زَكَرِيَّا 12 - أَتَّوْرَتْ دَ أَنَّبَاوَا

ذَاعَ ثٜىٰثِ عَكُمَ سَابُنْتَا عُرُوشَلِيمَ

¹ غَا سَڧُواْ دَغَ يَهْوٜىٰهْ غَمٜىٰدَ إِسْرَٰٓءِيلَ؞ إِنْجِ يَهْوٜىٰهْ، وَنْدَ يَشِمْڢِطَا سَمَّيْ، يَكَڢَ تُوشٜىٰنْ دُونِيَا، يَكُمَ صِڢَّتَا مُتُمْ يَهُورَ مَسَ نُمْڢَشِنْ رَيْ؞

² ‏«‏غَاشِ، ذَنْسَا عُرُوشَلِيمَ تَذَمَ كَمَرْ ݣُوڢْ نَضُوً إِنَبِے مَيْسَا جِرِ غَ دُكَنْ ڧَبِيلُنْ دَ سُكَ كٜىٰوَيٜىٰتَ؞ سَعَدَّ سُواْجُواْجِنْسُ سُكَ كٜىٰوَيٜىٰ عُرُوشَلِيمَ دُواْمِنْ يَاڧِ، يَاڧِنْ ذَيْ كُمَ شَاڢِ يَهُودَ؞

³ أَ رَانَرْ نَنْ ذَنْسَا عُرُوشَلِيمَ تَذَمَ كَمَرْ ڧَتُوانْ دُوڟٜىٰ مَيْ نَوْيِ غَ دُكَنْ ڧَبِيلُ؞ دُكْ وَنْدَ يَيِ ڧُواْڧَرِنْ طَغَ شِ، دُوڟٜىٰنْ ذَيْ نِڧَ شِ؞ دُكَنْ ڧَبِيلُنْ دُونِيَا ذَاسُ كٜىٰوَيٜىٰتَ دُواْمِنْ سُيِ غَابَادَ عِتَ؞»‏

⁴ إِنْجِ يَهْوٜىٰهْ ‏«‏أَ رَانَرْ نَنْ ذَنْسَا كُواْوَنٜىٰ دُواْكِنْ أَبُواْكَنْ غَابَا يَضِكِثِے، مَيْ هَوَنْسَ كُمَ يَهَوْكَثٜىٰ؞ عَمَّا ذَنْ كَڢَ عِدَنُونَ عَكَنْ غِدَنْ يَهُودَ، سَعَدَّ نَسَا كُواْوَنٜىٰ دُواْكِ نَڧَبِيلُنْ يَذَمَ مَكَهُواْ؞

⁵ سَعَنً شُوغَبَنِّنْ يَهُودَ ذَاسُثٜىٰ أَ ظُكَاتَنْسُ، ‏‹‏مَذَوْنَنْ عُرُوشَلِيمَ سُنْ سَامِ ڧَرْڢِے ثِكِنْ اللَّهْ نْسُ، يَهْوٜىٰهْ مَيْ ضُنْدُنَا؞›‏

⁶ ‏«‏أَ رَانَرْ نَنْ ذَنْسَا دَنْ‌غُواْغِنْ يَهُودَ سُذَمَ كَمَرْ سَنْدَا مَيْ وُتَا كُسَدَ تُلِنْ إِتَاثٜىٰنْ وُتَا، كُواْ كَمَرْ هَرْشٜىٰنْ وُتَا أَدَمٍ حَڟِ؞ ذَاسُثِنْيٜىٰ دُكَنْ ڧَبِيلُنْ دَ سُكَ كٜىٰوَيٜىٰسُ هَغُ دَ دَامَ، عَمَّا بَابُ أَبِنْدَ ذَيْ تَٻَ مُتَنٜىٰنْ عُرُوشَلِيمَ؞

⁷ ‏«‏نِے يَهْوٜىٰهْ دَ ڢَرْكُواْ ذَنْ ثٜىٰثِ سُواْجُواْجِنْ يَهُودَ، دُواْمِنْ كَدَ دَرَجَرْ غِدَنْ دَاوُدَ دَ دَرَجَرْ مَذَوْنَنْ عُرُوشَلِيمَ تَڢِے دَرَجَ تَسَوْرَنْ مُتَنٜىٰنْ يَهُودَ؞

⁸ أَ رَانَرْ نَنْ نِے يَهْوٜىٰهْ ذَنْ كِيَايٜىٰ مَذَوْنَنْ عُرُوشَلِيمَ؞ مُتُمِنْدَ يَڢِ رَشِنْ ڧَرْڢِے عَثِكِنْسُ ذَيْ ذَمَ مَيْ ڧَرْڢِے كَمَرْ دَاوُدَ؞ ذُرِيَرْ دَاوُدَ كُمَ ذَاسُ شُوغَبَنْثٜىٰسُ كَمَرْ مَلاَىِٕكَنَ، كَمَرْ نِے اللَّهْ دَ كَيْنَ؞

⁹ أَ رَانَرْ نَنْ كُمَ ذَنْ تَبَّتَا نَهَلَّكَ دُكَنْ أَلْعُمَّنْ دَ سُكَذُواْ سُيِ يَاڧِ دَ عُرُوشَلِيمَ؞»‏

كُوكَا سَبُواْدَ وَنْدَ أَنْ سُواْكٜىٰ شِ

¹⁰ ‏«‏ذَنْ ظُبَ وَ ذُرِيَرْ دَاوُدَ دَ مَذَوْنَنْ عُرُوشَلِيمَ رُوحٌ تَوْسَيِ دَ نَأَدُّعَ؞ ذَاسُ دُوبٜىٰنِ، نِے وَنْدَ سُكَ سُواْكَ، سَعَنً ذَاسُيِ كُوكَا دُواْمِنَ كَمَرْ وَطَنْدَ عَكَيِ مُسُ مُتُوَرْ طَنْ ڢَارِنْسُ؞

¹¹ أَ رَانَرْ نَنْ ذَاعَيِ كُوكَا سُواْسَيْ أَ عُرُوشَلِيمَ كَمَرْ إِرِنْ كُوكَنْ دَ عَكَيِ وَ هَدَدْ رِمُّوانْ أَ ڢِيلَيٜىٰنْ مٜىٰغِدُّواْ؞

¹² ‏«‏ڧَسَرْ إِسْرَٰٓءِيلَ ذَاتَيِ كُوكَا، كُواْوَنٜىٰ عِيَلِ ذَاسُ وَارٜىٰ كَنْسُ؞ عِيَلِنْ غِدَنْ دَاوُدَ ذَاسُ وَارٜىٰ كَنْسُ، مَاتَنْسُ عَكٜىٰٻٜىٰ؞ عِيَلِنْ غِدَنْ نَتَنْ ذَاسُ وَارٜىٰ كَنْسُ، مَاتَنْسُ عَكٜىٰٻٜىٰ؞

¹³ عِيَلِنْ غِدَنْ لَوِ ذَاسُ وَارٜىٰ كَنْسُ، مَاتَنْسُ عَكٜىٰٻٜىٰ؞ عِيَلِنْ غِدَنْ شِمٜىٰيِ ذَاسُ وَارٜىٰ كَنْسُ، مَاتَنْسُ عَكٜىٰٻٜىٰ؞

¹⁴ دُكَنْ سَوْرَنْ عِيَلَنْ دَ سُكَ رَغُ، كُواْوَنٜىٰ عِيَلِ ذَاسُ وَارٜىٰ كَنْسُ، مَاتَنْسُ كُمَ عَكٜىٰٻٜىٰ؞»‏