رُواْمَاوَا 8 - أَتَّوْرَتْ دَ أَنَّبَاوَا

رَايُوَا ثِكِنْ رُوحُ

¹ سَبُواْدَ حَكَ، بَابُوَنِ حُكُنْثِنْ مُتُوَ يَنْذُ عَكَنْ وَطَنْدَ سُكٜىٰ نَ أَلْمَسِيحُ عِيسَىٰ؞

² غَمَا تَوُرِنْ أَلْمَسِيحُ عِيسَىٰ ڧَٰعِدَرْ رُوحٌ نَنْ مَيْ بَادَ رَيْ تَا یَنْتَرْ دَنِے دَغَ ڧَٰعِدَرْ ذُنُوبِ دَمُتُوَ؞

³ غَمَا أَبِنْدَ كُواْيَرْوَرْ مُوسَٰى بَتَ عِيَ عَيْكَتَاوَابَ سَبُواْدَ كَاسَوَرْ حَلِنْ مُتُنْتَكَ، شِينٜىٰ أَبِنْدَ اللَّهْ يَعَيْكَتَ؞ اللَّهْ كُوَ يَعَيْكُواْ دَ طَنْسَ طَيَ تَكْ دَ كَمَنِّنْ جِكِنَّنْ نَامُ مَيْ ذُنُوبِ دُواْمِنْ يَذَمَ هَدَايَ سَبُواْدَ ذُنُوبِ، عَكُمَ رُشٜىٰ إِيكُوانْ ذُنُوبِ ثِكِنْ جِكِے؞

⁴ اللَّهْ يَيِ وَنَّنْ نٜىٰ دُواْمِنْ دُكْ أَيُّكَنْ أَدَلْثِنْ دَ كُواْيَرْوَرْ تَثٜىٰ عَيِ سُسَامِ ثِكَاوَا أَغَرٜىٰمُ، مُو دَ بَ رَايُوَرْ حَلِنْ مُتُنْتَكَ مُكٜىٰيِبَ، سَيْدَيْ تَ رُوحُ؞

⁵ مَاسُ رَايُوَرْ حَلِنْ مُتُنْتَكَ سُكَنْ مَيْدَ حَنْكَلِنْسُ غَ شَعَنِنْ جِكِے نٜىٰ، عَمَّا مَاسُ رَايُوَرْ رُوحُ سُكَنْ مَيْدَ حَنْكَلِنْسُ غَ أَبِنْدَ رُوحُ يَكٜىٰسُواْ نٜىٰ؞

⁶ مَيْ دَ حَنْكَلِ غَ شَعَنِنْ جِكِے يَكَنْ كَٰوُاْ مُتُوَ، عَمَّا مَيْدَ حَنْكَلِ غَ رُوحُ يَكَنْ كَٰوُاْ رَيْ دَ سَلَمَ؞

⁷ دُكْ وَنْدَ يَمَيْدَ حَنْكَلِنْسَ غَ شَعَنِنْ جِكِے يَذَمَ أَبُواْكِنْ غَابَنْ اللَّهْ كٜىٰنَنْ، غَمَا بَايَ مِيڧَ كَيْ غَ بِنْ كُواْيَرْوَرْ اللَّهْ، بَ كُوَ ذَيْ عِيَبَ؞

⁸ مَاسُ رَايُوَرْ حَلِنْ مُتُنْتَكَ بَا دَامَ سُڢَرَنْتَاوَ اللَّهْ رَيْ؞

⁹ كُو كَمْ بَ رَايُوَرْ حَلِنْ مُتُنْتَكَ كُكٜىٰيِبَ، سَيْدَيْ تَ رُوحُ، عِدَنْ رُوحٌ اللَّهْ يَنَ ظَوْنٜىٰ أَ ظُكَاتَنْكُ؞ دُكْ وَنْدَ بَ شِ دَ رُوحٌ أَلْمَسِيحُ كُوَ، شِے بَنَ أَلْمَسِيحُ بَنٜىٰ؞

¹⁰ عِدَنْ أَلْمَسِيحُ يَنَ ذَمَ ثِكِنْكُ، كُواْدَيَكٜىٰ جِكِنْكُ يَنَ حَنْيَرْ مُتُوَ سَبُواْدَ ذُنُوبِ، رُوحٌ اللَّهْ يَنَ رَايَرْ دَكُو سَبُواْدَ اللَّهْ يَكَرْٻٜىٰكُ أَمَڟَيِنْ مَاسُ أَدَلْثِے؞

