1 SIANGPAHRANG 1 - Lai (Hakha) Common Language Bible 2006

Abishag Nih David Kha A Bultawl

¹ David Siangpahrang cu a upa i a tar ngaingai cang; puan an vorh nain a khua a lum kho hlei lo.

² Cucaah a sinum hna nih khan amah cu, “Siangpahrang ka bawipa caah hin ngaknu in kawlpiak u si law, siangpahrang hi in tuammuai seh law in zohkhenh seh law; siangpahrang ka bawipa nih hin lumnak na hmuh khawh nakhnga, na ṭang cungah it seh law,” tiah an ti.

³ Cucaah Israel ram chung dihlak ah khan ngaknu dawhte cu an kawl i Shunam mi Abishag kha an va hmuh i siangpahrang sinah cun an ratpi.

⁴ Ngaknu cu aa dawh ngaingaimi a si; cun amah cu siangpahrang tuammuaitu ah khan a cang i amah kha a bultawl; sihmanhsehlaw siangpahrang nih amah cu a theihngal lo.

Adonijah Nih Bawi Aa Cuh

⁵ Cun Haggith fapa Adonijah kha amah le amah aa hlorh i, “Siangpahrang ka si lai,” tiah a ti i amah caah khan rangleng hna le rangcung ralkap hna le a hmai i a tli dingah minung sawm nga kha a timh hna.

⁶ A pa nih zeitikhmanh ah, “Zeicahdah cu bantuk, kha bantukin na tuah?” tiin amah kha a ing a puanter bal lo. Amah cu Absalom a hun changtu kha a si i a dawh zong aa dawh ngaingai.

⁷ Zeruiah fapa Joab le tlangbawi Abiathar kha a chimh a ruah hna i annih nih Adonijah kha an zulh i an bawmh.

⁸ Sihmanhsehlaw tlangbawi Zadok le Jehoi-ada fapa Benaiah le profet Nathan le Shimei le Rei le David miṭhawng hna nih khan cun Adonijah kha an ṭanpi lo.

⁹ Adonijah nih khan tuu hna le cawtum hna le cenhmi saṭil thauthau hna kha Rulpi Lung. Enrogel pawng i a ummi ah khan a thawi hna i siangpahrang fapa a unau vialte le Judah ram i siangpahrang bawi hna cu an dihlak khan a sawm hna,

¹⁰ sihmanhsehlaw profet Nathan siseh, Benaiah siseh, miṭhawng hna kha si hna seh, a unaupa Solomon kha siseh, a sawm hna lo.

¹¹ Cun Nathan nih Solomon nu Bathsheba kha a thawh i, “Haggith fapa Adonijah kha kan bawipa David hngalh loin siangpahrang a si cang, ti hi na hngal lo dahra?

¹² Cucaah ra law ruahnak kan cheu tuah lai, nangmah na nunnak le na fapa Solomon nunnak kha na khamh khawh nakhnga.

¹³ David Siangpahrang sinah cun khulrang in va kal law amah cu, ‘Siangpahrang ka bawipa, nangmah nih na salnu ka sinah, “Keimah hnuah Solomon na fapa hi a rung bawi lai i ka bawi ṭhutdan cungah hin a ṭhu lai,” tiin chiat na ser lo maw? Zeicahdah Adonijah hi siangpahrang a si kun?’ tiah va ti.

¹⁴ Cun siangpahrang na chawnh lioah cun kei zong nih ka run in zulh colh ve lai i na bia cu ka fehter lai,” tiah a ti.

¹⁵ Cucaah Bathsheba cu siangpahrang sinah a khaan chungah khan a vung lut (siangpahrang cu a tar ngaingai cang i Shunam mi Abishag nih khan siangpahrang cu a tuammuai).

¹⁶ Bathsheba nih cun a lu a khun i siangpahrang sinah upatnak kha a tuah, cun siangpahrang nih, “Zeidah na duh?” tiah a ti.

¹⁷ Cun anih nih amah sinah cun, “Ka bawipa, nangmah nih na salnu sinah hin, Bawipa na Pathian min chalh in chiat na rak ser i, ‘Na fapa Solomon hi keimah hnuah a rung bawi lai i ka bawi ṭhutdan cungah a ṭhu lai,’ tiah na ti.

¹⁸ Sihmanhsehlaw, zohhmanh, siangpahrang ka bawipa, nangmah nih na hngal lo nain, Adonijah cu siangpahrang a si ko cang.

