha kan ngaihter hna.

⁶ Cun zumhawktlak taktak nan si kha nan langhter hnuah zumhawktlak lo a simi tuahnak kha dan kan tat lai.

⁷ Thil cu a sining taktak in zohhmanh u sih: Pakhat nih aa thawh i Khrih ta ka si, a ti. Cu pa nih cun amah kha ṭha tein i ruat ta rih tuah seh, zeicahtiah amah cu Khrih ta a si tluk te khan kannih zong kan si ve ko.

⁸ Bawipa nih a ka pekmi nawlngeihnak cu a hlei deuh in ka hman a si zong hmanh ah ka ning a zak lo, cu nawlngeihnak ka hmuhmi cu nanmah ṭhehnak nawlngeihnak si loin nanmah saknak nawlngeihnak tu a si.

⁹ Ca in an hro hna bantuk lawh cu ka duh lo.

¹⁰ Micheu nih nan i thawh i, “Paul cu ca kuat ciammam ah cun a ti ti awk a ṭha lo, sihmanhsehlaw hmunkhat um taktak ahcun zei pipa a si lo, bia chim zongah zei ṭhai a si lo,” nan ti.

¹¹ Cu bantukin a timi hna nih cun, a langhlat in ka ṭialmi ca le nan sin ka um tik i ka tuah ding hi zeihmanh dannak an ngei lai lo ti hi nan rak hngalh awk a si.

¹² Cu tluk sang i aa chiami hna he cun kan i tahchunh ngam in kan i rel chih ngam taktak lai lo! An va hrut thiam dah. Anmah tahnak dingah khan anmah lila nih pei tahnak tlangrel cu an i ser ko cu.

¹³ Kannih tu cu kan i porhlawtnak kha a hlei a hluat a phanh sual lai kha kan duh lo caah Pathian nih a kan chiahpiakmi rian ramri chung lawngah khan kan um lai i cu rian chungah cun nanmah lak i kan ṭuanmi zong hi aa tel.

¹⁴ Cu ramri chungah cun nan rak um caah Khrih kong Thawngṭha chim awk i kan rat ah khan, cu ramri lengah cun kan kal lo.

¹⁵ Cucaah Pathian nih a kan chiahpiakmi rian ramri leng i midang nih an ṭuanmi kha kannih cu kan i uang lo. Kan i ruahchanmi tu cu, nan zumhnak kha a ṭhang lai i Pathian nih a kan chiahpiakmi ramri chungah khan nan lakah rian ngan deuh chinchin kan ṭuan khawh lai, ti hi a si.

¹⁶ Cun nanmah ram pinah Thawngṭha kha kan chim khawh lai i midang lo chung i rak ṭuan ciami rian kha kan i porhlawt awk a herh lai lo.

¹⁷ Sihmanhsehlaw Cathiang nih a chim bang khan, “Porhlawt a duhmi nih cun Bawipa nih a tuahmi kha i porhlaw ko hna seh,”

¹⁸ Zeicahtiah mi cu amah le amah kha ka ṭha tiin aa ruah tikah hin Pathian nih a cohlan a si lo i Bawipa nih a ṭha ti in a ruah lawngah hin a cohlan a si.