1 CHANRELNAK 12 - Lai (Hakha) Common Language Bible 2006

Ziklag I David A Bawmtu Hna

¹ Kish fapa Saul ruang i David cu duhduh in aa chawh aa leh khawh lo lioah khan mah hna hi David sin i Ziklag khua ah a ummi a mi cu an si; annih hi ral lio i amah a bawmtu miṭhawng hna lakah khan an i tel ve.

² Li hman thiammi an si i thal kah siseh, lungherh cheh siseh, an orhlei kut he an kehlei kut he an thiam; annih cu Benjamin mi, Saul rualchan kha an si.

³ An haotu bik cu Ahiezer a si, a hun changtu cu Joash a si, an pahnih in Gibeah khuami Shemaah fapa an si; Azmaveth fapa Jeziel le Pelet zong; Berakah, Anathoth mi Jehu,

⁴ Gibeon mi Ishmaiah, amah cu sawm thum hna lakah miṭhawng a si i sawm thum hna cung i haotu a si; Jeremiah, Jahaziel, Johanan, Gederah mi Jozabad,

⁵ Eluzai, Jerimoth, Bealiah, Shemariah, Haruf mi Shefatiah,

⁶ Elkanah, Isshiah, Azrel, Joezer, le Jashobeam, mah hna hi Korath mi an si;

⁷ cun Gedor mi Jeroham fapa hna Joelah le Zebadiah.

⁸ Gad mi hna chungin a ṭhawng i a thiam ngaingaimi ralkap hna, phaw hman le fei hman a thiam ngaingaimi, an hmai chiandeih hmai a lo i tlang cung sazuk bantukin a mar a zaangmi hna kha David sinah ramlak i ralhruang ah khan an va kal.

⁹ Cu hna cu: Haotu bik Ezer, a pahnihnak Obadiah, pathumnak Eliab,

¹⁰ palinak Mishmannah, panganak Jeremiah,

¹¹ paruknak Attai, pasarihnak Eliel,

¹² pariatnak Johanan, pakuanak Elzabad,

¹³ pahranak Jeremiah, hleikhatnak Makbannai.

¹⁴ Hi Gad mi hna hi ralkap bawi an si, a hme deuh pawl hi za haotu an si i a ngan deuh pawl hi thong haotu an si.

¹⁵ Hi hna hi thla khatnak thla i Jordan tiva a kuang vialte a khah dih lio i a tantu, cun cu nelrawn chung i a ummi vialte nichuahlei le nitlaklei i a dawi dihtu kha an si.

¹⁶ Cun Benjamin mi tlawmpal le Judah mi tlawmpal cu David sinah ralhruang ah khan an ra.

¹⁷ Annih ton awkah khan David cu a va chuak i, “Hawikomhnak in keimah bawmh awkah nan rat a si ahcun, ka lung cu nannih sinah ṭhit chih a si lai; sihmanhsehlaw ka ral hna sinah, ka kut chungah zeihmanh sualnak a um lo nain, rawi awk i nan rat a si ahcun, kan pupa hna Pathian nih in hmu hna seh law in mawhchiat ko hna seh,” tiah a ti.

¹⁸ Khi tikah sawm thum hna lak i haotu bik Amasai cungah khan Thlarau a tlung i amah nih cun hi bangin a ti: “Kannih cu nangmah ta kan si, maw David; Maw Jesse fapa, nangmah sin tel kan si; Daihnak, daihnak cu na sinah um ko seh, Daihnak cu nangmah an bawmtu hna cungah um ko seh! Zeitintiah na Pathian nih an bawmh.” Khi tikah David nih tlun inn a onh hna i a ralkap hna haotu bawi ah khan a ser hna.

¹⁹ David cu Saul doh awkah Filistin mi hna he an rat tikah, Manasseh mi cheukhat cu a sinah khan an zam. A ngaingai ti ahcun, Filistin mi kha a bawm hna lo, zeicahtiah Filistin siangpahrang hna nih khan hmasa a bawipa Saul sinah khan a kan lei sual lai ti an phang i Ziklag ah an kirter.

