1 CHANRELNAK 16 - Lai (Hakha) Common Language Bible 2006

¹ Cun Pathian kuang cu an luhpi i David nih a bunhpiakmi thlam chungah khan an chiah; cun Pathian hmaiah khangh thawinak le daihnak thawinak kha an pekchanh.

² Cun David nih khangh thawinak le daihnak thawinak pekchanh kha a dih tikah, mizapi cu Bawipa min in thluachuahnak a pek hna i,

³ Israel mi vialte cu nu he pa he changreu hlum khat le sa zam khat le mitsur car hlum khat cio a phawt hna.

⁴ Cuhleiah Levi mi a cheukhat cu Bawipa kuang hmai i rianṭuantu ah, Bawipa, Israel Pathian sinah thlacam awk le lawmh awk le thangṭhat awkah, a thiah hna.

⁵ An haotu bik cu Asaf a si, a hun dottu ah Zekhariah, Jeiel, Shemiramoth, Jehiel, Mattithiah, Eliab, Benaiah, Obededom le Jeiel an si, annih cu tingtang le thonglawi tumtu ding an si; Asaf cu sumsel tumtu ding a si,

⁶ cun tlangbawi Benaiah le Jahaziel cu Bawipa biakamnak kuang hmaiah muko a tum lengmang tu ding an si.

David Lawmhnak Thangṭhatnak Hla

⁷ Cun khi ni ah khan David nih Bawipa sin i lawmhnak hla sak awkah Asaf le a unau rual cu a thiah hna.

⁸ Bawipa sinah lunglawmhnak bia chim tuah u, a min kha au tuah u, Mi zakip kha a tuahnak hngalhter hna u!

⁹ Hla in hlawrh tuah u, hla in thangṭhat tuah u, Khuaruahhar a rianṭuannak vialte kha chim tuah u!

¹⁰ A min thiang cu sunparnak ah hmang u, Bawipa a kawlmi hna lung kha i lawm hna seh!

¹¹ Bawipa le a ṭhawnnak kha kawl tuah u, A hmai kha kawl lengmang tuah u!

¹² A tuahmi khuaruahhar rian le khuaruahharnak a tuahmi hna le Biakhiahnak a chimmi hna cu philh hlah u,

¹³ Maw a sal Abraham tefa hna, Jakob fapa a thimmi hna!

¹⁴ Amah cu Bawipa, kan Pathian a si; A biakhiahnak cu vawlei khuazakip ah a um.

¹⁵ A biakamnak cu a hngalh zungzal A fehtermi a bia cu chan thong khat tiang a philh lo;

¹⁶ Abraham he biakamnak a tuah, Isak sinah chiatser in bia a kam;

¹⁷ Jakob sinah nawlbia a fehter, Israel sinah zungzal hmunmi biakamnak a tuah;

¹⁸ “Nangmah sinah Kanaan ram cu ro caah, Na covo ah kan pek lai,” a ti.

¹⁹ Mi tlawmte an si i santlailo le khi ram chungah mipem an si i

²⁰ Miphun khat sinin phun khat sinah a vak i Ram khat in ramdang ah an kal tikah,

²¹ Ahohmanh annih kha a hremter hna lo; Anmah ruangah siangpahrang kha a sik hna,

²² “Chiti ka thuhmi hi tawng hna hlah u, Ka profet hna hi harnak pe hna hlah u,” a ti.

²³ Vawlei vialte hna, Bawipa sinah hla hun sa tuah u! Nifate in amah khamhnak kha chim tuah u.

²⁴ Miphun hna lakah a sunparnak kha thanh tuah u, Mi vialte hna lakah, khuaruahhar a tuahnak zong!

²⁵ Zeitintiah Bawipa cu a lianngan i fak piin thangṭhat awk a si, Mi hna pathian vialte hna nakin amah cu ṭih awk a si deuh.

²⁶ Zeitintiah mi hna pathian vialte cu siasal an si, Sihmanhsehlaw Bawipa nih van khi a ser hna.

²⁷ Upatnak le lianngannak cu a hmaiah an um, Ṭhawnnak le lawmhnak cu a hmun chungah an um.

²⁸ Maw mizakip chung i miphun vialte hna, Bawipa sinah pe ko u, Bawipa sinah sunparnak le ṭhawnnak pe ko u!

²⁹ Bawipa cu amah min he aa tlakmi sunparnak cu pe ko u, Pekchanh awk rak i put u law a hmaika ah ra chuak tuah u! Thuam thianghlim in i thuam in Bawipa cu bia tuah u,

³⁰ Vawlei vialte hna, amah hmaiah cun ther tuah u; Asi, vawlei cu fek tein a dir ko, aa hnin bal lai lo.

³¹ Van hna khi i lawm ko hna seh, vawlei hi a tha nuam seh, “Bawipa nih a pen,” tiah miphun kip sinah chim hna seh.

³² Rili le a chungah a ummi thil vialte awn hna seh, Lo le a chungah a ummi thil vialte kha i lawm hna seh!

³³ Khi tikah ramlak thingkung vialte cu Bawipa hmaiah lawmhnak in hla an sa lai, Zeitintiah vawlei kha biaceih awkah amah cu a ra.

³⁴ Bawipa cu lawm tuah u, zeitintiah amah cu a ṭha; Zeitintiah a fekmi a dawtnak cu zungzal in a hmun!

³⁵ “Maw kan khamhnak Pathian kan chanh law Miphun hna chungin kan pum law kan khamh tuah, Zeitintiah na min thiang cu kan lawmh i Na thangṭhatnak cu kan i chawr nakhnga

³⁶ Bawipa, Israel Pathian cu, zungzal in zungzal tiang thangṭhat si ko seh!” ti tuah u. Cun mi vialte nih, “Amen!” tiah an ti. Bawipa kha an thangṭhat.

Kuang Zohkhenhtu Levi Mi Thiahmi

³⁷ Cuticun David nih Asaf le a unau rual hna cu khika ah, Bawipa biakamnak kuang hmaiah cun, ni fate a herhnak bantukin rianṭuan zungzal awkah a chiahtak hna,

³⁸ Obededom le a unau rual sawm ruk le pariat zong kha; Jeduthun fapa Obededom le Hosah tu cu kutka cawngtu caah khan an si.

³⁹ Cun tlangbawi Zadok le a unau hna tlangbawi hna kha Gibeon i a ummi khuahrum bo i Bawipa puan biakinn hmaiah khan a chiahtak hna,

⁴⁰ Bawipa nih Israel mi nawl a pekmi hna phungbia chung i aa ṭialmi vialte ningin, annih nih zinglei he zanlei he khangh thawinak biakṭheng cungah khan Bawipa sin i khangh thawinak kha an pekchanh thluangthluan awk a si.

⁴¹ An sinah cun Heman le Jeduthun le, Bawipa cu a fekmi a dawtnak kha zungzal in a hmunh caah a sinah lawmhnak bia chim awk ca i thimmi hna le fiang tein min chimmi a cheu hna kha an um,

⁴² Heman le Jeduthun nih hlasaknak caah khan muko le sumsel an ngeih hna i hla thiang caah khan hlasaknak thilri an ngeih hna. Jeduthun fapa hna cu kutka cawngh kha an thiah hna.

⁴³ Cun mi vialte cu an inn cio ah an ṭin i David cu a inn ah a innchungkhar hna thluachuah pek awkah a kal.