1JOHAN 1 - Lai (Hakha) Common Language Bible 2006

Nunnak Bia

¹ A hramthawk tein a rak um cangmi nunnak Bia kong kha ca in kan in kuat hna: cucu kan hna in kan theihmi le kan mit in kan hmuhmi kha a si; asi, kan mit in kan rak hmuh i kan kut in kan rak tawngh.

² Cu nunnak cu hmuh khawhmi i a hung can tikah kannih nih khan kan rak hmuh; cucaah cu kong cu kannih nih kan chim i Pa he a rak um ṭimi zungzal nunnak, kannih sinah langhter a simi kong kha kan in chimh hna.

³ Kannih nih kan hmuhmi le kan theihmi cu nannih zong kha kan in chimh hna, zeicahtiah Pa le a Fapa Jesuh Khrih he hawikomhnak kan ngeihmi chungah khan nan i tel khawh ve nakhnga kan duh.

⁴ Hi ca kan in kuat hna cu kan i lawmhnak kha a tlin nakhnga caah a si.

Pathian Cu Ceunak A Si

⁵ Fapa sinin kan theih i nannih kan in thanhmi hna bia cu hihi a si: Pathian cu ceunak a si i a chungah muihnak zeihmanh a um lo.

⁶ Cucaah kannih nih amah he hawikomhnak kan ngei kan ti i muihnak chung i kan um ko ṭung ahcun, kan bia in siseh, kan tuahnak in siseh, lih kan chim a si.

⁷ Sihmanhsehlaw ceunak chung i a um bantukin kannih zong ceunak chung i kan um ahcun pakhat le pakhat hawikomhnak kan ngei i a Fapa Jesuh thi nih khan kan sualnak vialte in a kan thianh.

⁸ Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo.

⁹ Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai.

¹⁰ Asinain kan sual lo kan ti ahcun Pathian cu lihchim ah kan ser i a bia cu kan chungah a um lo.