زَكَرِيَّا 11 - أَتَّوْرَتْ دَ أَنَّبَاوَا

يَهْوٜىٰهْ ذَيْ هَلَّكَ أَبُواْكَنْ غَابَنْ إِسْرَٰٓءِيلَ

¹ يَا ڧَسَرْ لٜىٰبَنُوانْ، كِبُوطٜىٰ ڧُواْڢُواْڢِنْكِ، دُواْمِنْ وُتَا تَثِنْيٜىٰ عِتَتُوَنْ سٜىٰدَ نَاكِ!‏

² يَا إِتَاثٜىٰنْ ڢِرْ، يِكُوكَا غَمَا إِتَاثٜىٰنْ سٜىٰدَ يَڢَاطِ، غَمَا أَنْهَلَّكَ عِتَتُوَ مَاسُ دَرَجَ!‏ يَا كُو عِتَتُوَنْ بَشَنْ مَاسُ ڧَرْڢِے، يِكُوكَا غَمَا بَبَّنْ كُرْمِ يَڢَاطِ!‏

³ جِ مُرْيَرْ كُوكَنْ مَكِيَايَ، غَمَا أَنْٻَاتَ مُسُ دَرَجَرْسُ!‏ جِ مُرْيَرْ كُوكَنْ ذَاكُواْكِ، غَمَا أَنْهَلَّكَ دَاجِنْ يُواْدَنْ!‏

مَكِيَايَ غُدَا بِيُ

⁴ إِنْجِ يَهْوٜىٰهْ اللَّهْ نَا ‏«‏يِكِيوُانْ غَرْكٜىٰنْ تُمَكِنْ دَ عَكَ ڧَدَّرَ ذَاعَ يَنْكَ؞

⁵ مَاسُ سَيٜىٰنْ تُمَكِنْ سُكَنْ كَشٜىٰ تُمَكِ بَاتَرٜىٰدَ أَنْحُكُنْتَسُبَ؞ مَاسُ سَيَرْوَ كُمَ سُكَنْثٜىٰ، ‏‹‏أَلْبَرْكَ تَا تَبَّتَا غَ يَهْوٜىٰهْ، نَيِ أَرْزِڧِ!‏›‏ كُواْ مَكِيَايَنْسُ بَسُجِ تَوْسَيِنْسُبَ؞»‏

⁶ إِنْجِ يَهْوٜىٰهْ ‏«‏بَذَنْ ڧَارَ جِنْ تَوْسَيِنْ مَذَوْنَنْ ڧَسَرْ نَنْبَ؞ غَاشِ، ذَنْ بَاشٜىٰ كُواْوَ غَ مَڨُوبْثِنْسَ دَ سَرْكِنْسَ؞ شُوغَبَنِّنْسُ ذَاسُ هَلَّكَ ڧَسَرْ، بَذَنْ كُوَ كُٻُتَرْدَ كُواْوَ دَغَ حَنُّنْسُبَ؞»‏

⁷ سَيْ نَذَمَ مَكِيَايِنْ غَرْكٜىٰنْ تُمَكِنْ دَ عَكَ ڧَدَّرَ ذَاعَ يَنْكَ، غَرْكٜىٰنْ مَاسُ كَاسُوَنْثِنْ تُمَكِ؞ نَ كُمَ طَوْكِ سَنْدُنَنْ كِيوُاْ بِيُ؞ نَسَا وَطَيَنْ سُونَ ‏«‏أَلْحٜىٰرِ»‏، طَيَنْ كُمَ نَسَا مَسَ سُونَ ‏«‏حَطِنْ كَيْ؞»‏ نَكُمَيِ كِيوُانْ غَرْكٜىٰنْ تُمَكِنْ؞

⁸ نَكَاسَ حَڧُرِ دَ مَكِيَايَ عُكُ وَطَنْدَ بَاسَ سُواْنَ، نَكُمَ كُواْرٜىٰسُ كَاڢِنْ وَتَ غُدَا؞

⁹ سَعَنً نَثٜىٰ ‏«‏بَذَنْ ذَمَ مَكِيَايِنْكُبَ؞ بَرِ أَبِنْدَ ذَيْ مُتُ يَمُتُ؞ أَبِنْ دَ كُمَ ذَيْ هَلَّكَ، بَرِ يَهَلَّكَ؞ وَطَنْدَ كُمَ سُنْ رَغُ بَرِ سُثِ نَامَنْ جُونَنْسُ!‏»‏

