رُواْمَاوَا 5 - أَتَّوْرَتْ دَ أَنَّبَاوَا

أَمْڢَانِنْ ذَمَ مَرَرْ لَيْڢِ أَغَبَنْ اللَّهْ

¹ سَبُواْدَ حَكَ تُنْدَيَكٜىٰ مُنْ سَامِ ذَمَ مَرَسَ لَيْڢِے أَغَبَنْ اللَّهْ تَوُرِنْ بَنْ‌غَسْكِيَ، مُنَدَ سَلَمَ دَ اللَّهْ كٜىٰنَنْ تَوُرِنْ عُبَنْ‌غِجِنْمُ عِيسَىٰ أَلْمَسِيحُ؞

² تَوُرِنْسَ نٜىٰ مُكَ سَامِ شِغَ أَلْحٜىٰرِنَّنْ دَمُكٜىٰ ذَمَ عَثِكِ تَوُرِنْ بَنْ‌غَسْكِيَرْمُ؞ مُنَ كُمَيِنْ ڢَضٍ ثِكِ سَبُواْدَ مُنَ سَا ذُوثِيَا ثٜىٰوَ ذَامُ ذَمَ مَاسُ تَرَيَّ ثِكِنْ طَوْكَكَرْ اللَّهْ؞

³ بَهَكَ كَطَيْبَ، حَرْ مُنَڢَضٍ ثِكِ ثِكِنْ وَهَلُواْلِنْمُ، سَبُواْدَ مُنْ سَنْ ثٜىٰوَ وَهَلَ تَكَنْ جَٰوُاْ جِمْرٜىٰوَ،

⁴ جِمْرٜىٰوَ تَكَنْ جَٰوُاْ حَلِنْ كِرْكِ، حَلِنْ كِرْكِ كُمَ يَكَنْ جَٰوُاْ سَا ذُوثِيَا؞

⁵ سَا ذُوثِيَارْ نَنْ بَذَاتَ ذَمَ أَبِنْ بَنْظَبَ كُواْ كَطَنْ، غَمَا اللَّهْ يَظُبَ ڧَوْنَرْسَ ثِكِنْ ظُكَاتَنْمُ تَوُرِنْ رُوحُ مَيْ ڟَرْكِے وَنْدَ اللَّهْ يَبَامُ؞

⁶ غَمَا أَدَيْدَيْ لُواْكَثِ، أَ سَعَدَّ بَمُ عِيَ تَيْمَكُوانْ كَنْمُبَ، أَلْمَسِيحُ يَمُتُ سَبُواْدَمُو، مُو مَرَسَ حَلِنْ اللَّهْ؞

⁷ دَݣَرْ نٜىٰ وَنِ يَمُتُ سَبُواْدَ مُتُمْ مَيْ أَدَلْثِے، كُواْدَيَكٜىٰ وَتَڧِيلَ وَنِ يَنَ عِيَيِنْ ڧَرْڢِنْ حَلِ يَمُتُ سَبُواْدَ مُتُمْ مَيْحَلِنْ كِرْكِ؞

⁸ عَمَّا اللَّهْ يَتَبَّتَرْ مَنَ يَوَنْ ڧَوْنَرْسَ دَيَكٜىٰ تُنْ مُنَ مَاسُ ذُنُوبِ، أَلْمَسِيحُ يَمُتُ سَبُواْدَمُو؞

⁹ تُواْ، تُنْدَيَكٜىٰ مُنْ سَامِ ذَمَ مَرَسَ لَيْڢِے أَغَبَنْ اللَّهْ تَوُرِنْ جِنِنْ أَلْمَسِيحُ، بَلّٜىٰ ڢَا يَنْذُ، أَيْ، ذَاعَ ثٜىٰثٜىٰمُ دَغَ ڢُشِنْ اللَّهْ تَوُرِنْ أَلْمَسِيحُ؞

¹⁰ تُواْ دَيَكٜىٰ لُواْكَثِنْ دَمُكٜىٰ مَاسُ غَابَادَ اللَّهْ نٜىٰ عَكَ شِرْيَ ڟَكَانِنْمُ دَ اللَّهْ تَمُتُوَرْ طَنْسَ، بَلّٜىٰ ڢَا يَنْذُ دَ أَنْرِغَا أَنْشِرْيَ ڟَكَانِنْمُ دَ اللَّهْ، ذَاعَ ثٜىٰثٜىٰمُ تَوُرِنْ رَايُوَرْ طَنْ كٜىٰنَنْ؞

¹¹ ڢِيٜىٰ دَهَكَ، حَرْ مُنَڢَضٍ ثِكِ سَبُواْدَ أَبِنْدَ اللَّهْ يَيِ تَوُرِنْ عُبَنْ‌غِجِنْمُ عِيسَىٰ أَلْمَسِيحُ، وَنْدَ تَوُرِنْسَنٜىٰ عَكَ شِرْيَ ڟَكَانِنْمُ دَ اللَّهْ؞

ءَادَمُ دَ أَلْمَسِيحُ

¹² تُواْ، كَمَرْ يَدَّ ذُنُوبِ يَشِغُواْ ثِكِنْ دُونِيَا تَوُرِنْ مُتُمْ طَيَ، ذُنُوبِنَّنْ كُوَ شِ يَجَٰوُاْ مُتُوَ، تَهَكَ مُتُوَ تَبِے تَشَاڢِ دُكَنْ یَنْ أَدَمْ، غَمَا كُواْوَ يَيِ ذُنُوبِ؞

¹³ كَاڢِنْ عَبَادَ كُواْيَرْوَرْ مُوسَٰى، ذُنُوبِ يأَنَانً عَدُونِيَا؞ عَمَّا بَعَيِنْ لِسَّڢِنْ ذُنُوبِ عِنْدَ بَابُ كُواْيَرْوَا؞

¹⁴ دُكْدَهَكَ مُتُوَ تَايِ مُلْكِ عَكَنْ مُتَنٜىٰ دُكَ دَغَ زَامَانِنْ ءَادَمُ ذُوَا زَامَانِنْ مُوسَٰى، حَرْ مَا تَيِ إِيكُواْ عَكَنْ وَطَنْدَ ذُنُبَنْسُ بَ نَكَرْيَ دُواْكَا بَنٜىٰ كَمَرْ يَدَّ نَ ءَادَمُ يَكَسَنْثٜىٰ؞ ءَادَمُ كُوَ ݣُوتَنْثِنْ وَنْدَ يَكٜىٰ ݣَوْتَرْ اللَّهْ مَيْ ذُوَانَّنْ؞

¹⁵ عَمَّا ݣَوْتَرْ دَ اللَّهْ يَبَايَرْ تَوُرِنْ مَيْ ذُوَانَّنْ دَبَمْ تَكٜىٰ ڨُورَيْ دَ كَرْيَ دُواْكَرْ دَ ءَادَمُ يَيِ؞ غَاشِ، كَرْيَ دُواْكَا تَمُتُمْ طَيَنَّنْ تَجَٰوُاْ وَمُتَنٜىٰ دَيَوَ مُتُوَ؞ عَمَّا أَلْحٜىٰرِنْ اللَّهْ يَڢِ يَوَ، حَرْ ݣَوْتَرْسَ دَ يَيِ تَوُرِنْ أَلْحٜىٰرِنْ مُتُمْ طَيَنَّنْ، وَتُواْ عِيسَىٰ أَلْمَسِيحُ، تَسَا بَبَّرْ أَلْبَرْكَ تَيَلْوَتَ غَ مُتَنٜىٰ دَيَوَ؞

¹⁶ ڨُورَيْ كُوَ، ݣَوْتَرْ اللَّهْ دَبَمْ تَكٜىٰدَ ذُنُوبِنْ مُتُمْ طَيَنَّنْ؞ غَمَا حُكُنْثِنْدَ يَبِے بَايَنْ ذُنُوبِنَّنْ شِينٜىٰ حُكُنْثِنْ مُتُوَ، عَمَّا ݣَوْتَرْ دَ اللَّهْ يَبَايَرْ، عِتَثٜىٰ تَجَٰوُاْ مَنَ شَرِيعَرْ مَرَرْ لَيْڢِے أَغَبَنْسَ، كُواْدَيَكٜىٰ مُنْيِ ذُنُوبِ دَيَوَ؞

¹⁷ تَوُرِنْ ذُنُوبِنْ مُتُمْ طَيَ، وَتُواْ ءَادَمُ، مُتُوَ تَيِ مُلْكِ عَكَنْ كُواْوَ، عَمَّا وَنَّنْ يِنْ مُلْكِ بَكُواْمٜىٰبَنٜىٰ عِدَنْ أَنْ‌ڠُودَاشِ دَ وَنْدَ مُتُمْ طَيَ، وَتُواْ عِيسَىٰ أَلْمَسِيحُ يَكَٰوُاْ غَ مَاسُ كَرْٻَرْ أَلْحٜىٰرِنْ اللَّهْ دَ ݣَوْتَرْسَ تَذَمَنْ أَدَلْثِے أَغَبَنْسَ؞ تَوُرِنْسَ نٜىٰ ذَاسُيِ مُلْكِ ثِكِنْ رَايُوَا؞

¹⁸ سَبُواْدَ حَكَ، كَمَرْ يَدَّ كَرْيَ دُواْكَا تَمُتُمْ طَيَ تَجَٰوُاْ حُكُنْثِنْ مُتُوَ عَكَنْ كُواْوَ، حَكَكُمَ عَيْكَتَ أَدَلْثِے نَمُتُمْ طَيَ يَكَٰوُاْ أَلْبَرْكَ غَ كُواْوَ، وَتُواْ سَامُنْ ذَمَ مَرَرْ لَيْڢِے أَغَبَنْ اللَّهْ دَ كُمَ سَابُوانْ رَيْ؞

¹⁹ كَمَرْ يَدَّ مُتَنٜىٰ دَيَوَ سُكَ ذَمَ مَاسُ ذُنُوبِ تَوُرِنْ رَشِنْ بِيَيَّرْ مُتُمْ طَيَ، حَكَكُمَ مُتَنٜىٰ دَيَوَ ذَاسُ ذَمَ مَاسُ أَدَلْثِے تَوُرِنْ بِيَيَّرْ مُتُمْ طَيَ؞

²⁰ دَلِيلِنْ دَ عَكَ شِغُواْ دَ كُواْيَرْوَرْ مُوسَٰى شِينٜىٰ دُواْمِنْ لَيْڢِے يَڢِتُواْ أَ ڢِيلِ؞ عَمَّا سَعَدَّ ذُنُوبِ يَڧَارُ، سَيْ أَلْحٜىٰرِنْ اللَّهْ يَڢِ ڧَارُوَ،

²¹ دُواْمِنْ كَمَرْ يَدَّ ذُنُوبِ يَيِ مُلْكِنْسَ تَوُرِنْ مُتُوَ، حَكَكُمَ أَلْحٜىٰرِنْ اللَّهْ يَكٜىٰ مُلْكِنْسَ يَنْذُ تَوُرِنْ أَدَلْثِے، دُواْمِنْ يَكَيْمُ غَ رَيْ نَهَرْ أَبَدَا تَوُرِنْ عِيسَىٰ أَلْمَسِيحُ عُبَنْ‌غِجِنْمُ؞