زَڢَنِيَ 3 - أَتَّوْرَتْ دَ أَنَّبَاوَا

حُكُنْثِ عَكَنْ شُوغَبَنِّنْ يَهُودَ

¹ كَيْتُوانْكَ، كَيْ بِرْنِ مَيْ تَيَرْوَ، مَيْ ڧَظَنْتَا، مَيْيِ وَمُتَنٜىٰنْسَ دَنِّيَ!‏

² بَايَ كَسَ كُنّٜىٰ غَ كُواْوَ، بَلّٜىٰ مَا يَكَرْٻِ ڠَرَ؞ بَيْ دُواْغَضَ غَ يَهْوٜىٰهْ بَ، بَيْ مَا كُسَنْثِ اللَّهْ نْسَ بَ؞

³ شُوغَبَنِّنْسَ ذَاكُواْكِ نٜىٰ مَاسُ رُورِ، أَلْڧَلَنْسَ ݣَرْكٜىٰتَيْ نٜىٰ مَاسُ ڢِتُواْوَ دَ يَمَّ، بَاسَ بَرِنْ كُواْمٜىٰ حَرْ غَرِ يَوَايٜىٰ؞

⁴ أَنَّبَاوَنْسَ یَنْ بَنْظَنٜىٰ، مَاسُثِنْ أَمَانَ؞ ڢِرِسْتُواْثِنْسَ كُمَ سُنْيِ بَنْظَ دَ أَبِنْدَ يَكٜىٰ مَيْ ڟَرْكِے؞ سُنْ كُمَ ٻَاتَ كُواْيَرْوَرْ اللَّهْ؞

⁵ يَهْوٜىٰهْ وَنْدَ يَكٜىٰ ثِكِنْ بِرْنِنْ، مَيْ أَدَلْثِے نٜىٰ، بَايَ كُسْكُرٜىٰ؞ كُواْوَثٜىٰ سَاڢِيَ يَكَنْ نُونَ أَدَلْثِنْسَ، بَايَ كَاسَوَ كُواْوَثٜىٰ سَاڢِيَ؞ عَمَّا مَرَرْ أَدَلْثِے بَيْ سَنْ كُنْيَابَ؞

⁶ يَهْوٜىٰهْ يَثٜىٰ، ‏«‏نَارِغَا نَايَنْكٜىٰ ڧَبِيلُنْ دُونِيَا، وُرَارٜىٰنْ ٻُيَنْسُ سُنْ لَلَثٜىٰ؞ نَا كُمَ لَلَتَرْدَ هَنْيُواْيِنْسُ، بَا مَيْ تَڢِيَ عَكَنْسُ؞ أَنْ مَيْدَ بِرَنٜىٰنْسُ كُڢَيْ حَرْ مَا بَعَضَغٜىٰ مُتُمْبَ، بَابُ كُواْوَ عَثِكِ؞

⁷ نَثٜىٰ، لَلَّيْ مُتَنٜىٰنَ ذَاسُجِڟُواْرُواْنَ، ذَاسُ كَرْٻِ ڠَرَ، بَذَاسُ ڧَارَ كَوْ دَ حَنْكَلِنْسُبَ، دَغَ دُكَنْ أَبِنْدَ نَجَا مُسُ كُنّٜىٰ؞ عَمَّا سُكَڧَارَ يِنْ مَرْمَرِ سُڧَظَنْتَرْدَ أَيُّكَنْسُ؞

⁸ سَبُواْدَ حَكَ نِے يَهْوٜىٰهْ نَثٜىٰ، ‏‹‏كُجِرَا رَانَرْ دَ ذَنْ تَاشِ إِنْيِ زَرْغِنْ أَلْعُمَّيْ؞ غَمَا نَايِ نِيَّ ذَنْ تَتَّارَ ڧَبِيلُ سُذَمَ بَبَّنْ تَارُوانْ مُلْكُواْكِ، دُواْمِنْ إِنْ ظُبَ مُسُ ڢُشِنَ مَيْ ذَاڢِ دَ دُكَنْ هَوْشِنَ؞ غَمَا كَمَرْ ڢُشِنْ مُتُمْ مَيْ كِيشِنْ ڧَوْنَ، ڢُشِنَ ذَيْ كُنُّ دَ ذَاڢِ، دُكَنْ دُونِيَا كُوَ ذَاتَ ڧُواْنٜىٰ؞›‏ »‏

تُوبَرْ ڧَبِيلُ

⁹ ‏«‏عِ، أَ لُواْكَثِنْ ذَنْ ثَنْجَ إِرِنْ مَغَنَرْ ڧَبِيلُ ذُوَا ڟَبْتَاثِّيَرْ مَغَنَ، دُكَنْسُ ذَاسُيِ كِرَا غَ سُونَنْ يَهْوٜىٰهْ، سُكُمَ بَوْتَا مَسَ دَ ذُوثِيَا طَيَ؞

¹⁰ تُنْدَغَ نٜىٰسَنْ يَنْكِنْ إِتِيُواْڢِيَ، مَاسُ يِمِنِ سُجَّدَ، مُتَنٜىٰنْ ذُوثِيَاتَ دَسُكٜىٰ أَوَرْوَڟٜىٰ ذَاسُ كَٰوُاْ مِنِ هَدَايَ؞»‏