¹¹ عِدَنْ كُمَ رُوحٌ اللَّهْ، وَنْدَ يَتَادَ عِيسَىٰ دَغَ مَتَتُّو يَنَ ذَمَ أَ ظُكَاتَنْكُ، تُواْ، شِے وَنْدَ يَتَادَ أَلْمَسِيحُ دَغَ مَتَتُّو ذَيْبَادَ رَيْ غَ جِكِنْكُ مَيْ مُتُوَ تَوُرِنْ رُوحُنْسَ وَنْدَ يَكٜىٰ ذَمَ أَ ظُكَاتَنْكُ؞

¹² سَبُواْدَ حَكَ، یَنْعُوَ، مُنَدَ حَكِّ، عَمَّا بَانَ يِنْ رَايُوَرْ دَ حَلِنْ مُتُنْتَكَرْمُ يَكٜىٰسُواْبَ؞

¹³ دُواْمِنْ عِدَنْ رَايُوَرْ حَلِنْ مُتُنْتَكَ كُكٜىٰيِ، ذَاكُمُتُ؞ عَمَّا عِدَنْ تَ إِيكُوانْ رُوحُ كُكَ كَشٜىٰ حَلِنْ يِنْ ذُنُوبِ، ذَاكُ رَايُ؞

¹⁴ غَمَا وَطَنْدَ رُوحٌ اللَّهْ يَكٜىٰ بِشٜىٰسُ، سُو یَیَنْ اللَّهْ نٜىٰ؞

¹⁵ غَمَا رُوحٌ دَ عَكَ بَاكُ بَنَبَوْتَا بَنٜىٰ يَدَّ ذَاكُ سَاكٜىٰ ذَمَ ثِكِنْ ڟُواْرُواْ؞ أَعَ، رُوحٌ نَنْ نَذَمَنْ یَیَنْ اللَّهْ نٜىٰ، كُمَ تَوُرِنْ رُوحٌ نٜىٰ مُكٜىٰ كِرَا غَ اللَّهْ، مُثٜىٰ دَشِ ‏«‏أَبَّ!‏ عُبَا!‏»‏

¹⁶ رُوحٌ اللَّهْ دَ كَنْسَ تَرٜىٰدَ رُوحُنْمُ يَنَ تَبَّتَرْ ثٜىٰوَ مُو یَیَنْ اللَّهْ نٜىٰ؞

¹⁷ أَشٜىٰ، تُنْدَيَكٜىٰ مُو یَیَ نٜىٰ، مُنْ ذَمَ مَاسُثِنْ غَادُواْ كٜىٰنَنْ؞ وَتُواْ، مُو مَاسُثِنْ غَادُوانْ أَلْبَرْكُنْ اللَّهْ دَ كُمَ أَبُواْكَنْ غَادُواْ تَرٜىٰدَ أَلْمَسِيحُ نٜىٰ، عِدَنْ كُوَ مُنْ شَا وَهَلَ تَرٜىٰدَ أَلْمَسِيحُ، دُواْمِنْ كُمَ أَطَوْكَكَمُ تَرٜىٰ دَشِ؞

طَوْكَكَرْمُ تَنَنْ غَبَ

¹⁸ أَيْ، نَا تَبَّتَرْ ثٜىٰوَ بَايَدَّ ذَاعَ ݣُوتَنْتَا وَهَلُواْلِنْ دَمُكٜىٰ شَا أَوَنَّنْ زَامَانِ دَ طَوْكَكَرْ دَ ذَاعَ بَيَّنَ مَنَ نَنْ غَبَ؞

¹⁹ دُكَنْ حَلِتَّ تَنَ مَرْمَرِ سُواْسَيْ، تَنَ جِضَانْ اللَّهْ يَبَيَّنَ یَیَنْسَ؞

²⁰ غَمَا أَنْسَا حَلِتَّ تَكَاسَ كَيْ غَ مَنُڢَرْتَ، وَنَّنْ كُوَ بَ بِسَغَ نُڢِنْ حَلِتَّ دَ كَنْتَ بَنٜىٰ، سَيْدَيْ دُواْمِنْ حَكَنٜىٰ اللَّهْ يَسُواْ؞ أَنْيِ وَنَّنْ دَ سَا ذُوثِيَا

