1 SIANGPAHRANG 22 - Lai (Hakha) Common Language Bible 2006

Mikaiah Nih Ahab le Jehoshafat An Sungh Lai Kong A Chimchung

¹ Kum thum chung cu Siria le Israel cu i do loin an um.

² Sihmanhsehlaw a kum thumnak ah khan, Judah siangpahrang Jehoshafat cu Israel siangpahrang sinah khan a rung.

³ Cun Israel siangpahrang nih a sinum hna cu a thawh hna i, “Ramoth-gilead khi kanmah ta a si kannih nih dai tein kan um ko i Siria siangpahrang kut chungin kan chut lo ti kha nan hngal maw?” tiah a ti hna.

⁴ Cun Jehoshafat cu a thawh i, “Ramoth-gilead i vaa tuk awkah na ka kalpi hnga maw?” tiah a ti. Cun Jehoshafat nih Israel siangpahrang cu a thawh i, “Kei le nang cu mi khat kan si ko, ka mi cu na mi an si ve ko i ka rang cu na rang an si ve ko,” tiah a ti.

⁵ Cun Jehoshafat nih Israel siangpahrang cu, “Bawipa bia cu dothlat hmasa rih tuah hen,” tiah a ti.

⁶ Cu tikah Israel siangpahrang nih profet kha hmunkhat ah a pumh hna, mi za li tluk an si, annih cu a thawh hna i, “Ramoth-gilead cu tuk awkah ka kal hnga maw, asiloah, kaa sum ko lai dah?” tiah a ti. Cun annih nih, “Hung kal ko, zeitintiah Bawipa nih siangpahrang kut chungah a pek lai,” an ti.

⁷ Sihmanhsehlaw Jehoshafat nih, “Hika ah hin kan hal khawh ding Bawipa profet a dang pakhat tal an um ti lo maw?” tiah a ti.

⁸ Cun Israel siangpahrang nih Jehoshafat cu, “Bawipa kan hal khawhnak ding mipa a dang pakhat a um rih, amah cu Imlah fapa Mikaiah a si; sihmanhsehlaw ka kong ah thil ṭha chim bal loin thil ṭhalo lawng kha a chim caah ka huat,” tiah a ti. Cun Jehoshafat nih cun, “Cuticun siangpahrang nih chim hlah seh,” tiah a ti.

⁹ Cun Israel siangpahrang nih bawi pakhat kha a auh i, “Imlah fapa Mikaiah kha khulrang in ratpi tuah,” tiah a ti.

¹⁰ Cun Israel siangpahrang le Judah siangpahrang Jehoshafat cu Samaria hauka luhnak i phuhri ah khan, an bawi ṭhutdan cungah an ṭhu i an puan in an i thuam; cun profet vialte hna cu an hmaiah an rak chim dulmal ko.

¹¹ Cun Khenaanah fapa Zedekiah nih thir ki aa ser hna i, “Hi bangin Bawipa nih, ‘Siria mi cu an rawk dih tiang, mah hi hin na suk hna lai,’ a ti,” tiah a ti.

¹² Cun cu bantuk ṭhiamṭhiam in profet vialte nih cun an chim i, “Ramoth-gilead ah cun hung kal law, hung tei ko; Bawipa nih siangpahrang na kut chungah an pek lai,” tiah an ti.

¹³ Cun Mikaiah kawh awk i an thlahmi lamkaltu nih khan amah sinah cun, “Zohhmanh, profet hna cu lungnge tein a ṭha lei in siangpahrang sinah an bia a si; nangmah na bia zong annih lak i pakhat i a bia bantuk si ve seh law an duhning lei in chim ve ko,” tiah a ti.

¹⁴ Sihmanhsehlaw Mikaiah nih, “Bawipa a nun bangin, Bawipa nih ka sin i a chimmi cu, mah cucu ka chim ko lai,” tiah a ti.

¹⁵ Cun siangpahrang sinah a phak tikah, siangpahrang nih cun a rak thawh i, “Mikaiah, Ramoth-gilead cu hung tuk awkah kan kal lai maw, kan i sum lai dah?” tiah a ti. Cun anih nih a thawh i, “Hung kal u law hung tei hen u; Bawipa nih siangpahrang kut chungah a pek ko lai,” tiah a leh.

¹⁶ Sihmanhsehlaw siangpahrang nih a thawh i, “Biatak dah ti lo cu Bawipa min in ka sin i zeihmanh na chim lo awkah voi zeizat dah bia kan kamter lai?” tiah a ti.

