1 CHANRELNAK 18 - Lai (Hakha) Common Language Bible 2006

David Nih A Pennak A Kauhter

¹ Cun mah hnuah cun David nih Filistin mi kha a tei hna i a tangchiah hna i Filistin mi hna kut chung cun Gath le a khuate hna kha a lak hna.

² Cun Moab kha a tei, Moab mi hna cu David sal ah an cang i ngunkhuai an pek.

³ David nih Zufrates tiva i a lungphun bunh awk i a kalpah ah Hamath lei i a ummi Zobah siangpahrang Hadadezer zong kha a tei.

⁴ Cun David nih amah sin khan rangleng thong khat, rangcung ralkap thong sarih, le ke ralkap sang hnih a tlaih hna i David nih leng hnuktu rang vialte kha an tha a pheh dih hna, sihmanhsehlaw rangleng za khat ca i a za ding lawnglawng kha a nganh hna.

⁵ Cun Damaskas khuami Siria mi nih khan Zobah siangpahrang Hadadezer kha bawmh awkah an rat tikah, David nih khan Siria mi cu sang hnih le thong hnih a rak thah hna.

⁶ Cun David nih Damaskas i Siria ah khan ralvengtu ralkapbu a chiah hna i Siria mi cu David sal ah an cang i ngunkhuai kha an pek. Cun Bawipa nih David cu a kalnak kip ah khan teinak a pek lengmang.

⁷ Cun Hadadezer sinum hna nih an i putmi sui phaw kha David nih a lak hna i Jerusalem ah a rak phorh hna.

⁸ Cun Hadadezer khua a simi Tibaath le Kun in David nih dar tampi a lak; mah cu cun Solomon nih khan dar hmaihum kha le tungpi hna kha le dar umkheng hna kha a ser hna.

⁹ Hamath siangpahrang Tou nih, Zobah siangpahrang Hadadezer ralkapbu kha David nih a ning piin a tei dih hna ti kha a theih tikah.

¹⁰ Hadadezer kha a doh i a tei caah amah cu va biakchawnh awk le va conglawmh awkah Siangpahrang David sinah khan a fapa Hadoram kha a hei thlah; zeitintiah Hadadezer nih khan Tou kha a rak doh lengmang tawn. Cun amah nih cun sui in sermi thilri a phunphun ngun in sermi a phunphun le dar in sermi a phunphun kha a kuat;

¹¹ mah thil hna zong cu Siangpahrang David nih a teimi miphun vialte hna, Edom, Moab, Ammon mi hna, Filistin mi hna le Amalek sinin lakmi sui le ngun hna he khan hmunkhat ah Bawipa sinah a pekchanh hna.

¹² Cun Zeruiah fapa Abishai nih khan Cite Nelrawn ah Edom mi sang khat le thong riat a thah hna.

¹³ Cun Edom ram chungah ralvengtu ralkapbu kha a chiah hna i Edom mi vialte cu David sal ah an cang. Cun Bawipa nih David cu a kalnak kip ah teinak a pek lengmang.

David Bawi Hna

¹⁴ Cucaah David nih Israel mi vialte cu a pen hna i a mi vialte cu biading le ruannak in a uk hna.

¹⁵ Cun Zeruiah fapa Joab cu ralkapbu haotu bik a si i Ahilud fapa Jehoshafat cu cazin ṭialtu a si;

¹⁶ cun Ahitub fapa Zadok le Abiathar fapa Ahimelek cu tlangbawi an si; cun Shavsha cu caṭialtu a si;

¹⁷ cun Jehoiada fapa Benaiah cu Khereth mi le Peleth mi hna cung i haotu a si i David fapa hna cu siangpahrang rian ah khuakhangtu upa bik an si.