¹⁰ سَيْ نَطَوْكِ سَنْدَنَ دَ نَكٜىٰ كِرَا ‏«‏أَلْحٜىٰرِ»‏ نَكَرْيَشِ كَشِ بِيُ، دُواْمِنْ إِنْ نُونَ ثٜىٰوَ نَكَرْيَ يَرْجٜىٰجٜىٰنِيَتَ وَدَّ نَيِ دَ دُكَنْ ذُرِيَرْ إِسْرَٰٓءِيلَ؞

¹¹ عَكَ كُوَ كَرْيَ يَرْجٜىٰجٜىٰنِيَرْ أَ رَانَرْ نَنْ؞ تَهَكَ مَاسُ كَاسُوَنْثِنْ تُمَكِ، وَطَنْدَ سُكٜىٰ كَلُّواْنَ، سُكَ غَانٜىٰ ثٜىٰوَ نَيِ وَنَّنْ بِسَغَ مَغَنَرْ يَهْوٜىٰهْ نٜىٰ؞

¹² سَيْ نَثٜىٰمُسُ ‏«‏عِدَنْ كُنْ غَا دَيْدَيْنٜىٰ، سَيْ كُبِيَانِ لَادَنَ؞ عِدَنْ كُمَ بَهَكَ بَنٜىٰ، تُواْ، كُرِڧٜىٰ أَبِنْكُ؞»‏ سَيْ سُكَبِيَانِ كُطِنْ أَظُرْڢَا تَلَاتِنْ، لَادَنَ كٜىٰنَنْ؞

¹³ سَيْ يَهْوٜىٰهْ يَثٜىٰ مِنِ ‏«‏كَجٜىٰڢَ أَظُرْڢَا أَمَعَجِ؞»‏ أَغَنِنْسُ، إِيَاكَرْ دَرَجَرْ دَسُكَغَ يَثَنْثَنْتَ دَنِے كٜىٰنَنْ؞ سَعَنً نَطَوْكِ كُطِنْ أَظُرْڢَرْ نَنْ تَلَاتِنْ نَجٜىٰڢَرْ دَسُو أَ مَعَجِنْ غِدَنْ يَهْوٜىٰهْ؞

¹⁴ سَعَنً نَكَرْيَ سَنْدَنَ نَبِيُ مَيْ سُونَ ‏«‏حَطِنْ كَيْ»‏؞ نَيِ حَكَ دُواْمِنْ إِنْ نُونَ ثٜىٰوَ نَكَرْيَ زُمُنْثِنْ دَيَكٜىٰ ڟَكَانِنْ يَهُودَ دَ إِسْرَٰٓءِيلَ؞

¹⁵ سَيْ يَهْوٜىٰهْ يَثٜىٰ مِنِ ‏«‏كَسَاكٜىٰ طَوْكَرْ كَايَنْ عَيْكِ نَمَكِيَايِنْ بَنْظَ؞

¹⁶ غَمَا إِنَ شِرِنْ تَادَ وَنِ مَكِيَايِ عَڧَسَرْ وَنْدَ بَذَيْ دَامُ دَ تُمَكِنْ دَسُكٜىٰ ڢُسْكَنْتَرْ مُتُوَبَ؞ بَذَيْ كُمَ نٜىٰمِ ڧأَنَانً تُمَكِ بَ، كُواْ يَوَرْكَرْدَ وَطَنْدَ سُكَ كَرْيٜىٰبَ، كُواْ يَثِيَرْدَ مَاسُ لَاڢِيَبَ؞ عَمَّا ذَيْثِ نَامَنْ مَاسُ ڧِبَ، يَڢَرْڢَشٜىٰ تَڢِنْ ڧَڢَاڢُنْسُ؞

¹⁷ ‏«‏كَيْتُوانْكَ مَكِيَايِنْ بَنْظَ، مَيْ بَرِنْ غَرْكٜىٰنْ تُمَكِ!‏ بَرِ تَكُواْبِے يَسَارٜىٰ حَنُّنْكَ يَثِرٜىٰ عِدُوانْ دَامَنْكَ!‏ بَرِ حَنُّنْكَ يَشَنْيٜىٰ كَكَڢْ، عِدُوانْ دَامَنْكَ يَمَكَنْتَ كَڢْ!‏»‏