1 CHANRELNAK 23 - Lai (Hakha) Common Language Bible 2006

¹ Cun David cu a upa i a tar ngaingai tikah a fapa Solomon cu Israel mi siangpahrang ah a ser.

Levi Mi Le Tlangbawi Hna Rian Phawtnak

² David nih Israel mi haotu vialte tlangbawi hna le Levi mi hna kha a pumh hna.

³ Levi mi cu, kum sawm thum a timi le a cunglei kha an rel hna i an dihlak ah sang thum le thong riat an si.

⁴ David nih, “Hi hna chung hin sang hnih le thong li nih Bawipa innchung rianṭuan kha an ṭuanvo a si lai i thong ruk cu biaceihtu le bawi an si lai,

⁵ thong li cu kutka cawngtu an si lai i thangṭhatnak caah ka sermi hlasaknak thilri in thong li nih Bawipa kha thangṭhatnak an pek lai,” tiah a ti.

⁶ Cun annih cu David nih Levi fapa Gershom, Kohath le Merari hna ning khan an bu an bu cio in a ṭhen hna.

⁷ Gershom fapa hna cu Ladan le Shimei an si.

⁸ Ladan fapa hna: haotu bik Jehiel, le Zetham le Joel, pathum an si.

⁹ Shimei fapa hna: Shelomoth, Haziel, le Haran, pathum an si. Mah hna hi Ladan innchungkhar hna lu cio kha an si.

¹⁰ Shimei fapa hna: Jahath, Zina le Jeush le Beriah. Hi pali hna hi Shimei fapa an si.

¹¹ Haotu bik cu Jahath a si i a hun changtu cu Zizah a si; sihmanhsehlaw Jeush le Beriah cu fapa tampi an ngei lo, cucaah voi khat relnak ah pa pakhat i innchungkhar ah an cang.

¹² Kohath fapa hna: Amram, Izhar, Hebron, le Uzziel, pali an si.

¹³ Amram fapa hna: Aaron le Moses. Aaron cu amah le a fapa hna nih zungzal in Bawipa hmaiah zihmui kha an khangh i amah rian kha an ṭuan i amah min in zungzal in thluachuah peknak an chim nakhnga, Aaron cu a thiang bikmi thil hna kha pekchanh awkah thleidan a si.

¹⁴ Sihmanhsehlaw Pathian mi Moses i a fapa hna kha cu Levi mi phun chungah khan rel an si.

¹⁵ Moses fapa hna: Gershom le Eliezer.

¹⁶ Gershom fapa hna: haotu bik Shebuel.

¹⁷ Eliezer fapa hna: haotu bik Rehabiah; Eliezer nih fapa dang a ngei hna lo, sihmanhsehlaw Rehabiah fapa cu an tam ngaingai.

¹⁸ Izhar fapa hna: haotu bik Shelomith, pahnihnak ah Amariah,

¹⁹ pathumnak ah Jahaziel, palinak ah Jekameam.

²⁰ Uzziel fapa hna: haotu bik Mikah le a pahnihnak Isshiah.

²¹ Merari fapa hna: Mahli le Mushi. Mahli fapa hna: Eleazar le Kish.

²² Eleazar cu fapa hring loin a thi, fanu lawnglawng a ngeih hna; an rualchan Kish fapa hna nih khan an ṭhit hna.

²³ Mushi fapa hna: Mahli, Eder le Jeremoth, pathum an si.

²⁴ Mah hna hi Levi fapa hna, an pale chungkhar ning cio ah an si; annih cu an pa le chungkhar hna lu cio, Bawipa inn rian kha ṭuan awkah, min thlak a simi kum kul ri in a cunglei hna kha an si.

²⁵ Cucaah David nih hi bangin “Bawipa, Israel Pathian nih a mi cu daihnak a pek cang hna; cun Jerusalem ah zungzal in a um.

²⁶ Cucaah Levi mi hna nih puan biakinn kha siseh, a chung rianṭuannak ca i thilthuam si hna seh, an phorh a herh ti lo,” a ti;

²⁷ zeitintiah David bia a hmanung bik bangin, Levi mi kum kul ri in a cunglei hna cu mah zat hi an si.

²⁸ “Sihmanhsehlaw annih an rian cu Bawipa inn rianṭuannak i Aaron fapa hna bawmh kha a si lai, annih nih tual hna le innchung dal hna kha an zohkhenh lai, a thiangmi thil vialte kha an thianhhlimh lai. Pathian inn chung rian zeipaoh kha an ṭuan lai;

²⁹ cun hun camcinmi changreu le changvut thawinak ca i changvut le thilnu cawh lo changreu pan tete hna le rawhmi changreu thawinak le chiti he cawhmi thawinak hna timhtuahnak le a tam a tlawm lei tahnak ah siseh, a hmet a ngan lei tahnak ah siseh, annih nih an bawmh fawn hna lai.

³⁰ Cun zing fate in an dir lai i Bawipa kha an lawmh lai i an thangṭhat lai, cu bantuk ṭhiamṭhiam in zanlei zongah,

³¹ cun Bawipa sinah khangh thawinak hna kha sabbath ni ah siseh, thla thar ah siseh, puai ni ah siseh, cu zat in nan tuah awk a si tining khan Bawipa hmaiah pekchanh camcin a si fate annih nih cu bantuk ṭhiamṭhiam in an tuah lai.

³² Cuticun annih nih tonnak thlam le hmunthiang kha an zohkhenh hna lai i Bawipa inn rian ṭuannak ah khan an unau Aaron fapa hna kha an bawmh hna lai.”