رُواْمَاوَا 3 - أَتَّوْرَتْ دَ أَنَّبَاوَا

¹ تُواْ، إِنَا أَمْڢَانِ نَثٜىٰوَ كَيْ بَيَهُودٜىٰ نٜىٰ؟ إِنَا رِيبَرْ كَاثِيَ؟

² أَݣَويْ كَمْ، تَكُواْوَثٜىٰ حَنْيَ!‏ دَڢَرْكُواْ، سُو يَهُودَاوَا نٜىٰ اللَّهْ دَ كَنْسَ يَبَاسُ أَمَانَرْ كَلْمَرْ نَنْ دَتَكٜىٰ تَ اللَّهْ؞

³ عَمَّا عِدَنْ وَطَنْسُنْسُ سُنْ نُونَ رَشِنْ بَنْ‌غَسْكِيَ ڢَا؟ رَشِنْ أَمِنْثِنْسُ ذَيْسَا أَمِنْثِنْ اللَّهْ يَذَمَ بَنْظَ كٜىٰنَنْ؟

⁴ إِنَا!‏ كُواْ كَطَنْ!‏ اللَّهْ مَيْ غَسْكِيَانٜىٰ، كُواْدَيَكٜىٰ كُواْوَنٜىٰ مُتُمْ مَيْ ڧَضْيَانٜىٰ؞ كَمَرْ يَدَّ يَكٜىٰ أَرُبُوثٜىٰ ثِكِنْ رُبُوتَثِّيَرْ مَغَنَرْ اللَّهْ ثٜىٰوَ ‏«‏دُواْمِنْ عَتَبَّتَا مَغَنَرْكَ غَسْكِيَثٜىٰ، كَكُمَشَا كَنْ كُواْوَ عِدَنْ أَنَيِنْ بِنْثِكٜىٰ عَكَنْكَ؞»‏

⁵ تُواْ، عِدَنْ رَشِنْ أَدَلْثِنْمُ يَذَمَ حَنْيَرْ بَيَّنَ أَدَلْثِنْ اللَّهْ ڢَا، مٜىٰ ذَامُثٜىٰ كٜىٰنَنْ؟ ذَامُثٜىٰ اللَّهْ مَرَرْ أَدَلْثِنٜىٰ إِنْ يَحُكُنْتَمُ؟ إِنَ دَيْ يِنْ مَغَنَ يَدَّ طَنْ أَدَمْ ذَيْ يِنٜىٰ؞

⁶ إِنَا!‏ كُواْ كَطَنْ!‏ إِنْ حَكَنٜىٰ، تَيَيَا اللَّهْ ذَيْ يِشَرِيعَرْ دُونِيَا؟

⁷ عِدَنْ رَشِنْ غَسْكِيَتَ يَسَا غَسْكِيَرْ اللَّهْ تَڢِتَ أَڢِيلِ سُواْسَيْ، يَكُمَ ذَمَ أَبِنْ ڧَارَ طَوْكَكَرْ اللَّهْ، تُواْ، دُوانْمٜىٰ حَرْ يَنْذُ ذَاعَ حُكُنْتَنِ عَكَنْ ثٜىٰوَ نِے مَيْ ذُنُوبِنٜىٰ؟

⁸ إِنْ حَكَنٜىٰ، بَسَيْ مُثِيغَبَدَ يِنْ مُغُنْتَا دُواْمِنْ يَذَمَ حَنْيَرْ سَامُنْ نَغَرْتَابَ؟ وَطَنْسُ مُتَنٜىٰ كُوَ مَاسُ مَغَنَرْ ٻَاتَ سُونَنْمُ سُنَ ثٜىٰوَ وَيْ حَكَ مُكٜىٰڢَطَا؞ ذَاعَ حُكُنْتَ وَطَنَّنْ كَمَرْ يَدَّ يَيِ دَيْدَيْ عَيِمُسُ؞

بَابُ مَيْ أَدَلْثِے كُواْ طَيَ

⁹ تُواْ، يَيَ كٜىٰنَنْ؟ كُواْ مُو يَهُودَاوَا مُنْڢِے سَوْرَنْ مُتَنٜىٰنٜىٰ؟ إِنَا!‏ كُواْ كَطَنْ!‏ مُنْ رِغَا مُنْ نُونَ ثٜىٰوَ دَ يَهُودَاوَا دَ وَطَنْدَ بَا يَهُودَاوَا بَ دُكَ سُنَدَ لَيْڢِے، كُمَ دُكَ سُنَ ڧَرْڧَشِنْ إِيكُوانْ ذُنُوبِ؞