¹⁷ Cun anih nih a thawh i, “Israel mi vialte cu khaltu a ngei lomi tuu bantukin tlang cung i an i ṭhek dih kha ka hmuh; cun Bawipa nih, ‘Hi hna hi bawi an ngei lo, anmah le an inn cio ah dai tein kir hna seh,’ a ti,” tiah a ti.

¹⁸ Cun Israel siangpahrang nih Jehoshafat cu, “Keimah kongah cun ṭhatnak si loin chiatnak a chim lai, tiah kan ti ṭheo lo mei?” tiah a ti.

¹⁹ Cun Mikaiah nih cun, “Cucaah Bawipa bia cu thei tuah: Bawipa cu a bawi ṭhutdan cungah a ṭhut i vancung ralkapbu vialte a orhlei le a kehlei ah a pawng i an dir kha ka hmuh;

²⁰ cun Bawipa nih a thawh i, ‘Ahab cu Ramoth-gilead ah a hung kal i khika ah a thih naklai ahodah a lem lai?’ tiah a ti. Cun pakhat nih thil pakhat a chim i a dang pakhat nih thil dang pakhat a chim ve.

²¹ Cun thlarau pakhat cu a hung chuak i Bawipa hmaiah cun a dir i, ‘Keimah nih ka lem lai,’ a ti.

²² Cun Bawipa nih, ‘Zei in dah na lem lai?’ tiah a ti. Cun anih nih, ‘Ka va kal lai i a profet vialte hna kaa chungah nal thlarau ka va si lai,’ tiah a ti. Cun anih nih, ‘Na va lem hrimhrim lai i na lem khawh taktak lai; va kal law cu bangin va tuah,’ tiah a ti.

²³ Cucaah cun zohhmanh, Bawipa nih hi na profet vialte hna kaa chungah hin nal thlarau a chiah cang; Bawipa nih nangmah kongah ṭhat lonak a chim cang,” tiah a ti.

²⁴ Khi tikah Khenaanah fapa Zedekiah kha a pawngah a ra i Mikaiah kha a biang ah a bengh i, “Zeitik ah dah Bawipa thlarau cu nangmah sin i bia chim awkah ka sinin a chuah cu a si?” tiah a ti.

²⁵ Cun Mikaiah nih a thawh i, “Zohhmanh, khi ni ah, innchung chungchin dal i thuh awkah na kal tikah na hngalh te lai,” tiah a ti.

²⁶ Cun Israel siangpahrang nih cun, “Mikaiah kha tlai u law khua uktu Amon le siangpahrang fapa Joash sinah khan va kalpi u;

²⁷ cun siangpahrang nih hi bangin, ‘Hi pa hi thong ah rak thla u law rawl tlawmte le ti tlawmte lawng, daihnak in ka ra kir ṭhan hlantiang, rak pe u, a ti,’ tiah va chim hna u,” tiah a ti.

²⁸ Cun Mikaiah nih a thawh i, “Daihnak in na kir ṭhan a si ahcun, Bawipa nih ka sinah bia kha a chim lo a si lai,” tiah a ti. Cun amah nih cun, “Nannih mi vialte hna, kan chimmi cu thei tuah u,” tiah a ti.

²⁹ Cucaah Israel siangpahrang le Judah siangpahrang Jehoshafat cu Ramoth-gilead ah khan an hung kal.

³⁰ Cun Israel siangpahrang nih Jehoshafat cu a thawh i, “Ka mui kaa hleng lai i raldohnak chungah ka kal ve lai, sihmanhsehlaw nang cu na bawi puan kha i aih ko” tiah a ti. Cun Israel siangpahrang cu a mui aa hleng i raldohnak chungah khan a kal.

³¹ Cun Siria siangpahrang nih cun a rangleng ralbawi sawm thum le pahnih hna cu, “Israel siangpahrang dah ti lo cu, ahohmanh a hme siseh, a ngan siseh, tu hna hlah u,” tiah nawl a pek hna.

³² Cun rangleng ralbawi hna nih khan Jehoshafat kha an hmuh tikah, “Amah hi Israel siangpahrang a si hrimhrim ko,” tiah an ti. Cucaah amah tuk awkah khan an i mer i Jehoshafat cu a au.

³³ Cun rangleng bawi hna nih khan amah cu Israel siangpahrang a si lo ti an hmuh tikah, amah dawinak khan an kir ṭhan.