¹⁹ Amah nih cawtum hna le cenhmi saṭil thauthau hna le tuu hna kha tam piin a thawi cang hna i siangpahrang fapa vialte hna le tlangbawi Abiathar le ralkapbu haotu Joab kha a sawm hna, sihmanhsehlaw na sal Solomon cu a sawm lo.

²⁰ Cucaah siangpahrang ka bawipa, atu cu Israel mi vialte hna nih, ahodah siangpahrang ka bawipa ṭhutdan ah hin amah hnu in a ṭhu lai, ti chimh awkah nangmah cungah an mit an chiah dih.

²¹ Cu ti a si lo ahcun, siangpahrang ka bawipa hi a pupa hna sinah a ih tikah, keimah le ka fapa Solomon cu sualnak tuahtu ah rel kan vung si te ko lai,” tiah a ti.

²² Siangpahrang cu a chawnh lioah cun profet Nathan kha a rung lut.

²³ Cun siangpahrang cu, “Hika ah hin profet Nathan a um,” tiah an chimh. Cun siangpahrang hmaiah a rung luh tikah, vawlei lei hoih in siangpahrang hmaiah cun a kun.

²⁴ Cun Nathan nih cun a thawh i, “Siangpahrang ka bawipa, nangmah nih, ‘Keimah hnuah Adonijah hi a rung bawi lai i ka bawi ṭhutdan ah a ṭhu lai,’ tiah na rak ti maw?

²⁵ Zeitintiah nihin ni ah hin a vung kal i cawtum hna le cenhmi saṭil thauthau hna le tuu hna kha tam piin a thawi hna i siangpahrang fapa vialte le ralkapbu haotu Joab le tlangbawi Abiathar kha a sawm hna i zohhmanh, a hmaika ah cun an ei an ding i, ‘Siangpahrang Adonijah cu saupi nung ko seh,’ tiah an ti.

²⁶ Sihmanhsehlaw na salpa keimah le tlangbawi Zadok le Jehoiada fapa Benaiah le na sal Solomon kha cu a kan sawm lo.

²⁷ Mah hi thil hi siangpahrang ka bawipa nih na tuahmi a si i nangmah hnuah hin siangpahrang ka bawipa bawi ṭhutdan cungah ahodah a ṭhu lai ti kha na kan chimh lo a si maw?” tiah a ti.

Solomon Siangpahrang Ah An Ser

²⁸ Cun David Siangpahrang nih, “Bathsheba kha ka sinah hei au tuah,” tiah a leh. Cucaah siangpahrang hmaika ah khan a rung lut i siangpahrang hmaika ah cun a dir.

²⁹ Cun siangpahrang nih chiat a ser i, “Harnak kip chungin ka nunnak a ka tlantu Bawipa cu a nun bangin,

³⁰ Bawipa, Israel Pathian min chalh in na sinah chiat ka ser i, ‘Ka hnuah na fapa Solomon cu a rung bawi lai i keimah hmun ah amah cu ka bawi ṭhutdan cungah a ṭhu lai,’ tiin ka ti bantuk khan, cu bantuk ṭhiamṭhiam cun nihin zongah hin ka tuah lai,” tiah a ti.

³¹ Cun Bathsheba cu vawlei lei hoih in a kun i siangpahrang sinah cun upatnak a tuah i, “David Siangpahrang ka bawipa cu zungzal in nung ko seh!” tiah a ti.

³² David Siangpahrang nih, “Tlangbawi Zadok le profet Nathan le Jehoiada fapa Benaiah kha ka sinah au hna u,” tiah a ti. Cucaah siangpahrang hmaiah khan an ra.

³³ Cun siangpahrang nih annih cu, “Nan bawipa sinum hna kha i kalpi hna u law, ka fapa Solomon cu keimah laa cungah khan citter u law, Gihon ah runpi u;

³⁴ cun tlangbawi Zadok le profet Nathan nih khan khika ah Israel mi vialte cung i siangpahrang ah chiti thuh hna seh; cun muko kha tum u law, ‘Solomon Siangpahrang cu saupi nung ko seh!’ ti in au u.

³⁵ Cun nannih nih nan hun zulh lai i a ra lai i ka bawi ṭhutdan ah a ṭhu lai; zeitintiah amah cu keimah hmun ah siangpahrang a si lai; cun amah cu Israel le Judah cung i uktu si awkah rian ka pek cang,” tiah a ti.

³⁶ Cun Jehoiada fapa Benaiah nih khan siangpahrang cu a leh i, “Amen! Bawipa, siangpahrang ka bawipa i Pathian nih cun cu bantukin chim ve ko seh.