¹⁰ كَمَرْ يَدَّ يَكٜىٰ أَرُبُوثٜىٰ ثِكِنْ رُبُوتَثِّيَرْ مَغَنَرْ اللَّهْ ثٜىٰوَ ‏«‏بَابُوَنِ مَيْ أَدَلْثِے، بَابُ، كُواْ طَيَ؞

¹¹ بَابُوَنِ مَيْ غَانٜىٰوَ، كُواْ وَنِ مَيْ نٜىٰمَنْ اللَّهْ؞

¹² دُكْ سُنْ جُويَا وَ اللَّهْ بَايَ، سُنْ ذَمَ مَرَسَ أَمْڢَانِ غَبَاطَيَ؞ بَابُوَنِ مَيْ عَيْكَتَ نَغَرْتَا، بَابُ، كُواْ طَيَ؞

¹³ مَڧُواْڠُورُوانْسُ كَمَرْ بُوطَطّٜىٰنْ كَبَرِ نٜىٰ، هَرْسُنَنْسُ سُنْ ذَمَ كَايَنْ رُوطُ؞ مَغَنْ‌غَنُنْسُ كَمَرْ دَڢِنْ مُوغُنْ مَثِيجِ؞

¹⁴ بَاكِنْسُ ثِكٜىٰ سُكٜىٰ دَ بَڧَرْ مَغَنَ دَ ذَاغٜىٰ ذَاغٜىٰ؞

¹⁵ سُكَنْيِ سَوْرِنْ ظُبْدَ جِنِ،

¹⁶ دُكْ عِنْدَ سُكَبِے، سَيْ هَلَّكَ دَ بَڧِنْ ثِكِ؞

¹⁷ بَسُ كُوَ سَنْ حَنْيَرْ سَلَمَبَ؞

¹⁸ بَابُ كُواْ ڟُواْرُوانْ اللَّهْ أَعِدَنُونْسُ؞»‏

¹⁹ مُنْ دَيْ سَنِ ثٜىٰوَ دُكْ أَبِنْدَ كُواْيَرْوَرْ مُوسَٰى تَكٜىٰ ڢَطَا، تَنَ ڢَطَا وَ وَطَنْدَ سُكٜىٰ ڧَرْڧَشِنْتَ نٜىٰ؞ وَنَّنْ يَكَسَنْثٜىٰ حَكَ دُوانْ أَحَنَ دُكْ مَاسُ نٜىٰمَنْ حُجَّ، عَكُمَ نُونَ ثٜىٰوَ دُكَنْ دُونِيَا عَڧَرْڧَشِنْ حُكُنْثِنْ اللَّهْ تَكٜىٰ؞

²⁰ غَمَا بَاوَنْدَ ذَيْسَامِ ذَمَ مَرَرْ لَيْڢِے أَغَبَنْ اللَّهْ تَهَنْيَرْ كِيَايٜىٰ أَبِنْدَ كُواْيَرْوَرْ تَثٜىٰ عَيِ؞ أَبِنْدَ كُواْيَرْوَرْ تَكٜىٰيِ شِينٜىٰ تَنُونَوَ مُتُمْ ذُنُوبِنْسَ؞

أَدَلْثِے تَوُرِنْ بَنْ‌غَسْكِيَ

²¹ عَمَّا يَنْذُ كَمْ أَنْبَيَّنَا وَتَ حَنْيَرْ سَامُنْ أَدَلْثِنْ اللَّهْ دَبَمْ؞ وَنَّنْ أَدَلْثِے كُوَ بَتَوُرِنْ كُواْيَرْوَرْ مُوسَٰى عَكٜىٰ سَامُنْسَبَ، كُواْدَيَكٜىٰ كُواْيَرْوَرْ مُوسَٰى دَ لِتَّتَّڢَنْ أَنَّبَاوَا سُنْ بَادَ شَيْدَ غَمٜىٰدَشِ؞

²² أَدَلْثِنَّنْ وَنْدَ دَغَ وُرِنْ اللَّهْ يَكٜىٰ، أَنَ سَامُنْسَنٜىٰ تَوُرِنْ بَنْ‌غَسْكِيَ ثِكِنْ عِيسَىٰ أَلْمَسِيحُ، اللَّهْ يَبَادَ أَدَلْثِنَّنْ غَ دُكَنْ مَاسُ بَادَ غَسْكِيَ؞ بَا كُوَ وَنِ بَمْبَنْثِ،