¹¹ ‏«‏أَ رَانَرْ نَنْ بَذَاعَ كُنْيَتَرْ دَكُو بَ، سَبُواْدَ أَيُّكَنْ تَاوَيٜىٰنْ دَ كُنْيِ مِنِ؞ غَمَا ذَنْ ڢِتَرْدَ مَاسُ طَغَ كَيْ دَ مَاسُ تَاڧَمَ دَغَ ثِكِنْكُ؞ بَذَاكُ ڧَارَ طَغَ كَيْ عَبَبَّنْ تُدُنَ مَيْ ڟَرْكِے بَ؞

¹² ذَنْ كُوَ بَرْ مُتَنٜىٰ مَاسُ سَوْڧِنْ كَيْ دَ مَرَسَ ڧَرْڢِے عَثِكِنْكُ، ذَاسُ نٜىٰمِ وُرِنْ ٻُيَ أَوُرِنْ يَهْوٜىٰهْ؞

¹³ ضَغُواْوَرْ جَمَعَرْ إِسْرَٰٓءِيلَ بَذَاسُ سَاكٜىٰ عَيْكَتَ مُغُنْتَا بَ، بَذَاسُ كُمَ ڢَطِ ڧَضْيَابَ، بَذَاعَ سَامِ ڧَضْيَا عَبَاكِنْسُبَ كُواْ رُوطُ أَ هَرْشٜىٰنْسُبَ؞ ذَاسُيِ كِيوُاْ، سُݣُونْتَ بَاوَنْدَ ذَيْ ڟُواْرَتَرْ دَسُو؞»‏

وَاڧَرْ مُرْنَ

¹⁴ ‏«‏رٜىٰرَ دَ ڧَرْڢِے، يَا كٜىٰ ذُوثِيَاتَ سِهِيُواْنَ!‏ تَادَ مُرْيَ، يَا إِسْرَٰٓءِيلَ!‏ يِمُرْنَ، يِڢَضٍ ثِكِ دَ دُكَنْ ذُوثِيَارْكِ، يَا كٜىٰ ذُوثِيَاتَ عُرُوشَلِيمَ!‏

¹⁵ يَهْوٜىٰهْ يَا كَوَرْدَ حُكُنْثِ دَغَ كَنْكِ، يَكُواْرِ أَبُواْكَنْ غَابَنْكِ؞ يَهْوٜىٰهْ سَرْكِنْ إِسْرَٰٓءِيلَ يَنَ ڟَكِيَرْكِ، بَذَاكِ ڧَارَ جِنْ ڟُواْرُوانْ مَسِيڢَبَ؞

¹⁶ أَ رَانَرْ نَنْ ذَاعَ ثٜىٰ وَ عُرُوشَلِيمَ، ‏‹‏كَدَ كِجِڟُواْرُواْ، يَا سِهِيُواْنَ، كَدَ حَنُّوَنْكِ سُيِ سَنْيِ؞

¹⁷ يَهْوٜىٰهْ اللَّهْ نْكِ يَنَ ڟَكِيَرْكِ، مَيْ يَاڧِ نٜىٰ مَيْ بَادَ نَصَرَا؞ ذَيْ يِڢَضٍ ثِكِ يَيِ مُرْنَ عَكَنْكِ، ذَيْسَابُنْتَكِ سَبُواْدَ ڧَوْنَرْسَ، ذَيْ رٜىٰرَ وَاڧَرْ مُرْنَ دَ ڧَرْڢِے عَكَنْكِ،

¹⁸ كَمَرْ يَدَّ عَكَنْيِ أَ رَانَرْ بِكِ؞›‏ »‏ ‏«‏ذَنْ كَوَرْدَ مَسِيڢَ دَغَ غَرٜىٰكُ، بَذَاكُ ڧَارَ شَنْ كُنْيَرْتَبَ؞

كُواْمُواْوَرْ یَنْ بَوْتَا

¹⁹ غَاشِ، أَوَنَّنْ لُواْكَثِ ذَنْ حُكُنْتَ دُكَنْ مَاسُ مُكُ دَنِّيَ؞ ذَنْ كُمَ ثٜىٰثِ غُرْغُ، إِنْ تَتَّارَ وَطَنْدَ عَكَ كُواْرَ، ذَنْ مَيْدَسُو أَبِنْ يَبُواْ إِنْكُمَ سَا سُيِ سُونَ، أَدُكَنْ وُرَارٜىٰنْ دَ سُكَشَا كُنْيَا؞

²⁰ أَوَنَّنْ لُواْكَثِ ذَنْ كَٰوُاْكُ غِدَا، أَ لُواْكَثِنْدَ نَتَتَّرَاكُ؞ عِ، ذَنْسَا كُيِ سُونَ كُسَامِ يَبُواْ عَثِكِنْ دُكَنْ ڧَبِيلُنْ دُونِيَا، سَعَدَّ نَمَيَرْ مُكُ دَ أَلْبَرْكُنْكُ كُنَ غَنِ دَ عِدُوانْكُ؞ نِے يَهْوٜىٰهْ نَا ڢَطَا؞»‏