1 KORIN 11 - Lai (Hakha) Common Language Bible 2006

¹ Cucaah cun kei zong nih Khrih nawl ka cawn bantukin nannih zong nih ka nawl kha i cawn ve u.

Biakinn Chungah Nan Lu I Khuh U

² Keimah kha philh lo tein nan ka um i kan pek chinmi hna cawnpiaknak kha nan zulh caah kan thangṭhat hna.

³ Sihmanhsehlaw hngalhter kan duhmi hna cu Pathian cu Khrih lu a si bantukin pa cu nu lu a si i Khrih cu mi vialte lu a si.

⁴ Cucaah zapi hmai i thlacam tik le biachim tik i a lu aa khuhmi pa nih cun Khrih cungah khan ningzahnak a tlunter a si i

⁵ nu an si ahcun thlacam tik le biachim tik i a lu aa khuh lomi nih cun a va cungah ningzahnak a tlunter a si ve; cu nu cu a lu aa kolhmi nu he khan zeihmanh an i dang lo.

⁶ Nu nih a lu aa khuh lo ahcun i met lawlaw ko seh. Lukongh le lumeh cu nu caah cun ningzah awk a si caah a lu kha i khuh ko seh.

⁷ Pa cu a lu i khuh a herh lo, zeicahtiah pa cu Pathian mui a kengmi a si i Pathian sunparnak thlalang a si. Nu tu cu pa sunparnak thlalang men a si.

⁸ Zeicahtiah pa cu, nu chungin ser a si lo, nu tu kha pa chungin sermi cu a si.

⁹ Cun pa cu, nu caah ser a si fawn lo, nu tu kha pa ca i sermi cu a si.

¹⁰ Vancungmi hna ruangah nu nih a lu cu aa khuh awk a si i cuticun a va tang i a ummi a si kha a langhter awk a si.

¹¹ Bawipa chung i kan nunning tu ah hin cun, nu hi pa caah a herh bantukin pa zong nu caah a herh ve.

¹² Nu cu pa chungin ser a si bantukin pa zong cu nu chungin a chuakmi a si ve; zeizong vialte hram cu Pathian a si.

¹³ Cucaah nanmah nih a ṭha ṭhalo khiak ko u: nu nih zapi hmai i lu khuh loin Pathian sin i thlacam cu a ṭha nan ti maw ti lo dik.

¹⁴ Thil umtuning ah hin, sam sau cu pa caah cun ningzak a si,

¹⁵ sihmanhsehlaw nu caah cun i chawr awk thil a si. A sam sau cu i khuhnak ding ca i pekmi pei a si cu.

¹⁶ Asinain hi kong ah al a ka duhmi nan um ahcun, chim ka duhmi cu hihi a si ko: kanmah nih siseh, Pathian khrihfabu dang nih si hna seh, phung dang hlei kan ngei lo.

Bawipa Zanriah

¹⁷ Hi ti kan chimhmi hna lakah hin kan thangṭhat khawh hna lonak pakhat a um: nan i pumhnak nih hin ṭhatnak nakin chiatnak a chuahter deuh.

¹⁸ A hmasa bik ah, nan i pumhnak ah a bubu in nan i ṭhen ti ka theih i cucu ahmaan pah ṭheo lai tiah ka zumh.

¹⁹ (Aho hi dah ahmaan ti hngalhnak caah a si ahcun, i ṭhen zong cu a ṭha ve sawk.)

²⁰ Hmunkhat i nan i pumh ah khan Bawipa Zanriah ei awk i nan i pumh a si ṭung lo.

²¹ Zeicahtiah nanmahle nan rawl cio pei nan ei i a cheu cu rawlṭam in nan um i a cheu cu nan rit ko kha.

²² Einak ding le dinnak ding caah mahle inn nan ngei cio lo maw? Asiloah, cuti nan um cu Pathian khrihfabu kha nautat nan duh ca le a herh a baumi nan unau pawl kha ningzahter nan duh hna caah a si maw? Hi kong ah hin zeitindah bia a chim lai tiah nan ka ruah? Hi kongah hin kan thangṭhat kho hna hnga maw? Thangṭhat kho hlah.

²³ Zeicahtiah kan pek chinmi hna cawnpiaknak hi Bawipa sinin ka hmuhmi a si: kan Bawipa Jesuh cu an rawi zan ah khan chang kha aa lak i

²⁴ Pathian sinah thla a cam hnuah a cheu i, “Hihi ka pum a si, nanmah caah a si. Keimah philh lonak ah tuah u,” a ti.

²⁵ Cu bantuk ṭhiamṭhiam in zanriah ei dih in hrai kha aa lak i, “Hi hrai hi Pathian biakamnak thar, ka thi in ka fehtermi a si. Hi hrai nan din fate keimah philh lonak caah ding u,” a ti.

²⁶ Cucaah hi chang nan ei i hi hrai nan din fate, Bawipa a rat hlantiang a thihnak kong kha nan chim a si.

²⁷ Cu bantuk ve in Bawipa thangchiatnak dingin a chang cu nan ei i a hrai cu nan din ahcun, cu bantukin a tuahmi paoh cu Bawipa pum le thi cung i sualnak a tuahmi nan si.

²⁸ Cucaah ahohmanh nih amah le amah kha a lungthin i dap cikcek seh law cu hnuah chang cu ei seh law hrai cun ding seh.

²⁹ Zeicahtiah chang kha a ei i hrai in a din tikah Bawipa pum sullam kha a hngalh lo ahcun a ei a din ah khan biaceihnak aa ei aa din chih.

³⁰ Cucaah cun pei mi tampi nan zawt nan fah i a thih zong tlawmpal cu nan thihphah kha a si cu.

³¹ Kanmah le kanmah kha ṭha tein kan i dah hmasa ahcun Pathian biaceihnak kha kan huat lai lo.

³² Sihmanhsehlaw Bawipa nih bia a kan ceih i dan a kan tat cu vawlei sinah sualphawt chih kan si nakhnga lo caah a si.

³³ Cucaah ka u le ka nau hna, Bawipa Zanriah ei awk i nan i pumh tikah pakhat le pakhat i hngak u.

³⁴ Cun nan rawl a ṭam ahcun inn ah i ei ta u, cuticun nan i pumh tikah Pathian biaceihnak nan huat lai lo. Cun thil dang tu cu ka rat tikah kan remhchun te lai.