1 CHANRELNAK 14 - Lai (Hakha) Common Language Bible 2006

Hiram Nih David Kha A Theihhngalh

¹ Cun Tair siangpahrang Hiram nih David kha lamkaltu le sidar thing le lungremh thiam le zungthiam hna zong kha amah cu inn sakpiak awkah a kuat hna.

² Cun David nih, Bawipa nih Israel mi cungah siangpahrang ah a ka fehter cang, ti le a mi Israel mi hna ruangah ka pennak cu sangpi ah hlorh a si cang ti kha a hngalh.

David Nih Jerusalem Ah A Hrinmi

³ Cun David nih Jerusalem ah khan nupi aa lak chap hna i David cu fapa tam chinchin le fanu tam chinchin a ngei.

⁴ Mah hna hi Jerusalem ah a hrinmi a fale hna min cu a si: Shammua, Shobab, Nathan, Solomon,

⁵ Ibhar, Elishua, Elpelet,

⁶ Nogah, Nefeg, Jafia,

⁷ Elishama, Beeliada, le Elifelet.

David Nih Filistin Mi A Tei Hna

⁸ Filistin mi nih David kha Israel vialte cung i siangpahrang ah chiti thuh a si cang ti kha an theih tikah, Filistin mi vialte cu David kawl ah khan an hung kal; cun mah cucu David nih a theih i annih doh awkah khan a chuak ve.

⁹ Cun Filistin mi cu an ra i Refaim nelrawn kha an hranh.

¹⁰ Cun David nih Pathian kha a hal i, “Filistin mi hna doh awkah ka hung kal lai maw? Annih cu ka kut chungah na ka pe hna hnga maw?” tiah a ti. Cun Bawipa nih amah cu. “Hung kal ko, annih cu na kut chungah kan pek hna lai,” tiah a ti.

¹¹ Cun Baal-perazim ah a hung kal i David nih khika ah a tei hna; cun David nih, “Pathian nih ka ral hna cu tilian aa sah phut bantukin a sah hna,” tiah a ti. Cucaah cuka hmun cu a min ah Baal-perazim ti a si.

¹² Cun khika ah an pathian hna kha an kaltak hna i David nih nawl a pek hna i an khangh hna.

¹³ Filistin mi hna nih cun nelrawn cu an hranh ṭhan hoi.

¹⁴ Cun David nih Pathian kha a hal ṭhan tikah, Pathian nih amah cu, “Na hung dawi hna hnga lo; i vel law balsam kung hna zawn khin chuahhnawh hna.

¹⁵ Cun balsam thing par hna i kal thawng na theih tikah, khi tikah raldohnak hmun ah cun va chuak tuah; Pathian cu na hmaiah, Filistin mi ralkapbu tuk awkah a kal cang,” tiah a ti.

¹⁶ Cun David nih Pathian nih nawl a pek bangin a tuah i Filistin ralkapbu cu Gibeon in Gezer tiang an thah hna.

¹⁷ Cun David minthannak nih cun ram vialte kha a cul dih i miphun vialte cungah amah ṭihnak kha Bawipa nih a tlunter.