زَكَرِيَّا 8 - أَتَّوْرَتْ دَ أَنَّبَاوَا

أَلْڧَوَرِنْ أَلْبَرْكَ غَ عُرُوشَلِيمَ

¹ يَهْوٜىٰهْ مَيْ ضُنْدُنَا يَسَاكٜىٰيِنْ مَغَنَ دَنِے ثٜىٰوَ

² ‏«‏إِنْجِ يَهْوٜىٰهْ مَيْ ضُنْدُنَا، ‏‹‏إِنَدَ ثِكَكِّيَرْ ڧَوْنَ عَكَنْ تُدُنْ سِهِيُواْنَ، حَرْ إِنَدَ ذَاڢِنْ ڢُشِے عَكَنْ أَبُواْكَنْ غَابَنْتَ؞›‏

³ ‏«‏إِنْجِ يَهْوٜىٰهْ، ‏‹‏ذَنْ كُواْمَ تُدُنْ سِهِيُواْنَ، إِنْيِ ذَمَ أَڟَكِيَرْ بِرْنِنْ عُرُوشَلِيمَ؞ ذَاعَ ثٜىٰ دَ عُرُوشَلِيمَ بِرْنِ مَيْ أَمِنْثِ، بَبَّنْ تُدُنْ يَهْوٜىٰهْ مَيْ ضُنْدُنَا ذَاعَ ثٜىٰ دَشِ بَبَّنْ تُدُ مَيْ ڟَرْكِے؞›‏

⁴ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏ڟُواْڢَڢِّ، مَظَا دَ مَاتَا، ذَاسُ سَاكٜىٰ ظَوْنَاوَا عَتِيتُنَنْ عُرُوشَلِيمَ، كُواْوَ دَ سَنْدَنْ تَڢِيَرْسَ أَ حَنُّ سَبُواْدَ يَوَنْ ڟُوڢَ؞

⁵ تِتُنَنْ بِرْنِنْ ذَاسُثِكَ دَ يَارَا، ڧأَنَانً يَارَا مَظَا دَ مَاتَا سُنَ وَسَ؞›‏

⁶ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏عِدَنْ وَنَّنْ أَبُ مَيْ وُيَ نٜىٰ أَغَرٜىٰكُ، كُو دَ كُكٜىٰ ضَغُواْوَرْ جَمَعَتَ عَثِكِنْ وَطَنَّنْ ݣُونَكِے، أَغَرٜىٰنِ بَ أَبُ مَيْ وُيَ بَنٜىٰ!‏ نِے يَهْوٜىٰهْ مَيْ ضُنْدُنَا نَا ڢَطَا؞›‏

⁷ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏ذَنْ ثٜىٰثِ مُتَنٜىٰنَ دَغَ ڧَسَاشٜىٰنْ بَوْتَا، دَغَ ڧَسَاشٜىٰنْ غَبَسْ دَ نَيَمَّ

⁸ ذَنْ دَاوُاْ دَسُو سُذَوْنَ أَ عُرُوشَلِيمَ؞ ذَاسُ ذَمَ جَمَعَتَ، ذَاسُ ذَمَ مُتَنٜىٰنَ، نِے ذَنْ ذَمَ اللَّهْ نْسُ مَيْ أَدَلْثِے، اللَّهْ نْسُ مَيْ أَمِنْثِ؞›‏ »‏

⁹ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏كُيِ ڧَرْڢِنْ حَلِ دَ ڨُوذُواْ، كُو دَ كُكٜىٰ جِنْ مَغَنَرْ نَنْ يَوْ؞ أَنَّبَاوَنَ سُنْيِ مَغَنَرْ نَنْ أَ لُواْكَثِنْ دَ عَكَ كَڢَ تُوشٜىٰنْ سَاكٜىٰ غِنَا غِدَانَ، وَتُواْ هَيْكَلِنَ؞

¹⁰ كَاڢِنْ ݣُونَكِنْ ثَنْ نَغِنِ، بَابُ أَلْبَشِ غَ مُتُمْ، بَابُ لَادَنْ عَيْكِ غَ دَبَّ؞ بَابُ سَلَمَ غَ مَيْ ڢِتَ دَ شِغَ عَڧَسَرْ سَبُواْدَ أَبُواْكَنْ غَابَا؞ غَمَا نَا سَا دُكَنْسُ سُنَ غَابَادَ جُونَ؞

¹¹ عَمَّا يَنْذُ بَذَنْيِ دَ ضَغُواْوَرْ جَمَعَتَ كَمَرْ يَدَّ نَيِ عَݣُونَكِنْ دَا بَ، نِے يَهْوٜىٰهْ مَيْ ضُنْدُنَا نَا ڢَطَا؞

¹² غَمَا ذَاعَيِ شُوكَ ثِكِنْ ݣُونْثِيَرْ رَيْ؞ عِتَتُوَنْ إِنَبِے ذَاسُ بَادَ یَیَ، ڧَسَا كُمَ تَبَادَ أَمْڢَانِنْتَ، سَمَ كُمَ يَبَادَ رَٻَ؞ ذَنْ كُوَ سَا ضَغُواْوَرْ جَمَعَتَ سُمَلَّكِ وَطَنَّنْ أَلْبَرْكُ؞

