1 CHANRELNAK 27 - Lai (Hakha) Common Language Bible 2006

Ram Uktu Bawi Hna

¹ Mah hihi Israel mi, an pale innchungkhar hna lu a si ciomi, a thongthong pawl a uktu hna le a zaza pawl a uktu hna le an bawi pawl hna, a chuak a lut lengmangmi bu pipi hna he aa pehtlaimi rian i thla khat hnu thla khat in kum chuak tiang siangpahrang cu a rian a ṭuanpiaktu hna cazin cu a si, bu khat cu sang hnih thong li an si:

² Zabdiel fapa Jashobeam cu thla khatnak thla ah pakhatnak bu kha a hruitu a si; a bu chungah cun sang hnih le thong li an um.

³ Amah cu Perez tefa a si i thla khatnak thla ah cun amah cu ralkapbu haotu vialte hna bawi bik a si.

⁴ Thla hnihnak thla bu cu Aho mi Dodai nih a hrui hna; a bu chungah cun sang hnih le thong li an um.

⁵ Ralbawi pathumnak, thla thumnak thla ca i cu Benaiah a si, amah cu tlangbawi Jehoiada fapa a si i haotu bik a si; a bu chungah cun sang hnih le thong li an um.

⁶ Hi Benaiah hi sawm thum hna lak i miṭhawng kha a si i amah nih sawm thum hna kha a hrui hna; amah bu a haotu hna cu a fapa Ammizabad kha a si.

⁷ Thla linak ca i a palinak cu Joab unau Asahel kha a si i a fapa Zebadiah nih khan a hun zulh; a bu chungah cun sang hnih le thong li an um.

⁸ Ralbawi panganak, thla nganak ca i cu Izrah mi Shamhuth a si; a bu chungah cun sang hnih le thong li an um.

⁹ Paruknak, thla ruknak ca i cu Ira a si, amah cu Tekoa mi Ikkesh fapa a si; a bu chungah cun sang hnih le thong li an um.

¹⁰ Pasarihnak, thla sarihnak ca i cu Efraim tefa Pelon mi Helez a si; a bu chungah cun sang hnih le thong li an um.

¹¹ Pariatnak, thla riatnak ca i cu Zerah tefa Hushath mi Sibbekai a si; a bu chungah cun sang hnih le thong li an um.

¹² Pakuanak, thla kuanak ca i cu Benjamin tefa Anathoth mi Abiezer a si; a bu chungah cun sang hnih le thong li an um.

¹³ Pahranak, thla hranak ca i cu Zerah tefa Netofah mi Maharai a si; a bu chungah cun sang hnih le thong li an um.

¹⁴ Hleikhatnak, thla hleikhatnak ca i cu Benjamin fapa hna tefa Pirathon mi Benaiah a si; a bu chungah cun sang hnih le thong li an um.

¹⁵ Hleihnihnak, thla hleihnihnak ca i cu Othniel tefa Netofah mi Heldai a si; a bu chungah cun sang hnih le thong li an um.

¹⁶ Israel mi phun hna chungah cun, Reuben mi hna caah Zikhri fapa Eliezer cu bawi upa bik a si; Simeon mi hna caah Maakah fapa Shefatiah a si;

¹⁷ Levi caah Kemuel fapa Hashabiah a si; Aaron caah Zadok a si;

¹⁸ Judah caah Elihu a si, amah cu David unau pakhat a si; Issakhar caah Mikhael fapa Omri a si;

¹⁹ Zebulun caah Obadiah fapa Ishmaiah a si; Naftali caah Azriel fapa Jeremoth a si;

²⁰ Efraim mi hna caah Azaziah fapa Hoshea a si; Manasseh phun cheu caah Pedaiah fapa Joel a si;

²¹ Gilead i a ummi Manasseh phun cheu caah Zekhariah fapa Iddo a si; Benjamin caah Abner fapa Jaasiel a si;

²² Dan caah Jehoram fapa Azarel a si. Mah hna hi Israel mi phun a hruitu hna cu an si.

²³ David nih kum kul toi kha cu a rel hna lo, zeicahtiah Bawipa nih Israel cu van i arfi zat ah khin ka ser lai tiah bia a kam cang.

²⁴ Zeruiah fapa Joab nih khan rel hram a thawk, sihmanhsehlaw a dih lo; asinain hi ruang ah hin Israel cungah thinhunnak a tlung i cu relnak cu Siangpahrang David chanrelnak chungah khumh a si lo.

²⁵ Siangpahrang chawhlawn kuang hna a zohkhenhtu cu Adiel fapa Azmaveth a si; cun ram chung i a ummi le khua chung i a ummi le khuate chung le innsang chung i a ummi chawhlawn kuang hna a zohkhenhtu cu Uzziah fapa Jonathan a si;

²⁶ Vawlei kha leh awkah lo chung i rian a ṭuantu hna a zohkhenhtu cu Khelub fapa Ezri a si;

²⁷ mitsur dum a zohkhenhtu cu Ramath mi Shimei a si; cun mitsur dum chungin a chuakmi mitsur hang khonnak zohkhenhtu cu Shifmot mi Zabdi a si.

²⁸ Shefelah i a ummi oliv thing le saikamor thing zohkhenhtu cu Geder mi Baalhanan a si; cun chiti khonmi a zohkhenhtu cu Joash a si.

²⁹ Sharon i a tlongmi saṭil run a zohkhenhtu hna cu Sharon mi Shitrai a si; nelrawn i a tlongmi saṭil run zohkhenhtu hna cu Adlai fapa Shafat a si.

³⁰ Kalauk a zohkhenhtu hna cu Ishmael mi Obil a si; laa a nu a zohkhenhtu hna cu Meronoth mi Jehdeiah a si. Tuurun a zohkhenhtu hna cu Hag mi Jaziz a si.

³¹ Hi vialte hna hi David Siangpahrang chaw kengtu an si.

³² David pacheu Jonathan cu fimchimtu a si, amah cu mifim le cazi a si; amah le Hakhmoni fapa Jehiel nih siangpahrang fapa kha an zohkhenh hna.

³³ Ahithophel cu siangpahrang fimchimtu a si i Arki mi Hushai cu siangpahrang hawikom a si.

³⁴ Ahithophel cu Jehoiada, Benaiah fapa le Abiathar nih an hun chaan. Joab cu siangpahrang ralkapbu haotu a si.