²¹ ثٜىٰوَ حَلِتَّ دَ كَنْتَ ذَاتَ سَامِ ڟِيرَا دَغَ بَوْتَرْدَ تَكٜىٰ وَ رُٻٜىٰوَ، ذَاتَ كُمَ سَامِ یَنْثِنَّنْ نَطَوْكَكَرْ دَ ذَاعَيِ وَیَیَنْ اللَّهْ؞

²² مُنْ دَيْ سَنْ ثٜىٰوَ هَرْوَيَوْ دُكَنْ حَلِتَّ تَنَ نِيشِ كَمَرْ يَدَّ مَثٜىٰ مَيْ جِنْ ذَاڢِنْ حَيْڢُوَ تَكَنْيِ؞

²³ بَ حَلِتَّ كَطَيْ تَكٜىٰنِيشِبَ، حَرْ دَ مُو مَا؞ مُو دَ مُنْ رِغَا مُنْ سَامِ رُوحُ مَيْ ڟَرْكِے وَنْدَ شِينٜىٰ ݣَوْتَا تَڢَرْكُواْ تَأَبُبُوَنْ دَ عَكَ بَامُ، مُنَ نِيشِ أَ رَنْمُ، مُنَ جِرَا دَ مَرْمَرِ سُواْسَيْ دُوانْ اللَّهْ يَمَيَرْ دَمُو ثِكَكُّنْ یَیَنْسَ، يَكُمَ ڢَنْشِ جِكِنَّنْ نَامُ؞

²⁴ غَمَا تَسَا ذُوثِيَارْ نَنْ نٜىٰ عَكَثٜىٰثٜىٰمُ؞ عَمَّا عِدَنْ مُنْ رِغَا مُنْ غَا أَبِنْدَ مُكٜىٰسَا ذُوثِيَا عَكَيْ، أَيْ، وَنَّنْ بَاسَ ذُوثِيَا كُمَبَ كٜىٰنَنْ؞ وَنٜىٰ مُتُمْ يَكٜىٰسَا ذُوثِيَا غَ أَبِنْدَ يَارِغَا يَاسَامُ؟

²⁵ عَمَّا عِدَنْ مُنَسَا ذُوثِيَا غَ أَبِنْدَ بَمُ رِغَا مُنْ سَامُبَ، أَيْ، مُكَنْ جِرَا، مُنَ حَڧُرِ؞

²⁶ حَكَ كُوَ رُوحُ يَكٜىٰيِ مَنَ تَيْمَكُواْ ثِكِنْ كَاسَوَرْمُ؞ بَمُسَنْ يَدَّ يَا كَمَاتَ مُيِ أَدُّعَبَ، عَمَّا رُوحُ دَ كَنْسَ يَنَ ضُواْڧُوانْ اللَّهْ أَمَدَدِنْمُ تَرٜىٰدَ نِشٜىٰ نِشٜىٰ وَطَنْدَ كَلْمُواْمِ بَذَاسُ عِيَ بَيَّنَبَ؞

²⁷ اللَّهْ كُمَ، وَنْدَ شِينٜىٰ مَيْبِنْثِكَ ذُوثِيَارْ مُتُمْ، يَسَنْ دُكْ نُڢِنْ رُوحُ، دُواْمِنْ رُوحُ يَنَ يِنْ ضُواْڧُواْ أَمَدَدِنْ ڟَرْكَكَا بِسَغَ نُڢِنْ اللَّهْ نٜىٰ؞

²⁸ مُنْ دَيْ سَنْ ثٜىٰوَ عَثِكِنْ دُكَنْ كُواْمٜىٰ اللَّهْ يَنَ عَيْكَتَ أَلْحٜىٰرِ غَ وَطَنْدَ سُكٜىٰيِ مَسَ ڧَوْنَ نٜىٰ، وَتُواْ، وَطَنْدَ عَكَ كِرَاسُ بِسَ غَ نُڢِنْسَ؞

²⁹ غَمَا وَطَنْدَ اللَّهْ يَارِغَا يَسَنِ تُنْتُنِ، يَكُمَ ڧَدَّرَسُ سُطَوْكِ كَمَنِّنْ طَنْسَ، دُواْمِنْ يَذَمَ نَڢَارِ عَثِكِنْ یَنْعُوَ مَاسُيَوَ؞

