رُعُيَرْ دَ عَكَيِ وَ يَحْيَى 8 - أَتَّوْرَتْ دَ أَنَّبَاوَا

هَاتِمِ نَبَݣَويْ

¹ دَ طَنْ ضَغُوانْ يَٻَلّٜىٰ هَاتِمِ نَبَݣَويْ، سَيْ عَكَيِ شِضُ أَ سَمَ كَمَرْ رَبِنْ أَوَ طَيَ؞

² سَعَنً نَغَ مَلاَىِٕكُ غُدَا بَݣَويْ وَطَنْدَ سُكٜىٰ ڟَيٜىٰ أَغَبَنْ اللَّهْ، عَكَبَاسُ ڧَهُواْ غُدَا بَݣَويْ؞

³ غَا كُمَ وَنِ مَلاَىِٕكَ وَنْدَ يَكٜىٰ رِڧٜىٰ دَ ݣُونُوانْ ظِينَارِيَ نَڧُواْنَ تُرَارٜىٰ مَيْ ڧَنْشِ يَا ذُواْ يَا ڟَيَ أَغَبَنْ بَغَدٜىٰنْ؞ عَكَ بَاشِ تُرَارٜىٰ مَيْ يَوَ دُواْمِنْ يَهَطَ دَ أَدُّعُواْعِ نَدُكَنْ ڟَرْكَكَنْ اللَّهْ، يَكُمَ مِيڧَشِ عَكَنْ بَغَدٜىٰنْ ظِينَارِيَرْ دَيَكٜىٰ غَبَنْ كُجٜىٰرَرْ مُلْكٍ؞

⁴ هَيَاڧِے نَتُرَارٜىٰنْ كُوَ تَرٜىٰدَ أَدُّعُواْعِنْ ڟَرْكَكَا سُكَتَاشِ دَغَ حَنُّنْ مَلاَىِٕكَنْ، سُكَ هَوْ ذُوَا غَبَنْ اللَّهْ؞

⁵ سَيْ مَلاَىِٕكَنْ يَطَوْكِ ݣُونُواْ نَڧُواْنَ تُرَارٜىٰنْ، يَثِكَشِ دَ وُتَادَغَ بَغَدٜىٰنْ، يَجٜىٰڢَرْ دَشِ عَدُونِيَا؞ سَيْ عَكَيِ ڟَاوَ دَ ڧَرَرَّكِ دَ وَلْڧِيَ دَ كُمَ ضَوَرْ ڧَسَا؞

ڧَهُواْنِ بَݣَويْ

⁶ سَعَنً مَلاَىِٕكُنَّنْ بَݣَويْ مَاسُ ڧَهُواْنِنَّنْ سُكَيِ شِرِ سُبُوسَسُ؞

⁷ مَلاَىِٕكَ نَڢَرْكُواْ يَبُوسَ ڧَهُوانْسَ؞ سَيْغَا ڧَنْڧَرَ دَ وُتَا، غَوْرَايٜىٰ دَ جِنِ، عَكَ ظُبَرْ دَسُو عَدُونِيَا؞ وُتَرْ كُمَ تَثِنْيٜىٰ كَشِ طَيَ بِسَ عُكُ نَدُونِيَرْ، تَكُمَ ثِنْيٜىٰ كَشِ طَيَ بِسَ عُكُ نَ عِتَتُوَ دَ دُكَنْ طَنْيٜىٰنْ ثِيَوَ؞

⁸ مَلاَىِٕكَ نَبِيُ يَبُوسَ ڧَهُوانْسَ؞ سَيْغَا وَنِ أَبُ مَيْ كَمَ دَ بَبَّنْ تُدُ مَيْ ڟَوُاْ، مَيْ ثِنْ وُتَا، أَنْجٜىٰڢَرْ دَشِ ثِكِنْ تٜىٰكُ؞ كَشِ طَيَ بِسَ عُكُ نَتٜىٰكُنْ يَجُويَ يَذَمَ جِنِ،

⁹ كَشِ طَيَ بِسَ عُكُ نَحَلِتُّنْ دَسُكٜىٰ دَ رَيْ نَوَنَّنْ سَاشٜىٰنْ تٜىٰكُنْ سُكَ مُتُ، كُمَ كَشِ طَيَ بِسَ عُكُ نَاجِضَاغٜىٰنْ ضُوً دَسُكٜىٰ أَوُرِنْ سُكَ هَلَّكَ؞

¹⁰ مَلاَىِٕكَ نَعُكُ يَبُوسَ ڧَهُوانْسَ؞ سَيْغَا وَنِ بَبَّنْ تَوْرَرُواْ مَيْ وَلْڧِيَ كَمَرْ ڧُنْشِنْ هَرْشٜىٰنْ وُتَا يَسَوْكُواْ دَغَ سَمَ، يَڢَاطَ عَكَنْ كَشِ طَيَ بِسَ عُكُ نَكُواْغُنَ دَ كُمَ عَكَنْ مَٻُٻُّغَرْ ضُوَ؞

¹¹ سُونَنْ تَوْرَرُواْنَّنْ كُوَ ‏«‏طَٰثِے»‏ نٜىٰ؞ كَشِ طَيَ بِسَ عُكُ نَضُوً يَجُويَ يَذَمَ دَ طَاثِ، مُتَنٜىٰ دَيَوَ دَ سُكَشَا ضُوً سُكَ مُتُ سَبُواْدَ طَاثِنْسَ؞

¹² مَلاَىِٕكَ نَهُطُ يَبُوسَ ڧَهُوانْسَ؞ سَيْ عَكَ بُغِ كَشِ طَيَ بِسَ عُكُ نَرَانَ، كَشِ طَيَ بِسَ عُكُ نَوَتَ دَ كُمَ كَشِ طَيَ بِسَ عُكُ نَتَوْرَرِ، حَرْ كَشِ طَيَ بِسَ عُكُ نَحَصْكٜىٰنْسُ يَذَمَ دُهُ؞ تَهَكَ سَيْ يَذَمَ بَابُ حَصْكٜىٰ عَكَشِ طَيَ بِسَ عُكُ نَيِنِ، حَكَكُمَ كَشِ طَيَ بِسَ عُكُ نَدَرٜىٰ؞

¹³ سَعَنً نَدُوبَ، سَيْنَجِ وَتَ غَغَّڢَ وَدَّ تَكٜىٰ تَاشِ أَڟَكِيَرْ سَرَرِنْ سَمَ تَنَ كُوكَا دَ بَبَّرْ مُرْيَ، تَنَ ثٜىٰوَ ‏«‏كَيْتُواْ!‏ كَيْتُواْ!‏ كَيْتُوانْكُ، كُو دَ كُكٜىٰ ذَمَ عَدُونِيَا، سَعَدَّ أَنْبُوسَ سَوْرَنْ ڧَهُواْنِنَّنْ دَ مَلاَىِٕكُنَّنْ عُكُ سُكٜىٰ شِرِنْ بُوسَوَ!‏»‏