رُواْمَاوَا 15 - أَتَّوْرَتْ دَ أَنَّبَاوَا

ڢَرَنْتَاوَا طَنْعُوَنْكَ رَيْ، بَكَنْكَبَ

¹ مُو دَمُكٜىٰ مَاسُ ڧَرْڢِے ثِكِنْ بَنْ‌غَسْكِيَرْمُ يَا كَمَاتَ مُطَوْكِ نَوْيِنْ وَطَنْدَ بَاسُدَ ڧَرْڢِے، دُوانْ مُتَيْمَكٜىٰسُ ثِكِنْ كَاسَوَرْسُ؞ كَدَ كُمَ مُنُونَ حَلِنْ سُوانْكَيْ؞

² بَرِ كُواْوَ عَثِكِنْمُ يَڢَرَنْتَ وَ طَنْعُوَنْسَ رَيْ سَبُواْدَ أَمْڢَانِنْسَ دَ كُمَ غِنَاوَرْ بَنْ‌غَسْكِيَرْسَ؞

³ غَمَا كُواْ أَلْمَسِيحُ مَا بَيْيِ سُوانْكَيْ بَ؞ كَمَرْ يَدَّ يَكٜىٰ أَرُبُوثٜىٰ ثٜىٰوَ ‏«‏ذَاغٜىٰ ذَاغٜىٰنْ مَاسُ يِمَكَ ذَاغِ سُنْ ڢَاطُواْ عَكَيْنَ؞»‏

⁴ غَمَا دُكْ أَبِنْدَ عَكَ رُبُوتَ تُنْدَا عَثِكِنْ رُبُوتَثِّيَرْ مَغَنَرْ اللَّهْ أَنْرُبُوتَ نٜىٰ دُواْمِنْ عَكُواْيَرْ دَمُو، دُواْمِنْ مُذَمَ دَ سَا ذُوثِيَا تَوُرِنْ جِمْرٜىٰوَ دَ ڧَرْڢَڢَاوَا وَطَنْدَ رُبُوتَثِّيَرْ مَغَنَرْ اللَّهْ سُكَنْ بَامُ؞

⁵ بَرِ اللَّهْ مَيْ بَادَ جِمْرٜىٰوَ دَ ڧَرْڢَڢَاوَا يَكَيْكُ غَ يَدَّ ذَاكُيِ حَڧُرِ دَ جُونَ أَ سَعَدَّ كُنَ بِنْ غُرْبِنْ أَلْمَسِيحُ عِيسَىٰ؞

⁶ تَهَكَ دُكَنْكُ ذَاكُ كَسَنْثٜىٰ دَ بَاكِ طَيَ دَ نُڢِ طَيَ كُمَ، كُنَ طَوْكَكَ اللَّهْ وَنْدَ شِينٜىٰ عُبَنْ عُبَنْ‌غِجِنْمُ عِيسَىٰ أَلْمَسِيحُ؞

⁷ كُكَرْٻِ جُونَ حَنُّ بِيُ بِيُ كَمَرْ يَدَّ أَلْمَسِيحُ يَكَرْٻٜىٰكُ حَنُّ بِيُ بِيُ دُوانْ كُسَا أَطَوْكَكَ اللَّهْ؞

⁸ غَمَا إِنَ دَيْ غَيَ مُكُ ثٜىٰوَ دَلِيلِنْ دَ أَلْمَسِيحُ يَذَمَ مَيْيِنْ حِدِمَ غَ يَهُودَاوَا شِينٜىٰ دُواْمِنْ أَ نُونَ غَسْكِيَرْ كَلْمَرْ اللَّهْ، عَكُمَ تَبَّتَرْ دَ أَلْكَوَرَنْ دَ عَكَيِ وَكَاكَنِّنْ كَاكَنِّنْسُ،

