1 SAMUEL 4 - Lai (Hakha) Common Language Bible 2006

Filistin Mi Nih Pathian Kuang Kha An Lak

¹ Cun Samuel bia cu Israel mi vialte sin a phan. Cun Israel mi hna cu Filistin mi hna kha doh awkah an chuak i Ebenezer ah an riak, Filistin mi cu Afek ah an riak.

² Filistin mi hna cu Israel mi doh awkah cun a tlang a tlang in an rak um i an hun i doh tikah Filistin mi hna nih cun Israel mi cu an tei hna, mi thong li tluk raldohnak hmun ah cun an thah hna.

³ Cun ralkap pawl cu an riahhmun ah an rat tikah, Israel upa hna nih cun, “Zeicahdah Bawipa nih nihin ah hin Filistin mi hna hmaiah a kan sunghter hnga? Bawipa cu kan sinah a rat i kan ral hna ṭhawnnak chungin a kan khamh nakhnga Bawipa biakamnak kuang kha Shiloh in hika ah hin ratpi u sih,” tiah an ti.

⁴ Cucaah Shiloh ah mi an hei thlah hna i cherubim karlak i a ummi ralkapbu Bawipa biakamnak kuang cu khika in an rak put; cun Eli fapa pahnih Hofni le Phinehas hna kha Pathian biakamnak kuang sinah cun an rak um.

⁵ Bawipa biakamnak kuang cu riah-hmun chungah a phak tikah, Israel mi vialte cu fak piin an au i cucaah vawlei zong kha a tlerh dih.

⁶ Cun Filistin mi hna nih an aunak thawng cu an theih tikah, “Hebru mi hna riahhmun i hi ti fakpi an au hi a sullam zeidah a si?” tiah an ti. Cun annih nih Bawipa kuang kha riahhmun a phan cang ti an theih tikah,

⁷ Filistin mi hna cu an thin a phang i, “Riahhmun chungah khuazing an phan cang,” tiah an ti. Cun annih nih, “Bialo kan si ai! Hi bantuk hi cu hlanah a um bal lo.

⁸ Belo kan si ai! Aho nih dah hi a ṭhawngmi khuazing hna ṭhawnnak chung hin a kan chuah khawh lai? Hi hna hi ramlak ah Izipt mi hna kha rai phunphun in a thattu khuazing an si.

⁹ Nan ralṭha ko uh, maw Filistin mi hna, pa bantukin um uh, cu ti a si lo ahcun, nannih tang ah sal an si bantuk hin, anmah Hebru mi tangah hin sal nan si sual lai; pa bantukin um u law, do hna u,” tiah an ti.

¹⁰ Cucaah Filistin mi nih cun an tuk hna i Israel mi cu an sung, anmah le an inn cio ah khan an zam dih; i thahnak fakpi a um, Israel mi ke ralkap sang thum an thi.

¹¹ Pathian biakamnak kuang kha an tlaih; Eli fapa pahnih Hofni le Phinehas zong kha an thi.

¹² Cun Benjamin mi pakhat cu raltuknak hmun khan a le i cu ni lila ah cun Shiloh a phan, a puan kha a thleh hna i a lu ah vawlei aa phulh.

¹³ A phak tikah Eli cu kutka pawng i a ṭhutdan ah khan a ṭhu i lam lei kha a rak zoh, zeitintiah Pathian kuang caah khan a lung therphang in a um. Cun mipa cu khua chungah a luh i thawngpang kha a chim tikah an khua ning piin an ṭap dih.

¹⁴ An aukhuan thawng kha Eli nih a theih tikah, “An au urmar len ko cu zeidah a si?” tiah a ti. Cun mipa cu khulrang in a ra i Eli cu a chimh.

¹⁵ Eli cu kum sawm kua le kum riat a si cang i a mit cu a caw cang, cucaah khua a hmu kho ti lo.

¹⁶ Cun mipa nih cun Eli cu, “Keimah hi raltuknak hmun in a rami cu ka si; raltuknak hmun in nihin ah ka ra zam,” tiah a ti. Cun anih nih, “Zeitindah a si, ka fapa?” tiah a ti.

¹⁷ Cun thawngpang a rak phortu nih cun a leh i, “Israel mi cu Filistin mi hna hmaiah an zam i mi lakah thahnak nganpi a um; na fapa pahnih Hofni le Phinehas zong kha an thi i Pathian kuang kha an tlaih,” tiah a ti.

¹⁸ Pathian kuang, ti a vun chim tikah khan Eli cu, kutka pawng i a ṭhutdan cung khan hnulei ah aa ngal; a hngawng a kiak i a thi, zeicahtiah amah cu a tarmi a si i a rit fawn. Israel mi cu kum sawm li bia a ceih hna.

¹⁹ Cun a fapa nupi, Phinehas innchung cu pumlawnglo in a um i a nithla a tling dengmang. Cun Pathian kuang kha an tlaih i a va le a va pa kha an thi ti thawng a theih tikah a kun i fa a hrin; zeicahtiah a nganfah nih a hun phak colh.

²⁰ Cun a thih dengmang lioah khan amah a zohkhentu nu hna nih cun, “Ṭih hlah, zeicahtiah fapa na hrin,” an ti. Sihmanhsehlaw a let hna lo i zei zongah a rel fawn lo.

²¹ Cun, “Sunparnak cu Israel mi sinin aa ṭhial cang!” tiin naute cu Ikabod tiah min a sak, zeicahtiah Pathian kuang cu tlaih a si, cun a va pa le a va zong kha an thi cang.

²² Cun amah nih cun, “Sunparnak cu Israel sinin aa ṭhial cang, zeitintiah Pathian kuang cu tlaih a si cang,” tiah a ti.