²³ غَمَا كُواْوَ يَيِ ذُنُوبِ، كُمَ كُواْوَ يَكَاسَكَيْ غَ دَرَجَرْ اللَّهْ؞

²⁴ عَمَّا بِسَغَ أَلْحٜىٰرِنْ دَ اللَّهْ يَيِ وَكُواْوَ عَݣَوْتَا، كُواْوَ يَسَامِ ذَمَ مَرَرْ لَيْڢِے أَغَبَنْ اللَّهْ تَوُرِنْ ڢَنْسَرْ دَ أَلْمَسِيحُ عِيسَىٰ يَيِ؞

²⁵ اللَّهْ يَمِيڧَ عِيسَىٰ يَذَمَ هَدَايَ تَطَوْكَرْ أَلْحَكِنْ ذُنُبَنْمُ، دُواْمِنْ تَوُرِنْ جِنِنْ هَدَايَرْسَ ذَاعَ غَاڢَرْتَا وَمُتَنٜىٰ ذُنُبَنْسُ تَوُرِنْ بَنْ‌غَسْكِيَرْسُ؞ اللَّهْ يَيِ وَنَّنْ دُواْمِنْ يَنُونَ أَدَلْثِنْسَ، دُوانْ عَثِكِنْ حَڧُرِنْسَ يَڨَلٜىٰ ذُنُبَنْدَ عَكَيِ أَدَا؞

²⁶ تَهَكَ اللَّهْ يَنُونَ أَدَلْثِنْسَ أَوَنَّنْ لُواْكَثِ، سَبُواْدَ شِے دَ كَنْسَ مَيْ أَدَلْثِے نٜىٰ، كُمَ يَنَ سَا دُكْ مَيْ بَادَ غَسْكِيَ غَ عِيسَىٰ يَسَامِ ذَمَ مَرَرْ لَيْڢِے أَغَبَنْ اللَّهْ؞

²⁷ تُواْ، عَكَنْ مٜىٰنٜىٰنٜىٰ ذَامُيِ تَاڧَمَ؟ أَيْ، بَا وَنِ أَبُ!‏ تَوَنٜىٰ دَلِيلِ عَكَ كَوَرْدَ تَاڧَمَ؟ تَهَنْيَرْ كِيَايٜىٰ كُواْيَرْوَرْ مُوسَٰى؟ أَعَ، سَيْدَيْ تَبَنْ‌غَسْكِيَ؞

²⁸ غَمَا مُنْ أَمِنْثٜىٰ ثٜىٰوَ تَوُرِنْ بَنْ‌غَسْكِيَ نٜىٰ عَكَنْ سَامِ ذَمَ مَرَرْ لَيْڢِے أَغَبَنْ اللَّهْ، بَتَوُرِنْ بِنْ أَيُّكَنْ كُواْيَرْوَرْ مُوسَٰى بَ؞

²⁹ كُواْ كُوَ اللَّهْ، اللَّهْ نَ يَهُودَاوَا نٜىٰ، سُو كَطَيْ؟ أَشٜىٰ، بَنَمُتَنٜىٰنْ دَ بَا يَهُودَاوَا بَنٜىٰ كُمَ؟ ڨُورَيْ كُوَ، شِے مَا نَوَطَنْدَ بَا يَهُودَاوَا بَنٜىٰ كُمَ،

³⁰ غَمَا اللَّهْ طَيَنٜىٰ؞ ذَيْسَا مَاسُ كَاثِيَ سُسَامِ ذَمَ مَرَسَ لَيْڢِے أَغَرٜىٰشِ تَوُرِنْ بَنْ‌غَسْكِيَ، حَكَمَا مَرَسَ كَاثِيَ ذَاسُ سَامِ ذَمَ مَرَسَ لَيْڢِے تَوُرِنْ وَنَّنْ بَنْ‌غَسْكِيَ؞

³¹ شِنْ، مُنْ كَوَرْدَ كُواْيَرْوَرْ مُوسَٰى كٜىٰنَنْ بِسَغَ وَنَّنْ بَنْ‌غَسْكِيَ؟ كُواْ كَطَنْ!‏ أَ مَيْمَكُوانْ حَكَ، تَبَّتَرْ دَ عِتَ نٜىٰ مُكٜىٰيِ؞