³⁰ وَطَنْدَ اللَّهْ يَڧَدَّرَ كُوَ سُونٜىٰ يَكِرَا؞ وَطَنْدَ يَكِرَا، سُونٜىٰ يَمَيْدَسُو مَرَسَ لَيْڢِے أَغَبَنْسَ؞ وَطَنْدَ عَكَ مَيْدَسُو مَرَسَ لَيْڢِے أَغَبَنْسَ كُوَ، سُونٜىٰ يَكُمَ طَوْكَكَ؞

ڧَوْنَرْ اللَّهْ ثِكِنْ أَلْمَسِيحُ تَبَّتَاثِّيَ ثٜىٰ

³¹ تُواْ، مٜىٰ ذَامُثٜىٰ غَمٜىٰدَ وَنَّنْ بَتُ؟ عِدَنْ اللَّهْ يَنَ تَرٜىٰدَمُو، وَيَ إِسَ يَيِ غَابَادَمُو؟

³² اللَّهْ كُوَ بَيْ حَنَ مَنَ طَنْسَبَ، عَمَّا يَمِيڧَشِ سَبُواْدَمُو دُكَ؞ أَشٜىٰ، شِے اللَّهْ وَنْدَ يَارِغَا يَبَامُ طَنْسَ بَذَيْبَامُ دُكْ سَوْرَنْ أَبُبُوَ حَنُّ سَكٜىٰبَ؟

³³ وَنٜىٰنٜىٰ ذَيْ كَٰوُاْ ڧَارَ عَكَنْ وَطَنْدَ اللَّهْ يَذَاٻَا؟ أَيْ، اللَّهْ دَ كَنْسَ نٜىٰ يَكٜىٰ مَيْدَسُو سُذَمَ مَرَسَ لَيْڢِے أَغَبَنْسَ؞

³⁴ وَنٜىٰنٜىٰ يَ إِسَ يَيِ وَمُتُمْ حُكُنْثِنْ مُتُوَ؟ أَلْمَسِيحُ عِيسَىٰ وَنْدَ يَمُتُ، كُواْ كُوَ عَثٜىٰ، وَنْدَ عَكَ تَادَشِ دَغَ مَتَتُّو، وَنْدَ يَنَ كُمَ ذَمَ أَ حَنُّنْ دَامَ نَ اللَّهْ، شِينٜىٰ كُوَ يَنَ ضُواْڧُوانْ اللَّهْ أَمَدَدِنْمُ؞

³⁵ وَنٜىٰنٜىٰ ذَيْ عِيَ رَبَمُ دَ ڧَوْنَرْ دَ أَلْمَسِيحُ يَكٜىٰيِ مَنَ؟ عَذَابَثٜىٰ، كُواْ وُيَ، كُواْ ڟَنَنِ، كُواْ يُنْوَ، كُواْ رَشِ، كُواْ حَڟَرِ، كُواْ مُتُوَ؟

³⁶ كَمَرْ يَدَّ رُبُوتَثِّيَرْ مَغَنَرْ اللَّهْ تَثٜىٰ، ‏«‏سَبُواْدَكَيْ مُكٜىٰ ڢُسْكَنْتَرْ مُتُوَ كُلُّمْ، أَنْطَوْكٜىٰمُ كَمَرْ تُمَكِنْ دَ ذَاعَ يَنْكَ؞»‏

³⁷ أَيْ!‏ عَثِكِنْ دُكَنْ وَطَنَّنْ أَلْعَمُرَ مُنْ وُثٜىٰ عَثٜىٰ دَمُو مَاسُ نَصَرَا كَوَيْ، وَنَّنْ كُوَ تَوُرِنْ شِے وَنْدَ يَڧَوْنَثٜىٰمُنٜىٰ؞

³⁸ غَمَا نَا تَبَّتَرْ ثٜىٰوَ كُواْ مُتُوَ كُواْ رَيْ، كُواْ مَلاَىِٕكُ كُواْ أَلْجَنُ، كُواْ حَلِنْ يَنْذُ كُواْ نَنَنْ غَبَ، كُواْ إِيكُواْكِ إِرِ إِرِ،

³⁹ كُواْ ڟَوُاْ كُواْ ظُرْڢِ، كُواْ وَنِ أَبُ دَبَمْ أَدُكَنْ حَلِتَّ، دُكْ بَسُ عِسَابَ سَمْ سُرَبَمُ دَ ڧَوْنَرْ دَ اللَّهْ يَكٜىٰيِ مَنَ تَوُرِنْ أَلْمَسِيحُ عِيسَىٰ عُبَنْ‌غِجِنْمُ؞