⁹ دُوانْ كُمَ وَطَنْدَ بَا يَهُودَاوَا بَسُ طَوْكَكَ اللَّهْ سَبُواْدَ جِنْڧَنْسَ؞ كَمَرْ يَدَّ يَكٜىٰ أَرُبُوثٜىٰ ثٜىٰوَ ‏«‏سَبُواْدَ وَنَّنْ، يَا عُبَنْ‌غِجِ، ذَنْ يَبٜىٰكَ عَثِكِنْ أَلْعُمَّيْ، ذَنْ رٜىٰرَ وَاڧَرْ يَبُواْ غَ سُونَنْكَ؞»‏

¹⁰ رُبُوتَثِّيَرْ مَغَنَرْ اللَّهْ تَسَاكٜىٰ ثٜىٰوَ ‏«‏يَا كُو وَطَنْدَ بَا يَهُودَاوَا بَ، كُيِ ڢَضٍ ثِكِ تَرٜىٰدَ مُتَنٜىٰنْ اللَّهْ؞»‏

¹¹ أَنْ ڧَارَ دَ ثٜىٰوَ ‏«‏كُيَبِے عُبَنْ‌غِجِ، يَا كُو وَطَنْدَ بَا يَهُودَاوَا بَ دُكَ، كُيِ مَسَ يَبُواْ، يَا كُو ڧَبِيلُ دُكَ؞»‏

¹² كُمَ عِشَايَ يَثٜىٰ، ‏«‏وَنِ دَغَ تُوشٜىٰنْ يٜىٰسّٜىٰ ذَيْ بَيَّنَ، ذَيْ تَاشِ يَيِ مُلْكٍ وَطَنْدَ بَا يَهُودَاوَا بَ، أَغَرٜىٰشِنٜىٰ ڧَبِيلُ ذَاسُسَا ذُوثِيَا؞»‏

¹³ بَرِ اللَّهْ مَيْ كَٰوُاْ سَا ذُوثِيَا يَبَاكُ ثِكَكّٜىٰنْ ڢَضٍ ثِكِ دَ سَلَمَ أَ سَعَدَّ كُكٜىٰ بَادَ غَسْكِيَ غَرٜىٰشِ، دُواْمِنْ كُيَلْوَتَ دَ سَا ذُوثِيَا تَوُرِنْ إِيكُوانْ رُوحُ مَيْ ڟَرْكِے؞

حِدِمَرْ بُلُسْ غَ وَطَنْدَ بَا يَهُودَاوَا بَ

¹⁴ یَنْعُوَنَ، نِے دَكَيْنَ نَأَمِنْثٜىٰ ثٜىٰوَ كُو دَ كَنْكُ كُنَ ثِكٜىٰ دَ كِرْكِ كُنَ كُمَ ثِكٜىٰ دَ ثِكَكّٜىٰنْ سَنِ، حَرْ كُنْ إِسَ كُكُواْيَ وَجُونَنْكُ؞

¹⁵ أَ رُبُوتُنَّنْ نَوَ نَڢِتَ أَ ڢِيلِ سُواْسَيْ إِنَ مَغَنَ عَكَنْ وَطَنْسُ أَبُبُوَ دُوانْ إِنْتُنَ مُكُ دَسُو؞ نَيِ وَنَّنْ كُوَ بِسَغَ أَلْحٜىٰرِنَّنْ وَنْدَ اللَّهْ يَيِ مِنِ،

¹⁶ وَنْدَ يَسَا نِے إِنْ ذَمَ مَيْ حِدِمَرْ أَلْمَسِيحُ عِيسَىٰ غَ وَطَنْدَ بَا يَهُودَاوَا بَ؞ إِنَ عَيْكِنْ ڢِرِسْتِ تَوُرِنْ حِدِمَرْ شٜىٰلَرْ لَابَرِ مَيْ دَاطِے نَ اللَّهْ دُوانْ وَطَنْدَ بَا يَهُودَاوَا بَسُ ذَمَ هَدَايَ مَيْ كَرْٻُوَ غَ اللَّهْ، وَطَنْدَ عَكَ ڟَرْكَكٜىٰسُ تَوُرِنْ رُوحُ مَيْ ڟَرْكِے؞