²⁰ Anih cu Ziklag i a kal ah khan hi Manasseh mi hna hi a sin i an zam cu a si: Cu hna cu Adnah, Jozabad, Jediael, Michael, Jozabad, Elihu le Zillethai, Manasseh chung i a thong pawl haotu bik hna kha an si.

²¹ Annih nih David kha ralhranhtu bu hna doh kha an bawmh; zeitintiah annih cu miṭhawng ralṭha an si dih i ralkapbu haotu kha an si.

²² Ni fate ti awkin mi kha David sinah amah kha bawmh awkah an i fon i ralkapbu nganpi, Pathian ralkapbu bantuk ah a ralkapbu cu a cang.

Hebron Khua I David Ralkapbu

²³ Bawipa bia ningin, Saul pennak cu David kha pek awkah amah sinah Hebron khua ah a rami hriamnam a ngeimi ralkap hna an i cheuning cu mahtihin a si.

²⁴ Judah mi phaw le fei aa putmi hna cu hriamnam a ngeimi ralkap thong ruk le za riat an si.

²⁵ Simeon mi hna chungin raldohnak ca i ralṭhami thong sarih le za khat.

²⁶ Levi mi hna chungin, thong li le za ruk.

²⁷ Aaron innchungkhar chung mi bawi Jehoiada le amah sin i a ummi thong thum le za sarih.

²⁸ A ṭhawng i a ral a ṭhami tlangval Zadok le amah a pa innchungkhar chungin haotu pakul le pahnih.

²⁹ Benjamin mi Saul rual chan hna chungin, thong thum, hi hlanah hin cun a tam deuh cu Saul innchungkhar sinah khan an ṭang.

³⁰ Efraim mi chungin, sang hnih le za riat, an pale innchungkhar cio ah miṭhawng, ralṭha le minthang an si.

³¹ Manasseh phun cheu chungin sang khat le thong riat, annih cu rat i David kha siangpahrang i ser awkah fiang tein min chim an si.

³² Issakhar chungin, caan a hngalthiammi le Israel nih zeidah a tuah awk a si ti a hngalthiammi haotu bik za hnih hna le anmah nih an ukmi hna an phun hawi vialte.

³³ Jebulun chungin, a fel taktakmi ralkap sang nga, annih cu David kha tinhmi pakhatte he bawmh awkah ral hriamnam in tling tein an i thuam.

³⁴ Naftali chungin, ral bawi thong khat, an sinah cun ralkap phaw le fei he aa thuammi sang thum le thong sarih an um.

³⁵ Dan mi chungin, raltuk awk i aa thuammi sang hnih le thong riat le za ruk.

³⁶ Asher chungin, a fel taktakmi, raltuk awk i timh cia in a ummi sang li.

³⁷ Jordan khattelei ral i a ummi Reuben mi hna le Gad mi hna le Manasseh phun cheu hna chungin, sing khat le sang hnih, raldohnak hriamnam in tling tein aa thuammi.

³⁸ Hi ralkap vialte hna, raldohnak hmun i chuah awkah timh cia tein a ummi hna cu, David kha Israel siangpahrang ah kan ser hrimhrim lai tiah i tim in Hebron ah an ra; cu bantuk ṭhiamṭhiam in Israel mi vialte hna zong cu David kha siangpahrang i ser awkah lungkhat tein an um.

³⁹ Annih cu David sinah khan ni thum an um i an ei i an ding, zeicahtiah an unau hna nih khan an rak timhtuahpiak hna.

⁴⁰ Cun an innpa hna zong nih khan, Issakhar le Zebulun le Naftali ram hna tiang i a ummi hna nih khan, laa in le kalauk in le khacer in le cawtum in rawl le ei awk phun tling, theipi car hlum hna, mitsur car bor hna, mitsur hang, chiti, cawtum hna le tuu hna kha an rak phorh hna, zeicahtiah Israel ram chungah lawmhnak a um.