1 KORIN 13 - Lai (Hakha) Common Language Bible 2006

Dawtnak

¹ Minung holh a phunphun in ka hei holh kho ko hnga i vanmi holh hmanh ka hei thiam ko hnga, sihmanhsehlaw dawtnak ka ngeih lo ahcun ka holh cu darkhuang hnachet thawng le sumsel tum thawng bantuk men a si ko.

² Phungchim thiamnak laksawng ka hei ngei ko hnga i hngalhnak phun tling ka hei ngei ko hnga i biathuk vialte ka hei hngalh dih ko hna hnga; cun tlang ṭhial khawhnak zumhnak zong ka hei ngei ko hnga, sihmanhsehlaw dawtnak ka ngeih lo ahcun zeihmanh ka si lo.

³ Ka ngeihmi thil vialte, mi ka hei ṭhenh dih ko hna hnga, cun ka pum hmanh khangh awkah ka vaa pe ko hnga, sihmanhsehlaw dawtnak ka ngeih lo ahcun ka caah ṭhathnemnak zeihmanh a um lo.

⁴ Dawtnak cu thlachiat a ruat i mi cungah zaangfahnak a ngei. Dawtnak cu a nah a chuak lo, a lung a puam lo i aa porhlaw lo.

⁵ Dawtnak cu tlabulbal in khua a sa lo i amah zawn lawng aa ruat lo; a thin a tawi lo, palhnak kha aa cinken peng lo.

⁶ Dawtnak cu midang sualnak cungah khan diriam in a um lo, biatak tu ah khan aa lawm.

⁷ Dawtnak cu a lung a dong bal lo, zumhnak a ngei, ruahchannak a ngei, a lung a sau i a thin a fual.

⁸ Dawtnak cu dongh a thiam lo. Profet biachimnak cu um hmanh seh law cucu a dih lai. Holhtheihlo a um maw? Cucu a dong lai. Hngalhnak kan ngeihmi zong a dih lai.

⁹ Zeicahtiah kan ngeihmi hngalhnak cu siseh, midang chimh thiamnak kan ngeihmi zong cu siseh, a cheuchum lawnglawng an si i

¹⁰ a cheuchum lawnglawng a simi cu a tlingmi a phak tikah cun an loh phung a si ko.

¹¹ Ngakchia ka rak si lioah ka biachim le ka thil hmuhning le ka ruahnak cu an rak ngakchia ngai. Atu cu upa ka hung si cang i ngakchia ruahning in thil ruah kha cu ka duh ti lo.

¹² Atu i kan hmuhmi hi cu, thlalang fiang lo chung i kan mui maw chialchual in kan hmuhmi bantuk khi a si, sihmanhsehlaw cu tikah cun hmaitonh tein kan hmuh lai. Atu i ka hngalhmi hi cu a cheuchum lawnglawng a si, sihmanhsehlaw cu tikah cun Pathian nih a ka hngalhnak a tlin bantukin ka hngalhnak zong a tling ve lai.

¹³ A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu dawtnak a si.