1 KORIN 6 - Lai (Hakha) Common Language Bible 2006

Khrihfa Pakhat le Pakhat Taza I Cuainak

¹ Nannih pakhat le pakhat nan i sik tikah, nan bia cu Pathian mi hna tu kha ceihter loin, zeitindah lawkihmi biaceihtu bawi hna sin tu ah nan chuah ngam?

² Vawlei hi Pathian mi hna nih bia an ceih lai ti kha nan hngal lo hlah maw? Vawlei hmanh hi a bia a ceihtu ding nan si ahcun, thil hme tete cu nan ceih kho lo maw?

³ Vancungmi khi kanmah nih an bia kan ceih hna lai ti hi nan hngal lo dahra? Hi vawlei cung kan nun lio thil chinchin cu kan ceih awk pei an si cu.

⁴ Cucaah cu bantuk thil cu a hung chuah tikah khrihfabu chung i aa tel ve lomi cu nan ceihter ko hna lai maw?

⁵ Nan caah ningzah awk a va si dah. Unau aa simi hna karlak i bia a thlek khotu mifim pakhat tal cu nan um ṭheo lai.

⁶ Nannih nih cuticun tuah loin, unau le unau cu taza nan i cuai i a zum lomi tu kha nan biathlektu ah nan hman hna.

⁷ Pakhat le pakhat taza nan i cuainak nih hin nan si awk hnga ding nan si lo kha fiang tein a langhter. Na palh, ti nan si zongah nan caah a ṭha deuh ko lo maw? Nan thil an in chuh hna zongah nan caah a ṭha deuh ko lo maw?

⁸ Cu ti si loin nannih cu, u le nau a si hrimhrim komi kha, pakhat le pakhat nan i tawng i pakhat le pakhat thil nan i chut.

⁹ Miṭha lomi nih cun Pathian Pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le,

¹⁰ mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo.

¹¹ A cheu cu cu bantuk cu nan rak si. Asinain sualnak in thianh nan si cang; Pathian sinah pekchanh nan si cang; Bawipa Jesuh Khrih min le kan Pathian Thlarau thawngin Pathian he remter nan si cang.

Nan Pum In Pathian Thangṭhat U

¹² Mi cheu nih nan i thawh lai i, “Kei cu zeipaoh tuah onh ka si ko,” nan ti. Asi, zeipaoh tuah onh na si ko lai, sihmanhsehlaw zeipaoh kha na caah a ṭha dih lo. Kei zong nih, “Zeipaoh tuah onh ka si,” ka ti khawh ve, sihmanhsehlaw zeihmanh kaa salter lai lo.

¹³ Cun a cheu nih nan i thawh ṭhan i, “Rawl cu paw caah a si, paw cu rawl caah a si,” nan ti; a si taktak, sihmanhsehlaw Pathian nih a donghter veve hna lai. Minung pum hi sual tuahnak caah hman ding a si lo, Bawipa rianṭuannak ca tu ah hman ding a si deuh, Bawipa zong nih pum caah rian a ṭuan ve.

¹⁴ Pathian nih Bawipa cu thihnak in a thawhter i kannih zong a ṭhawnnak cun a kan thawhter ve lai.

¹⁵ Nan pum cu Khrih pum a ṭengnge a si kha nan hngalh. Khrih pum a ṭengnge cu i lak riangmang in hlawhhlangnu pum a ṭengnge ah cun ka ser hnga maw? Naisai hlah!

¹⁶ Hlawhhlangnu pum ah a pum a va fonhmipa kha, hlawhhlangnu he cun titsa khat an si ti kha nan hngal rua lo. Cathiang nih fiang tein a chimmi cu, “Cu hna pahnih cu pum khat an si lai,” ti hi a si.

¹⁷ Sihmanhsehlaw Bawipa he aa pehmi cu Bawipa he thlarau in pakhat an si.

¹⁸ Nu le pa sualnak kha hrial ko u. Sualnak dang nih cun mi hi a pum kha a hnorsuang lo, asinain nu le pa sualnak a tuahmi nih cun amah pum cung hrimhrim ah khan sualnak a tuah a si.

¹⁹ Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta nan si lo, Pathian ta nan si;

²⁰ a man in cawkmi nan si. Cucaah nan pum cu Pathian sunparnak caah hmang u.