¹⁷ سَبُواْدَ حَكَ إِنَ عِيَيِنْ تَاڧَمَ ثِكِنْ أَلْمَسِيحُ عِيسَىٰ غَمٜىٰدَ عَيْكِنْ دَ نَكٜىٰيِ وَ اللَّهْ؞

¹⁸ بَذَنْيِ ڧَرْڢِنْ حَلِ إِنْيِ مَغَنَ غَمٜىٰدَ وَنِ أَبُبَ، سَيْدَيْ أَبِنْدَ أَلْمَسِيحُ يَعَيْكَتَ تَوُرِينَ؞ وَنَّنْ أَبُ كُوَ شِينٜىٰ يَدَّ عَكَ جَٰوُاْ وَطَنْدَ بَا يَهُودَاوَا بَ غَ يِنْ بِيَيَّ غَ اللَّهْ تَوَجٜىٰنْ مَغَنَاتَ دَ عَيْكِنَ،

¹⁹ تَوَجٜىٰنْ إِيكُوانْ عَلَمُ دَ أَيُّكَنْ بَنْ مَامَاكِ، دُكَ كُوَ تَوُرِنْ إِيكُوانْ رُوحٌ اللَّهْ نٜىٰ؞ وَتُواْ دَغَ عُرُوشَلِيمَ نَكٜىٰوَيٜىٰ حَرْ ذُوَا إِلِرِكُمْ نَيِ شٜىٰلَرْ لَابَرِ مَيْ دَاطِے نَ أَلْمَسِيحُ، حَرْ نَثِكَ عَيْكِنَّنْ دُكَ؞

²⁰ عَكُواْيَوْشٜىٰ نِيَّتَ عِتَثٜىٰ إِنْيِ وَعَظِنْ لَابَرِ مَيْ دَاطِے أَدُكْ عِنْدَ بَعَسَنْ أَلْمَسِيحُ بَ، دُواْمِنْ كَدَ يَذَمَ ثٜىٰوَ إِنَيِنْ غِنِ عَكَنْ تُوشٜىٰنْ دَ وَنِ نٜىٰ دَبَمْ يَكَڢَ؞

²¹ أَ مَيْمَكُوانْ حَكَ، سَيْدَيْ كَمَرْ يَدَّ يَكٜىٰ أَرُبُوثٜىٰ ثٜىٰوَ ‏«‏وَطَنْدَ بَعَتَٻَ ڢَطَا مُسُ لَابَرِنْسَبَ، ذَاسُ غَنِ، وَطَنْدَ بَسُ تَٻَجِنْ لَابَرِنْسَبَ، ذَاسُ غَانٜىٰ؞»‏

²² وَنَّنّٜىٰ يَسَا سَوْ دَيَوَ عَكَ هَنَنِ ذُوَا وُرِنْكُ؞

شِرِنْ بُلُسْ يَظِيَرْثِ رُواْمَ

²³ يَنْذُ كَمْ نَارِغَا نَاغَمَ عَيْكِنَ أَوُرَارٜىٰنَّنْ؞ تُنْدَيَكٜىٰ تُنْشٜىٰكَرُ مَاسُيَوَ إِنَ مَرْمَرِنْ ذُوَا وُرِنْكُ دُواْمِنْ إِنْ غَنْكُ،

²⁴ نَشِرْيَ إِنْظِيَرْثٜىٰكُ يَنْذُ؞ إِنَ ڢَاتَا ثٜىٰوَ أَ لُواْكَثِنْ دَ ذَنْ وُثٜىٰ ذُوَا ڧَسَرْ سِڢٜىٰنْ، ذَنْبِے تَوُرِنْكُ إِنْكَٰوُاْ زِيَارَ؞ إِنَ ڢَاتَا كُمَ بَايَنْدَ نَاجِ دَاطِنْ ذَمَ تَرٜىٰدَكُو نَطَنْ لُواْكَثِ، ذَنْ ثِيغَبَدَ تَڢِيَاتَ ذُوَا ثَنْ تَرٜىٰدَ تَيْمَكُوانْكُ؞

²⁵ يَنْذُ كَمْ ذَانِ عُرُوشَلِيمَ دُوانْ إِنْ كَيْ تَيْمَكُواْ وَڟَرْكَكَنْ دَسُكٜىٰ وُرِنْ؞

²⁶ جَمَعَرْ مَاسُبِے وَدَّ تَكٜىٰ أَ مَكِدُواْنِيَ دَ كُمَ أَ عَكَيَ سُنْ جِ دَاطِنْ بَادَ ݣَوْتَيْ دُواْمِنْ تَيْمَكُوانْ وَطَنْدَ سُكٜىٰ دَ رَشِ ثِكِنْ ڟَرْكَكَنْ عُرُوشَلِيمَ؞

²⁷ سُنْجِ دَاطِنْ يِنْ حَكَ، كُواْدَيَكٜىٰ لَلَّيْ وَنَّنْ كَمَرْ حَكِّ نٜىٰ عَكَنْسُ؞ دَيَكٜىٰ وَطَنْدَ بَا يَهُودَاوَا بَ سُنْ سَامِ نَاسُ رَبُوانْ أَلْبَرْكُنْ رُوحَنِيَ دَغَ يَهُودَاوَا، يَذَمَ مُسُ كَمَرْ بَاشِ كٜىٰنَنْ سُيِ أَمْڢَانِ دَ أَلْبَرْكُنْسُ نَدُونِيَا دُواْمِنْ سُبِيَ بُڧَاتَرْ يَهُودَاوَا؞

²⁸ إِنْ كُوَ نَغَمَا وَنَّنْ عَيْكِ، نَكُمَ تَبَّتَرْ ثٜىٰوَ نَدَنْڧَ مُسُ وَنَّنْ تَيْمَكُوانْ دَ عَكَ بَايَرْ سَبُواْدَسُو، ذَنْ كَامَ حَنْيَ ذُوَا سِڢٜىٰنْ، إِنْكُمَ كَٰوُاْ زِيَارَ سَعَدَّ ذَنْ وُثٜىٰ ذُوَا ثَنْ؞

²⁹ نَتَبَّتَرْ ثٜىٰوَ إِنْ نَا ذُواْ وُرِنْكُ، ذَنْذُواْ نٜىٰ دَ ثِكَكِّيَرْ أَلْبَرْكَرْ أَلْمَسِيحُ؞

³⁰ یَنْعُوَ، سَبُواْدَ عُبَنْ‌غِجِنْمُ عِيسَىٰ أَلْمَسِيحُ دَ كُمَ بِسَغَ ڧَوْنَرْ دَ رُوحُ يَكٜىٰ بَايَرْوَ، إِنَ ضُواْڧُوانْكُ ثٜىٰوَ كُتَيْمَكٜىٰنِ ثِكِنْ ڢَامَتَا تَوُرِنْ يِنْ أَدُّعَ غَ اللَّهْ سَبُواْدَنِ؞

³¹ كُيِ أَدُّعَ دُوانْ إِنْسَامِ ڟِيرَا دَغَ حَنُّنْ مَرَسَ بِے عَيَنْكِنْ يَهُودِيَ، دُواْمِنْ كُمَ تَيْمَكُوانْ دَ ذَنْ بَايَرْ أَ عُرُوشَلِيمَ يَذَمَ أَبِنْ كَرْٻَ غَ ڟَرْكَكَنْ دَسُكٜىٰ أَوُرِنْ؞

³² تَهَكَ كُوَ، عِدَنْ نُڢِنْ اللَّهْ نٜىٰ، ذَنْعِسُواْ وُرِنْكُ دَ ڢَضٍ ثِكِ، إِنْكُمَ سَامِ هُوتَوَا تَرٜىٰدَكُو؞

³³ اللَّهْ مَيْ بَادَ سَلَمَ يَكَسَنْثٜىٰ تَرٜىٰدَكُو دُكَ؞ أَمِينْ؞