1 KORIN 9 - Lai (Hakha) Common Language Bible 2006

Lamkaltu A Sinak Le A Rian

¹ Kei cu ka luat lo dahra? Lamkaltu ka si lo dahra? Kan Bawipa Jesuh cu ka hmu lo dahra?

² Midang nih cun lamkaltu ah ka rel hmanh hna hlah seh law nannih nih cun nan ka rel awk a si, zeicahtiah Bawipa chung i nunnak nan hmuhmi thawng hin lamkaltu ka si cu fiang tein a langhtertu nan si.

³ Mi nih an ka soi tikah keimah kong kaa chimning cu hitihin a si:

⁴ Ka rianṭuanmi caah hin ti le rawl ka hmuh ve awk a si lo maw?

⁵ Lamkaltu dang hna le kan Bawipa naule hna le Peter nih, khualtlawnnak ah an nupile kha an i ṭhit hna bantukin kei zong nih Khrihfa nupi kaa tlawnpi ve awk a si lo maw?

⁶ Barnabas le keimah lawng hi maw mah nunnak caah mahte in rian aa ṭuanpah ding cu kan si?

⁷ Ralkap aho nih dah ralkap chung i an um lioah anmah tein an paw an i cawm bal? Lothlopa ahodah a lo chungin a chuakmi mitsur thei ei loin a um bal? Tuukhal ahodah a tuurun chungin a hmuhmi tuu hnuk ding loin a um bal?

⁸ Hi bantukin mi nih ni fate an ton lengmangmi thil chungin ka lakmi tahchunhnak hi aa bochan tiah ka ruat hlah u.

⁹ Nawlbia zong nih cu ti ṭhiamṭhiam cun a chim ko. Zeitindah a ti tiah, “Facang a cilmi cawtum cu a hmur va ṭem hlah,” a ti. Pathian nih a tihnawh duhchanmi cu cawtum cu maw a si hnga tiah nan ruah?

¹⁰ Asiloah a ti duh taktakmi cu kanmah dah kan si hnga? Chim hau loin, kanmah hi kan si ko. Lei a thuangtu nih siseh, rawl a ṭuantu nih siseh, kan co awk a um ve lai ti ruahchan in an ṭuan.

¹¹ Nan lakah thlarau thlaici kha kan tuh, nan sinin vawlei cung thil kan zun ahcun cucu a tam tuk maw?

¹² Midang nih nan sinin cu bantuk hmuh awk kha an i ruahchan ahcun, kannih nih cun kan i ruahchan chinchin awk a si hnga lo maw? Sihmanhsehlaw kannih nih cun, cuticun kan in ti duh hna lo. Khrih kong thawngṭha hi, zeilo nih maw dawn sual lai tiin zeizong vialte kha a in tu in kan in.

¹³ Biakinn chung i rian a ṭuanmi hna nih Biakinn in an rawl kha an hmuh ti le biakṭheng cung i raithawinak a pechanmi hna nih raithawinak sa kha an co ve ti cu nan hngalh.

¹⁴ Cu bantuk ṭhiamṭhiam in thawngṭha a chimtu hna nih thawngṭha chim in an paw an i cawm awk a si ti cu Bawipa cawnpiakning a si.

¹⁵ Sihmanhsehlaw hi bantuk thil hi pakhat hmanh nan cungah ka hmang lo, hi ca kan kuat hna zong hi cu bantuk ka duh caah a si lo. A thih hmanh ka thi deuh hnga! Kaa porhlawt lenmi hi ahohmanh pakpalawng ah serter ka duh hna lo.

¹⁶ Thawngṭha ka chim ruang menmen ah hin kaa porhlawt awk a si lo. A ngaite ti ahcun, va chim, tiah fial pei ka si cu. Thawngṭha cu chim loin rak um ning law zeitluk in dik ka caah a poi hnga!

¹⁷ Ka rian hi keimahte nih kaa thim i ka tuahmi a si ahcun, ṭuan man ka hmuh lai ti zong cu kaa ruahchan hnga, sihmanhsehlaw ka rian hrimhrim a si tiin ka ṭuan hi Pathian nih hi rian hi ka kut chungah a ka pek caah a si.

¹⁸ A si ahcun ṭuan man zeidah ka hmuh? Ka hmuhmi cu, thawngṭha ka chimnak ka rian ah hin, cucu ka hmuh awk, khakha ka hmuh awk ti loin, alak tein ka chim i cu ka chimnak thawngin lungriamhnak ka hmuhmi hi a si.

¹⁹ Kei cu miluat ka si, aho sal hmanh ka si lo, asinain mi tam deuh ka lak khawh hna nakhnga ti in mi kip sal ah kaa ser.

²⁰ Judah mi lak i ka ṭuan tikah Judah mi cu ka lak khawh hna nakhnga Judah mi bantukin ka um; cun Moses Nawlbia tang i a ummi hna sin ka ṭuan tikah, anmah cu ka lak khawh hna nakhnga, Nawlbia tangah cun ka um lo nain a um bantukin ka um.

²¹ Cu bantuk ṭhiamṭhiam in Judah mi hna phung leng i a ummi Jentail mi hna sin i ka ṭuan tikah Jentail mi cu ka lak khawh hna nakhnga Jentail mi bantukin ka um. Cuti ti tikah Pathian nawlbia kha ka zul lo tinak a si lo, a ngaingai ti ahcun Khrih nawlbia tangah pei ka um cu.

²² Zumhnak lei i a dermi hna sinah, anmah cu ka lak khawh hna nakhnga anmah bantuk i a dermi ah kaa cang. Cucaah zeimaw ti tal in ka khamh kho hna hnga maw tiin mi kip sinah an sining paoh in ka um ve.

²³ Hi vialte hi tiin ka tuah cu thawngṭha ruangah khan a si, cu thawngṭha cu mi vialte ka hrawm khawh hna nakhnga ka duh caah a si.

²⁴ Tlik zuamnak ah an dihlak in tlik cu an i zuam nain laksawng a hmumi cu pakhat lawng a si ti kha nan hngalh. Cucaah laksawng hmu ding tein tli u.

²⁵ Zuamnak ah tel a duh vemi nih cun timhtuahnak ah khan fel tein an um tawn. Cuti i an um cu a uai khomi pangpar lukhimh hmuh awk caah khan a si; asinain kannih tu cu zeitikhmanh i a uai lomi pangpar lukhimh hmuh awk caah khan a si.

²⁶ Kei cu ka tlik tikah tinhmi kawl fiang tein ka ngei; kaa thongh tikah a ping a pang a thongmi bantuk ka si lo.

²⁷ Zuamnak hmun ah rak i zuam u tiah midang kha sawm lengmang ṭung in a sawmtu keimah kha hlawtmi si sual lai ing ti phang in ka pum cu ka hrem i fek tein ka uk.