2 JOHAN 1 - Lai (Hakha) Common Language Bible 2006

¹ Khrihfa Upa nih, Ka dawtmi Bawinu le a fale hna kha ca kan kuat hna. Keimah lawnglawng hi an dawtu hna ka si lo, biatak kha a hngalmi vialte nih cun an in dawt hna,

² zeicahtiah biatak cu kan chungah a hmun i kan sinah a um zungzal lai.

³ Pa Pathian le a Fapa Jesuh Khrih nih velngeihnak le zaangfahnak le daihnak cu an kan pek lai i biatak le dawtnak in kan ta an si zungzal lai.

Biatak le Dawtnak

⁴ Kan Pa nih a kan fial bantukin na fale cheukhat cu biatak in an nung ti kha ka theih tikah ka lung aa lawm tuk hringhran.

⁵ Cucaah cun ka dawtmi Bawinu, pakhat le pakhat i daw hna u sih. Hihi nawlbia thar kan kuatmi a si lo, a hramthawk tein kan rak ngeih cangmi nawlbia kha a si ko.

⁶ Atu i ka chimmi dawtnak a sullam cu Pathian nawl zul in kan nun awk a si ti hi a si ko. Cu nawlbia cu, a hramthawk tein nan dihlak in nan rak theihmi kha, i daw niakmak tein kan um dih awk a si, ti hi a si.

⁷ Hlengtu tampi, Jesuh Khrih cu minung in a ra lo pei, a titu hna kha vawlei cungah an i chawk. Cu bantuk mi cu mihlengtu kha an si i Khrih Ral kha an si.

⁸ Cucaah nan ṭuan lengmang hnawhchanmi kha nan sungh sual nakhnga lo le nan laksawng kha tling tein nan hmuh nakhnga, ralring tein um ko u.

⁹ Khrih cawnpiaknak chungah um peng loin kar hlei a lammi nih cun Pathian kha an ngei lo. Cawnpiaknak chungah khan a um pengmi nih cun Pa he Fapa he an ngeih hna.

¹⁰ Ahohmanh nan sin i an rat tikah hi cawnpiaknak hi an rak i ratpi lo ahcun, tluninn rak onh hna hlah u; “Na cungah daihnak um ko seh,” ti zongah rak ti hna hlah u.

¹¹ Zeicahtiah cu bantukin a cungah daihnak um seh, ti a duhpiaktu kha a thil ṭhalo tuahmi ah khan aa tel vemi ah a cang.

Biatlang Kawmnak

¹² Chimh awk tampi kan ngei ko hna, sihmanhsehlaw ca le cahang in si loin a tlawn tu in ka rak in tlawn hna lai i kan i lawmhnak kha a tlin naklai kan pum in bia kan i ruah lai.

¹³ Na dawtmi na Unaunu fale hna nih daihnak an in kuat.