1 SAMUEL 7 - Lai (Hakha) Common Language Bible 2006

¹ Cun Kiriath-jearim khuami cu an ra i Bawipa kuang kha an lak i, tlang cung i a ummi Abinadab inn ah khan an hun kalpi. Cun annih nih Bawipa kuang zohkhenhtu ah a fapa Eleazar kha an thianter.

² Kiriath-jearim ah kuang kha a phak ni in, khika ah caan saupi, kum kul tluk a um; cun Israel innchungkhar vialte nih Bawipa kha an ngai ṭhan.

Samuel Nih Israel Mi Kha Bia A Ceih Hna

³ Cun Samuel nih Israel chungkhar vialte hna sinah cun, “Bawipa sinah nan lung dihlak in nan kir a si ahcun, ramdang khuazing hna le Ashtaroth hna kha nanmah chungin nan hlonh hna lai i Bawipa leiah khan nan lung nan hoihter lai i amah lawng kha nan biak lai, cun amah nih Filistin mi hna kut chungin an chuahter hna lai,” tiah a ti.

⁴ Cucaah Israel mi nih Baal hna le Ashtaroth hna kha an hlawt hna i Bawipa rian lawng kha an ṭuan.

⁵ Cun Samuel nih, “Israel mi vialte hna cu Mizpah ah pum hna u law, Bawipa sinah keimah nih thla kan campiak hna lai,” a ti.

⁶ Cucaah Mizpah ah an i pum i ti an than i Bawipa hmaiah an thlet i khi ni cu rawl an ul. Khika ah annih nih, “Bawipa cungah kan sual cang,” tiah an ti. Cun Samuel nih Israel mi cu Mizpah ah bia a ceih hna.

⁷ Cun Filistin mi hna nih Israel mi cu Mizpah ah an i pum ti kha an theih, Filistin bawi hna cu Israel mi hna doh awkah an hung kal. Cun Israel mi nih mah cucu an theih tikah, Filistin mi cu an ṭih hna.

⁸ Israel mi nih Samuel cu, “Filistin mi hna kut chungin a kan khamh nakhnga, kan ca i Bawipa kan Pathian sin i na aunak cu ngol hlah,” tiah an ti.

⁹ Cucaah Samuel nih hnuk ding lio tuufa pakhat a lak i Bawipa sinah pum khangh thawinak caah a pekchanh; cun Samuel nih Bawipa cu Israel mi caah a kawh i Bawipa nih amah cu a leh.

¹⁰ Samuel nih khangh thawinak kha a pekchanh lioah Filistin mi cu Israel mi kha doh awkah lam nai ah an ra; sihmanhsehlaw khi ni ah Bawipa nih aw fak piin Filistin mi hna cu khuarit in a rithnawh hna i an i tuai dih; Israel mi hna hmai in an zam dih.

¹¹ Cun Israel mi cu Mizpah khua in an chuak i Filistin mi kha Beth-kar thlang tiangin an dawi hna i an thah hna.

¹² Cun Samuel nih lung pakhat a lak i Mizpah le Jeshanah karlak ah a phun i, “Atu tiangin Bawipa nih a kan bawmh,” tiin a min ah Ebenezer a sak.

¹³ Cucaah Filistin mi hna cu an sung i Israel mi hna ram ah khan an lut ṭhan ti lo, Samuel nun chung vialte cu Filistin mi kha Bawipa kut nih khan a ralchanh hna.

¹⁴ Israel mi hna sinin Filistin mi nih an rak lakmi khua hna kha, Ekron in Gath tiang, Israel sinah pek ṭhan an si i, Filistin mi hna kut chungin Israel mi nih an ram cu an chanh khawh ṭhan. Israel mi le Amor mi hna karlak zongah daihnak a um.

¹⁵ Samuel nih Israel mi cu a nunchung vialte bia a ceih hna.

¹⁶ Cun kum fate in Bethel, Gilgal le Mizpah cu a tlawn diahmah lengmang hna i, hi khua dihlak ah hin Israel mi kha bia a ceih hna.

¹⁷ Cun a inn umnak a si caah Ramah ah a ra kir tawn i khika zongah Israel mi kha biading in bia a ceih hna. Cun khika ah Bawipa caah biakṭheng pakhat a ser.