¹³ يَا كُو غِدَنْ يَهُودَ دَ نَ إِسْرَٰٓءِيلَ!‏ كَمَرْ يَدَّ كُكَ ذَمَ لَعَنَ عَثِكِنْ سَوْرَنْ ڧَبِيلُ، حَكَمَا ذَنْثٜىٰثٜىٰكُ، ذَاكُ كُوَ ذَمَ أَلْبَرْكَ أَغَرٜىٰسُ؞ كَدَ كُجِڟُواْرُواْ، عَمَّا كُيِ ڧَرْڢِنْ حَلِ دَ ڨُوذُواْ؞›‏

¹⁴ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏كَمَرْ يَدَّ نَيِ نُڢِ إِنْ حُكُنْتَكُ لُواْكَثِنْ دَ كَاكَنِّنْكُ سُكَتَادَ ڢُشِنَ، بَنْ كُوَ دَيْنَبَ،

¹⁵ حَكَنَنْ مَا نَيِ نُڢِ إِنْ عَيْكَ دَ أَلْحٜىٰرِ غَ عُرُوشَلِيمَ دَ غِدَنْ يَهُودَ عَݣُونَكِنْنَنْ؞ سَبُواْدَ حَكَ كَدَ كُجِڟُواْرُواْ؞

¹⁶ غَا أَبُبُوَنْ دَ ذَاكُيِ؞ كُواْوَنّٜىٰنْكُ يَدِنْ‌غَ ڢَطَرْ وَمَڨُوبْثِنْسَ غَسْكِيَ؞ أَوُرَارٜىٰنْ شَرِيعَرْكُ كُدِنْ‌غَ يِنْ غَسْكِيَ دَ أَدَلْثِے، وَنْدَ ذَيْ كَٰوُاْ ذَمَنْ سَلَمَ؞

¹⁷ كَدَ وَنِنْكُ يَيِ تُنَانِنْ مُغُنْتَا أَ ذُوثِيَارْسَ غَمٜىٰدَ مَڨُوبْثِنْسَ؞ كَدَ كُمَ كُيِ ضَنْڟُوَارْ ڧَضْيَا؞ غَمَا نِے إِنَڧِنْ دُكَنْ إِرِنْ أَبُبُوَنَّنْ، نِے يَهْوٜىٰهْ نَا ڢَطَا؞›‏ »‏

أَمْسَ عَكَنْ تَمْبَيَ غَمٜىٰدَ أَظُمِ

¹⁸ أَنَانً كُمَ سَيْ يَهْوٜىٰهْ مَيْ ضُنْدُنَا يَيِ مَغَنَ دَنِے ثٜىٰوَ

¹⁹ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏أَظُمِ نَوَتَنْ حُطُ دَ نَوَتَنْ بِيَرْ دَ نَوَتَنْ بَݣَويْ دَ نَوَتَنْ غُواْمَ، يَنْذُ ذَاسُ ذَمَ لُواْكَتَنْ مُرْنَ دَ ڢَضٍ ثِكِ؞ ذَاسُ ذَمَ بِكٍ ڢَضٍ ثِكِ غَ دُكَنْ غِدَنْ يَهُودَ؞ سَبُواْدَ حَكَ، سَيْ كُڧَوْنَثِ غَسْكِيَ دَ ذَمَنْ سَلَمَ؞›‏ »‏

دُكَنْ ڧَبِيلُ ذَاسُيِ مَرْمَرِنْ يَهْوٜىٰهْ

²⁰ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏ڧَبِيلُنْ دُونِيَا دَ مَذَوْنَنْ بِرَنٜىٰ مَاسُيَوَ ذَاسُذُواْ عُرُوشَلِيمَ؞

²¹ مَذَوْنَنْ وَنِ بِرْنِ ذَاسُ تَڢِے وُرِنْ مَذَوْنَنْ وَنِ بِرْنِ، سُثٜىٰمُسُ ‏«‏ذُواْ مُتَڢِے يَنْذُنَّنْ، مُنٜىٰمِ ڢُسْكَرْ يَهْوٜىٰهْ مُكُمَ ضُواْڧِ أَلْحٜىٰرِ دَغَ يَهْوٜىٰهْ مَيْ ضُنْدُنَا؞ مُو دَكَنْمُ ذَامُ تَڢِے؞»‏

²² ڧَبِيلُ مَاسُيَوَ دَ مُتَنٜىٰنْ مَنْيَنْ ڧَسَاشٜىٰ ذَاسُذُواْ نٜىٰمَنْ ڢُسْكَرْ يَهْوٜىٰهْ مَيْ ضُنْدُنَا عَثِكِنْ عُرُوشَلِيمَ، ذَاسُ كُمَ ضُواْڧِ أَلْحٜىٰرِ دَغَ غَرٜىٰشِ؞›‏

²³ ‏«‏إِنْجِ يَهْوٜىٰهْ مَيْ ضُنْدُنَا، ‏‹‏أَوَطَنَّنْ ݣُونَكِے مُتُمْ غُواْمَ ذَاسُ كَامَ حَنُّنْ رِغَرْ مُتُمِنْ يَهُودَ؞ مُتَنٜىٰنَّنْ ذَاسُذُواْ دَغَ كُواْوَنٜىٰ يَرٜىٰ نَكُواْوَثٜىٰ أَلْعُمَّ سُنَ ثٜىٰوَ ‏«‏كَبَرْمُ مُبِيكَ غَمَا مُنْجِ ثٜىٰوَ اللَّهْ يَنَ تَرٜىٰدَكُو؞»‏ ›‏ »‏