1 KORIN 12 - Lai (Hakha) Common Language Bible 2006

Thiang Thlarau Laksawng

¹ Thiang Thlarau sinin kan hmuhmi laksawng kong ah hngalhter kan duhmi hna a um.

² Nannih cu lawkihmi nan si lioah khan nunnak a ngei lomi siasal nih a rak in uk hna kha nan hngalh i cu siasal nih cun a ping ah an hruai zungzal hna.

³ Cucaah cun Pathian Thlarau i a hruaimi hna nih cun, “Jesuh cu chiat ko seh,” an ti kho bal lo i, Thiang Thlarau i a hruai hna dah ti lo ahcun, “Jesuh cu Bawipa a si,” an ti kho bal pek lo.

⁴ Thlarau laksawng hi a phunphun in a um, sihmanhsehlaw cu laksawng vialte a petu hna cu Thlarau ṭhiamṭhiam kha a si.

⁵ Rian ṭuan hi a ning tampi a um, sihmanhsehlaw a rian kan ṭuanmi cu Bawipa ṭhiamṭhiam kha a si ko.

⁶ Rian ṭuan khawhnak hi a phunphun in a um, sihmanhsehlaw cu bantuk ṭuan khawhnak a petu hna cu Pathian ṭhiamṭhiam kha a si ko.

⁷ Thlarau kan chung i a um kha phun khatkhat in a lang cio i cucu kan dihlak ca i ṭhatnak ding caah khan a si.

⁸ Thlarau nih cun pakhat cu fimnak bia chim thiamnak a pek i pakhat cu hngalhnak biathuk fiang lak in chim thiamnak a pek.

⁹ Cu Thlarau ṭhiamṭhiam nih cun pakhat cu zumhnak a pek i pakhat cu damter khawhnak ṭhawnnak a pek.

¹⁰ Pakhat cu khuaruahhar tuah khawhnak a pek; cun pakhat cu Pathian bia chim thiamnak a pek i pakhat cu Thlarau sinin a rami laksawng a si maw si lo ti thleidan khawhnak a pek. Cun pakhat cu holhtheihlo in holh khawhnak kha a pek i pakhat cu cu holhtheihlo in chimmi leh khawhnak a pek.

¹¹ Hi thil vialte a tuahtu hi Thlarau pakhat a si, a duhning bantukin mi kha laksawng phun dangdang cio a pek hna.

Pum Khat Nge Tampi

¹² Khrih hi nge tampi a ngeimi pum bantuk a si; nge cu tampi an si ko nain pum cu pakhat a si ko.

¹³ Cu bantukin kannih vialte zong hi, Judah mi kan si ah, Jentail mi kan si ah, sal kan si ah, miluat kan si ah, kan dihlak in pum pakhat chungah khan Thlarau pakhat nih tipil a kan pek i kan dihlak in Thlarau pakhat kha din awkah pek kan si.

¹⁴ Pum hi nge pakhat lawng a ngei lo, nge tampi a ngei.

¹⁵ Ke nih i thawh seh law, “Kei cu kut ka si lo caah pum chungah kaa tel lo,” ti seh law, cu nih cun pum nge a si cu a ngolter hnga maw? Ngolter hlah.

¹⁶ Hna nih, “Kei cu mit ka si lo caah pum chungah kaa tel lo,” ti seh law, cu nih cun pum nge a si cu a ngolter hnga maw? Ngolter hlah.

¹⁷ Pum hi a dihlak in mit va si tuah seh law, zeitindah khua a theih khawh lai? Hna va si dih seh law, zeitindah rim a theih khawh lai?

¹⁸ Sihmanhsehlaw atu i a sining bantukte hin, Pathian nih amah duhning tein, anmahle an um nakhnga ding cio ah khan a chiah hna.

¹⁹ Pum hi nge pakhat lawng si seh law pum a tling hnga lo,

²⁰ sihmanhsehlaw a sining bantukte hin nge tampi an um i pum cu pakhat a si.

²¹ Cucaah mit nih khan kut cu, “Nang cu kan herh lo,” a ti kho lo. Cun lu zong nih ke kha, “Kan herh lo,” a ti kho ve lo.

²² A ngaingai ti ahcun, kan pum chung i a santlai deuh lo kan timi hna tel loin kan si khawh ṭung lo;

²³ hmaizah awk tlak i kan ruah set lomi hna pei ṭha khun in kan hmaizah hna i

²⁴ aa dawh set lomi kha pei ṭha khun in kan thuamh hna cu. Kan pum aa dawhnak zawn nih cun ṭamh zong cu an herh ṭung lo. Pum cung i hmaizahnak kan baunak zawn nih khan hmaizahnak a hmuh khun nakhnga Pathian nih cuticun a tuah.

²⁵ Cucaah pum chungah cun i ṭhennak a um lo, a nge dangdang hna nih khan pakhat le pakhat zawn i ruahnak an ngei cio.

²⁶ Pum chung nge pakhatkhat nih fahnak a in ahcun a dang nge vialte zong nih khan an rak inpi ve; cun pakhatkhat nih khan thangṭhatnak a hmuh ahcun a dang vialte zong nih khan aa lawmhnak cu an rak i hrawm ve.

²⁷ Cucaah nannih cu nan dihlak in Khrih pum kha nan si i pumpak cio ah a nge kha nan si.

²⁸ Cu bantukin khrihfabu chungah hin Pathian nih mi cu an um nakhnga ding cio ah khan a chiah hna: a hmasa bik ah lamkaltu pawl, a pahnihnak ah profet pawl, a pathumnak ah cawnpiaktu pawl, cun cu hna a hun zultu ah khuaruahhar a tuahtu pawl, cun cu hna a hun changtu ah damter khawhnak pek a simi pawl, asiloah mi bawmh khawhnak pek a simi pawl, asiloah mi hruai khawhnak pek a simi pawl, asiloah holhtheihlo in holh khawhnak pek a simi pawl,

²⁹ An dihlak in lamkaltu lawnglawng an si dih lo, profet lawnglawng an si dih lo, cawnpiaktu lawnglawng an si dih lo. An dihlak in khuaruahhar tuah khawhnak kha an ngei dih lo,

³⁰ an dihlak in zawtnak damter khawhnak kha an ngei dih lo, an dihlak in holhtheihlo in holh khawhnak kha an ngei dih lo, an dihlak in holhtheihlo in chimmi leh khawhnak kha an ngei dih lo.

³¹ Cucaah laksawng biapi deuh a simi hna tu kha nan i tinh awk a si. Cun cu hna lak hmanh ah a ṭha bik cu atu i ka hun chim dingmi hi a si: