رُواْمَاوَا 4 - أَتَّوْرَتْ دَ أَنَّبَاوَا

مِصَالِنْ إِبْرَٰهِيمْ

¹ تُواْ، مٜىٰ ذَامُثٜىٰ غَمٜىٰدَ إِبْرَٰهِيمْ، كَكَنْ كَاكَنِّنْمُ بِسَغَ جِكِے؟ مٜىٰنٜىٰنٜىٰ يَڢَهِمْثِ غَمٜىٰدَ ذَنْثٜىٰنْ بَنْ‌غَسْكِيَ؟

² عِدَنْ إِبْرَٰهِيمْ يَسَامِ ذَمَ مَرَرْ لَيْڢِے أَغَبَنْ اللَّهْ تَأَيُّكَنْسَ نٜىٰ يَنَدَ أَبِنْدَ ذَيْ يِتَاڧَمَ دَشِ كٜىٰنَنْ، عَمَّا ڢَا بَ أَغَبَنْ اللَّهْ بَ؞

³ رُبُوتَثِّيَرْ مَغَنَرْ اللَّهْ تَثٜىٰ ‏«‏سَبُواْدَ إِبْرَٰهِيمْ يَبَادَ غَسْكِيَ غَ اللَّهْ، سَيْ اللَّهْ يَلِسَّڢْتَا وَنَّنْ أَدَلْثِے نٜىٰ أَغَرٜىٰشِ؞»‏

⁴ مُتُمِنْ دَ يَكٜىٰيِنْ عَيْكِنْ لَادَ، أَلْبَشِنْسَ بَݣَوْتَا بَنٜىٰ، لَادَنْ عَيْكِنْسَنٜىٰ؞

⁵ تُواْ، مُتُمِنْ دَ بَيْ دُواْغَضَ غَ أَيُّكَنْسَبَ، عَمَّا يَدُواْغَرَ غَ اللَّهْ وَنْدَ شِينٜىٰ يَكٜىٰسَا مَرَسَ حَلِنْ اللَّهْ سُسَامِ ذَمَ مَرَسَ لَيْڢِے أَغَرٜىٰشِ، ذَاعَ طَوْكِ بَنْ‌غَسْكِيَرْ مُتُمِنَّنْ كَمَرْ أَدَلْثِنْسَ كٜىٰنَنْ؞

⁶ وَنَّنْ شِينٜىٰ أَبِنْدَ دَاوُدَ يَكٜىٰنُڢِ دَ يَيِ مَغَنَ غَمٜىٰدَ أَلْبَرْكَرْ دَ عَكَيِ وَمُتُمِنْ دَ اللَّهْ يَثٜىٰ دَشِ مَيْ أَدَلْثِے، بَتَدَلِيلِنْ أَيُّكَنْ دَ مُتُمِنْ يَيِبَ ثٜىٰوَ

⁷ ‏«‏مَيْ أَلْبَرْكَنٜىٰ مُتُمِنْ دَ عَكَ غَاڢَرْتَا مَسَ ذُنُبَنْ غَنْ‌غَنْثِنْسَ، وَنْدَ عَكَ يَاڢٜىٰمَسَ ذُنُبَنْسَ؞

⁸ مَيْ أَلْبَرْكَنٜىٰ مُتُمِنْ دَ عُبَنْ‌غِجِ بَيْ لِسَّڢْتَا لَيْڢُواْڢِنْسَبَ؞»‏

⁹ وَنَّنْ أَلْبَرْكَ تَشَاڢِ مَاسُ كَاثِيَ نٜىٰ كَوَيْ، كُواْ كُوَ حَرْ دَ أَرْنَ مَرَسَ كَاثِيَ؟ أَيْ، أَبِنْدَ مُكٜىٰ ڢَطَا دَغَ ثِكِنْ رُبُوتَثِّيَرْ مَغَنَرْ اللَّهْ نٜىٰ ثٜىٰوَ ‏«‏غَ إِبْرَٰهِيمْ عَكَ لِسَّڢْتَا بَنْ‌غَسْكِيَرْسَ أَدَلْثِے؞»‏

¹⁰ تُواْ، أَوَنٜىٰ لُواْكَثِنٜىٰ عَكَثٜىٰ دَشِ مَيْ أَدَلْثِے؟ بَايَنْدَ عَكَيِ مَسَ كَاثِيَ كُواْ تُنْ بَعَيِ مَسَبَ؟ أَيْ، تُنْ بَعَيِ مَسَ كَاثِيَ بَنٜىٰ؞

¹¹ عَمَّا دَ يَكَرْٻِ عَلَمَرْ كَاثِيَ، وَنَّنْ تَذَمَ عَلَمَرْ شَيْدَ غَمٜىٰدَ أَدَلْثِنْ دَ يَكٜىٰدَشِ بِسَغَ بَنْ‌غَسْكِيَرْسَ، تُنْ بَعَيِ مَسَ كَاثِيَبَ؞ سَبُواْدَ حَكَ إِبْرَٰهِيمْ يَذَمَ عُبَنْ مَاسُ بَادَ غَسْكِيَ غَ اللَّهْ، دُواْمِنْ أَ لِسَّڢْتَاسُ مَاسُ أَدَلْثِے نٜىٰ، كُواْدَيَكٜىٰ بَاسُدَ كَاثِيَ؞

¹² حَكَ مَا إِبْرَٰهِيمْ يَذَمَ عُبَا غَ مَاسُ كَاثِيَ وَطَنْدَ بَا كَاثِيَ كَطَيْ سُكٜىٰ دَ عِتَبَ، عَمَّا حَرْ مَا سُنَ بِنْ مِصَالِنْ إِرِنْ بَنْ‌غَسْكِيَرْ دَ إِبْرَٰهِيمْ يَكٜىٰدَ عِتَ تُنْ بَعَيِ مَسَ كَاثِيَبَ؞

أَلْڧَوَرِنْ اللَّهْ دَ بَنْ‌غَسْكِيَرْ مُتُمْ

¹³ أَلْڧَوَرِنَّنْ دَ عَكَيِ وَ إِبْرَٰهِيمْ دَ ذُرِيَرْسَ ثٜىٰوَ ذَيْثِغَادُوانْ دُونِيَا، أَيْ، بَتَوُرِنْ كُواْيَرْوَرْ مُوسَٰى عَكَيِ مَسَبَ، سَيْدَيْ تَ أَدَلْثِنَّنْ دَ عَكٜىٰ سَامُوَ تَوُرِنْ بَنْ‌غَسْكِيَ؞

¹⁴ غَمَا عِدَنْ مَاسُبِنْ كُواْيَرْوَرْ مُوسَٰى سُونٜىٰ وَطَنْدَ ذَاسُثِ غَادُوانْ دُونِيَا، أَيْ، بَنْ‌غَسْكِيَرْ مُتُمْ تَذَمَ بَنْظَ، كُمَ أَلْڧَوَرِنْ اللَّهْ يَذَمَ وُاْڢِ كٜىٰنَنْ؞

¹⁵ غَمَا كُواْيَرْوَرْ تَكَنْ جَٰوُاْ ڢُشِنْ اللَّهْ نٜىٰ، عَمَّا عِنْدَ بَابُ دُواْكَا، بَايَدَّ ذَاعَيِ رَشِنْ بِيَيَّ؞

¹⁶ سَبُواْدَ حَكَ، عَكَنْ بَنْ‌غَسْكِيَ نٜىٰ أَلْڧَوَرِنَّنْ يَدُواْغَرَ؞ وَنَّنْ كُوَ دُواْمِنْ يَذَمَ بِسَغَ أَلْحٜىٰرِنْ اللَّهْ، دُواْمِنْ كُمَ عَتَبَّتَرْ دَشِ غَ دُكَنْ ذُرِيَرْ إِبْرَٰهِيمْ، وَتُواْ، بَ غَ وَطَنْدَ سُكٜىٰ ڧَرْڧَشِنْ كُواْيَرْوَرْ مُوسَٰى كَطَيْبَ، عَمَّا حَرْ غَ وَطَنْدَ سُكٜىٰ بَادَ غَسْكِيَ يَدَّ إِبْرَٰهِيمْ يَيِ؞ إِبْرَٰهِيمْ كُوَ شِينٜىٰ بَابَنْمُ دُكَ؞

¹⁷ كَمَرْ يَدَّ يَكٜىٰ أَرُبُوثٜىٰ ثٜىٰوَ ‏«‏نَسَاكَ كَذَمَ عُبَنْ ڧَبِيلُ مَاسُيَوَ؞»‏ وَتُواْ، أَنْ تَبَّتَرْ دَ أَلْڧَوَرِنَّنْ؞ إِبْرَٰهِيمْ عُبَنْمُنٜىٰ أَغَبَنْ اللَّهْ وَنْدَ يَبَادَ غَسْكِيَ غَرٜىٰشِ، وَنْدَ كُمَ شِينٜىٰ مَيْ بَادَ رَيْ غَ مَتَتُّو؞ شِينٜىٰ كُمَ مَيْ إِيكُوانْ كِرَنْ أَبُبُوَنْ دَ بَسُ كَسَنْثٜىٰبَ سُكَسَنْثٜىٰ؞

¹⁸ كُواْدَيَكٜىٰ سَا ذُوثِيَارْ إِبْرَٰهِيمْ تَذَمَ كَمَرْ عَبَنْظَنٜىٰ، دُكْدَهَكَ يَثِيغَبَدَ سَا ذُوثِيَا، يَنَ بَادَ غَسْكِيَ حَرْ يَذَمَ ‏«‏عُبَنْ ڧَبِيلُ مَاسُيَوَ؞»‏ وَنَّنْ كُوَ بِسَغَ أَلْڧَوَرِنْ دَ عَكَيِ مَسَ نٜىٰ، ثٜىٰوَ ‏«‏حَكَ ذُرِيَرْكَ ذَاسُيِيَوَ؞»‏

¹⁹ أَ لُواْكَثِنْ كُوَ إِبْرَٰهِيمْ يَنَدَ شٜىٰكَرَا وَجٜىٰنْ طَرِے نٜىٰ، عَمَّا بَيْيِ سَنْيِ ثِكِنْ بَنْ‌غَسْكِيَرْسَبَ، كُواْدَيَكٜىٰ يَنَ غَنِنْ يَدَّ ڧَرْڢِنْ جِكِنْسَ يَڧَارٜىٰ دُوانْ ڟُوڢَ دَ كُمَ يَدَّ سَارَةُ تَوُثٜىٰ لُواْكَثِنْ دَ ذَاتَ عِيَ حَيْڢُوَ؞

²⁰ بَيْيِ شَكَّرْ أَلْڧَوَرِنْ اللَّهْ تَنُونَ رَشِنْ بَنْ‌غَسْكِيَابَ، عَمَّا يَڧَارَ ڧَرْڢِے ثِكِنْ بَنْ‌غَسْكِيَرْسَ، يَنَ طَوْكَكَ اللَّهْ؞

²¹ يَكُمَ كَسَنْثٜىٰ دَ ثِكَكّٜىٰنْ تَبَّثِ ثٜىٰوَ اللَّهْ يَنَدَ إِيكُواْ يَثِكَ أَلْڧَوَرِنْسَ؞

²² شِيَسَا عَكَ لِسَّڢْتَا بَنْ‌غَسْكِيَرْ إِبْرَٰهِيمْ أَدَلْثِنٜىٰ أَغَرٜىٰشِ؞

²³ وَنَّنْ مَغَنَ مَيْ ثٜىٰوَ ‏«‏عَكَ لِسَّڢْتَا بَنْ‌غَسْكِيَ أَدَلْثِنٜىٰ أَغَرٜىٰشِ،»‏ بَسَبُواْدَ شِ كَطَيْ نٜىٰ عَكَ رُبُوتَبَ؞

²⁴ عَمَّا أَنْرُبُوتَ وَنَّنْ مَغَنَ سَبُواْدَمُو، مُو مَا، مُو دَ اللَّهْ ذَيْ لِسَّڢْتَامُ مَاسُ أَدَلْثِے، وَتُواْ مُو دَ مُكَ بَادَ غَسْكِيَ غَ وَنْدَ يَتَادَ عِيسَىٰ عُبَنْ‌غِجِنْمُ دَغَ مَتَتُّو؞

²⁵ سَبُواْدَ ذُنُبَنْمُنٜىٰ عَكَ بَادَ عِيسَىٰ غَ مُتُوَ، كُمَ أَنْتَادَشِ دَ رَيْ دُواْمِنْ مُسَامِ ذَمَ مَرَسَ لَيْڢِے أَغَبَنْ اللَّهْ؞