³⁷ Siangpahrang bawipa sinah Bawipa cu a um bang khan, cu bantuk ṭhiamṭhiam in Solomon sinah um seh law, a bawi ṭhutdan cu ka bawipa David Siangpahrang i a bawi ṭhutdan nakin nganter deuh seh,” tiah a ti.

³⁸ Cucaah tlangbawi Zadok, profet Nathan le Jehoiada fapa Benaiah le Khereth mi hna le Peleth mi hna kha an vung kal i Solomon cu David Siangpahrang laa cungah khan an citter i Gihon ah an ratpi.

³⁹ Khika ah tlangbawi Zadok nih thlam chung khan chiti chiahnak ki cu a lak i Solomon kha a thuh. Cun muko kha an tum i, mi vialte nih khan, “Solomon Siangpahrang cu saupi nung ko seh!” an ti.

⁴⁰ Cun mi vialte nih khan an hun zulh i thonglawi kha an tum pah i an i lawm ngaingai, an thawngpang nih vawlei kha a tlerh dih.

⁴¹ Adonijah le a sawmmi amah sin i a ummi vialte hna nih cun an rawldangh a dih pah ah khin mah thawng cu an theih. Cun Joab nih muko thawng kha a theih tikah, “Khua chung i an i tuai ur ko hi, a sullam zeidah a si?” tiah a ti.

⁴² Bia a chim lioah cun, zohhmanh, tlangbawi Abiathar fapa Jonathan kha a rung lut i Adonijah nih cun, “Rung lut tuah, zeitintiah nang cu misantlai na si i thawng ṭha na rak phorh ṭheo lai,” tiah a ti.

⁴³ Jonathan nih cun Adonijah cu a leh i, “Asilo zeitintiah kan bawipa David Siangpahrang nih Solomon cu siangpahrang ah a ser cang;

⁴⁴ cun siangpahrang nih khan a sinah tlangbawi Zadok le profet Nathan le Jehoiada fapa Benaiah le Khereth mi le Peleth mi hna kha a thlah hna i siangpahrang laa cungah khan an citter;

⁴⁵ cun tlangbawi Zadok le profet Nathan nih khan Gihon ah chiti an thuh i cuka cun lunglawmhnak he an hung kal i cucaah khua cu aa tuai ur hi a si. Mah hihi nan theihmi thawng cu a si.

⁴⁶ Solomon cu siangpahrang bawi ṭhutdan ah a ṭhu.

⁴⁷ Cuhleiah siangpahrang sinum hna nih khan David Siangpahrang kan bawipa cu, ‘Na Pathian nih Solomon min cu nangmah min nakin minthang deuh ah ser seh law a bawi ṭhutdan cu na bawi ṭhutdan nakin nganter deuh seh,’ tiin lawmhpi awkah an ra. Khi tikah siangpahrang nih cun ihkhun cungah cun a lu a khun.

⁴⁸ Cun siangpahrang nih cun, ‘Keimah mit hmuh hrimhrim ah, ka bawi ṭhutdan cung i keimah tefa pakhat a ṭhuttertu Bawipa, Israel Pathian cu thangṭhat si ko seh’ ti zongah a ti fawn,” tiah a ti.

⁴⁹ Khi tikah Adonijah nih a sawmmi vialte hna cu an ther i an tho i anmah le an lam cio ah khan an kal.

⁵⁰ Cun Adonijah nih Solomon kha a ṭih i cucaah a tho i a kal i biakṭheng ki kha aa tlaih hna.

⁵¹ Cun Solomon cu an chimh i, “Zohhmanh, Adonijah nih Solomon Siangpahrang kha a ṭih; zeitintiah, zohhmanh, biakṭheng ki kha aa tlaih hna i, ‘Solomon Siangpahrang nih a salpa hi vainam in ka that lai lo,’ tiin ka sinah chiat ser hmasa seh, a ti,” tiah an ti.

⁵² Cun Solomon nih, “Santlaimi a sinak a langhter ahcun, a samfa fa khat hmanh vawlei ah a tla lai lo, sihmanhsehlaw a chungah ṭhat lonak hmuh a si ahcun, a thi lai,” tiah a ti.

⁵³ Cucaah Solomon Siangpahrang nih mi a hei thlah hna i biakṭheng khan an runpi. Cun a ra i Solomon Siangpahrang sinah khan upatnak a tuah i Solomon nih amah cu, “Na inn ah va kal,” tiah a ti.