³⁴ Sihmanhsehlaw pakhatpa nih tinh setsaimi ngei loin a li cu a kuaih sawhsawh i Israel siangpahrang cu a thir ngaphaw angki le a ṭangphaw karlak ah a khen; cucaah a rangleng mawngtu cu, “I mer law hi i tuknak chung hin ka chuahpi tuah, zeicahtiah an ka hliam ai,” tiah a ti.

³⁵ Cun cu ni cu an i tuknak kha a fak ngaingai i siangpahrang cu zan lei i a thih tiang, Siria mi hna lei hoih in a rangleng chungah khan an doh chom; cun a hma thi cu rangleng tawne ah khan a luang.

³⁶ Cun ni a tlak hnik lioah khin, ralkapbu chungah cun, “Nanmah le nan khua cio, nanmah le nan ram cio ah tlung dih u luao,” tiin au thawng pakhat a hung um.

³⁷ Cuticun siangpahrang cu a thi i Samaria ah an ratpi i siangpahrang cu Samaria khua chungah an vui.

³⁸ Cun rangleng kha Samaria tili pawngah an ṭawl i, Bawipa nih a chimmi bia ning khan, uico nih a thi cu an liah i hlawhhlangnu hna a chungah an i kholh.

³⁹ Ahab tuahsernak a tang rihmi hna le, a tuahmi thil vialte hna le, vuiho inn a sakmi le, khua a sermi vialte hna cu, Israel Siangpahrang hna Chanrelnak Cauk chungah an i ṭial lo mei?

⁴⁰ Cu bangin Ahab cu a pupa hna sinah a it i a fapa Ahaziah cu amah hmun ah khan a hung bawi.

Jehoshafat Pennak

⁴¹ Israel siangpahrang Ahab a bawi kum linak ah Asa fapa Jehoshafat nih Judah cu pen hram a thawk.

⁴² Jehoshafat cu pennak hram a thawk ah khan kum sawm thum le kum nga a ti i Jerusalem khua in kum kul le kum nga a uk. A nu min cu Shilhi fanu Azubah a si.

⁴³ A pa Asa lam vialte kha a zulh dih; Bawipa mithmuh i a dikmi tuah awkah a pialtak hin lo; asinain khuahrumbo hna kha a hrawk hna lo i mi nih khan khuahrumbo ah cun rai an thawi i zihmui an khangh ṭheo ko rih.

⁴⁴ Jehoshafat nih Israel siangpahrang he remnak zong a tuah.

⁴⁵ Jehoshafat tuahsernak a tang rihmi hna le a ṭhawnnak a langhtermi le zeitindah ral a doh ti tehna kha, Judah Siangpahrang hna Chanrelnak Cauk chungah an i ṭial lo mei?

⁴⁶ Cun a pa Asa chan lio i a rak tang rihmi hlawhhlang nu le hlawhhlang pa vialte kha a ram chungin a hloh hna.

⁴⁷ Edom ram ah cun siangpahrang an um lo; a ai awhtu cu siangpahrang a si ko.

⁴⁸ Jehoshafat nih Ofir i sui va phortu ah Tarshish sangphawlawng a ser hna; sihmanhsehlaw an kal lo; zeicahtiah, Eziongeber ah lawng cu an rawk dih.

⁴⁹ Cu tikah Ahab fapa Ahaziah nih khan Jehoshafat cu, “Lawng cun kan sinum hna hi na sinum hna he kal hna seh,” tiah a ti, sihmanhsehlaw Jehoshafat nih a duh lo.

⁵⁰ Cun Jehoshafat cu a pupa hna sinah a it i a pupa hna sinah cun a pu David khua chungah an vui; cun a fapa Jehoram cu amah hmun ah khan a hung bawi.

Ahaziah Pennak

⁵¹ Judah siangpahrang Jehoshafat siangpahrang a si kum hleisarihnak ah Ahab fapa Ahaziah nih Israel cu Samaria khua in pen hram a thawk i Israel cu kum hnih a uk.

⁵² Bawipa mithmuh ah thil ṭhalo kha a tuah i a pa lam le a nu lam kha a zul ve i Israel mi a sualtertu Jeroboam, Nebat fapa lam kha a zulh.

⁵³ Baal kha a rian a ṭuan i a biak i a pa nih a rak tuahmi vialte kha tuah in, Bawipa, Israel Pathian cu a thin a phawh.