رُعُيَرْ دَ عَكَيِ وَ يَحْيَى 2 - أَتَّوْرَتْ دَ أَنَّبَاوَاسَڧُواْ ذُوَاغَ أَڢِسَ 1 «رُبُوتَ وَمَلاَىِٕكَنْ جَمَعَرْ مَاسُبِے أَعَڢِسَ ثٜىٰوَ «غَا سَڧُواْ دَغَ وَنَّنْ وَنْدَ يَكٜىٰ رِڧٜىٰ دَ تَوْرَرِنَّنْ بَݣَويْ أَ حَنُّنْ دَامَنْسَ، وَنْدَ كُمَ يَكٜىٰ تَڢِيَ ثِكِنْ سَنْدُنَنْ ظِينَارِيَ غُدَا بَݣَويْ مَاسُ رِڧٜىٰ ڢِتِلُ؞ 2 «نَاسَنْ أَيُّكَنْكَ؞ نَاسَنْ ڢَامَرْدَ كَيِ ثِكِنْ عَيْكِنْبِے دَكُمَ حَڧُرِنْ جِمْرٜىٰوَرْكَ؞ نَاسَنِ بَذَاكَ عِيَيِنْ حَڧُرِ دَ مُوغَيٜىٰنْ مُتَنٜىٰبَ؞ كَا كُمَ ڠُودَ وَطَنْدَ سُكٜىٰثٜىٰ دَكَنْسُ مَنْذَنِّے، عَمَّا بَهَكَسُكٜىٰبَ، كُمَ سَيْ كَتَرَرْ ثٜىٰوَ سُو مَنْذَنِّےنْ ڧَضْيَا نٜىٰ؞ 3 نَاسَنِ كَنَ حَڧُرِ، كَنَ كُمَ جِمْرٜىٰوَ ثِكِنْ وَهَلَ سَبُواْدَ سُونَنَ، كُمَ بَكَ غَجِبَ؞ 4 عَمَّا غَا لَيْڢِنْكَ، كَابَرْ ڧَوْنَرْكَ تَڢَرْكُواْ؞ 5 تُنَ دَ مَڟَيِنْكَ أَدَا كَاڢِنْ كَڢَاطِ! كَتُوبَ دَغَ ذُنُوبِنْكَ كَكُواْمَ كَنْ أَيُّكَنْكَ نَڢَرْكُواْ؞ إِنْ بَكَ تُوبَبَ، ذَنْذُواْ وُرِنْكَ إِنْطَوْكٜىٰ سَنْدَا مَيْ رِڧٜىٰ ڢِتِلَرْكَ دَغَ وُرِنْ ذَمَنْسَ؞ 6 عَمَّا أَوَنِ غٜىٰڢٜىٰ كَمْ كَݣَوْتَا يَدَّ كَڧِ أَيُّكَنْ نِكُواْلَتَاوَا كَمَرْ يَدَّ نِے مَا نَكٜىٰڧِنْسُ؞ 7 «دُكْ مَيْ كُنّٜىٰنْجِ، بَرِ يَجِ أَبِنْدَ رُوحُ يَكٜىٰثٜىٰ وَدُكَنْ جَمَعَرْ مَاسُبِے! دُكَنْ وَنْدَ يَثِنَصَرَا، ذَنْبَاشِ دَامَرْ ثِنْ یَیَنْ إِتَاثٜىٰ مَيْ بَادَ رَيْ وَنْدَ يَكٜىٰ ثِكِنْ غُواْنَرْ اللَّهْ؞» سَڧُواْ ذُوَاغَ سِمِرْنَ 8 «رُبُوتَ وَمَلاَىِٕكَنْ جَمَعَرْ مَاسُبِے نَ سِمِرْنَ ثٜىٰوَ «غَا سَڧُواْ دَغَ وَنْدَ يَكٜىٰ ڢَرْكُواْ دَ كُمَ ڧَرْشٜىٰ، وَنْدَ يَمُتُ يَكُمَ سَاكٜىٰ رَايُوَا؞ 9 «نَسَنْ عَذَابَرْ دَ كَكٜىٰ ثِكِ؞ نَكُمَسَنْ تَلَوْثِنْكَ، عَمَّا كَنَدَ أَرْزِڧِ نَ رُوحُ؞ نَسَنْ دَ مَغَنَرْ ٻَاتَ سُونَ تَوَطَنْدَ سُكٜىٰثٜىٰوَ سُو يَهُودَاوَا نٜىٰ عَمَّا كُوَ بَهَكَبَ، سُو ڧُنْغِيَرْ شَيْطَنْ نٜىٰ؞ 10 كَدَ كَجِڟُواْرُوانْ وَهَلَرْ دَ ذَاكَشَا؞ غَاشِ، مُوغُنَّنْ ذَيْسَا أَجٜىٰڢَ وَطَنْسُنْكُ ثِكِنْ كُرْكُكُ دُواْمِنْ أَڠُودَكُ؞ ذَاكَشَا عَذَابَرْ نَنْ ݣُونَ غُواْمَ؞ عَمَّا كَيِ أَمِنْثِ ثِكِنْ بَنْغَسْكِيَ كُواْ دَ ذَاعَ كَشٜىٰكَ، نِے كُوَ ذَنْبَاكَ رَيْ وَنْدَ شِينٜىٰ هُولَرْ لَادَ نَرَيْ؞ 11 «دُكْ مَيْ كُنّٜىٰنْجِ، بَرِ يَجِ أَبِنْدَ رُوحُ يَكٜىٰثٜىٰ وَجَمَعَرْ مَاسُبِے! دُكْ وَنْدَ يَثِ نَصَرَا، مُتُوَ تَبِيُ بَذَاتَ تَٻَشِيبَ كُواْ كَطَنْ؞» سَڧُواْ ذُوَاغَ بِرْغَمُمْ 12 «رُبُوتَ وَمَلاَىِٕكَنْ جَمَعَرْ مَاسُبِے نَ بِرْغَمُمْ ثٜىٰوَ «غَا سَڧُواْ دَغَ وَنَّنْ وَنْدَ يَكٜىٰ رِڧٜىٰ دَ تَكُواْبِے مَيْ بَاكِ بِيُ مَيْثِ سُواْسَيْ؞ 13 «نَسَنِ ثٜىٰوَ كَنَ ذَمَ أَ عِنْدَ شَيْطَنْ يَكٜىٰ مُلْكِ؞ دُكْدَهَكَ كَرِڧٜىٰ سُونَنَ دَ ڧَرْڢِے، كُمَ بَكَ تَٻَ دَيْنَ غَسْكَتَاوَ دَنِے بَ؞ كَا دَاغٜىٰ ثِكِنْ بَنْغَسْكِيَ عِنْدَ شَيْطَنْ يَكٜىٰ مُلْكِ كُواْدَيَكٜىٰ عَثِكِنْكُ أَنْكَشٜىٰ أَنْتِڢَسْ وَنْدَ يَشَيْدَا نِے دَ أَمِنْثِ؞ 14 عَمَّا غَا وَطَنْسُ لَيْڢُواْڢِنْدَ نَسَامٜىٰكَ دَسُو؞ أَݣَويْ وَطَنْسُ مُتَنٜىٰ عَثِكِنْكُ وَطَنْدَ سُكٜىٰبِنْ كُواْيَرْوَرْ بَلَعَمْ، وَنْدَ يَكُواْيَاوَ بَلَكْ يَا سَا إِسْرَٰٓءِيلَاوَا سُنْيِ لَيْڢِے، سُنْثِ عَبِنْثِنْ دَ عَكَيِ وَغُمَكَ هَدَايَ، سُنْ كُمَيِ لَلَتَ؞ 15 حَكَ مَا كَيْ كَكٜىٰ دَ مُتَنٜىٰ وَطَنْدَ سُكٜىٰبِنْ كُواْيَرْوَرْ نِكُواْلَتَاوَا؞ 16 سَيْ كَتُوبَ يَنْذُ! إِنْ بَهَكَبَ كُوَ، بَدَدَطٜىٰوَبَ ذَنْذُواْ مَكَ إِنْكُمَ يَاڧٜىٰكَ دَتَكُواْبِنْ دَيَكٜىٰ ڢِتُواْوَ دَغَ بَاكِنَ؞ 17 «دُكْ مَيْ كُنّٜىٰنْجِ، بَرِ يَجِ أَبِنْدَ رُوحُ يَكٜىٰثٜىٰ وَجَمَعَرْ مَاسُبِے؞ دُكْ وَنْدَ يَثِنَصَرَا، ذَنْبَاشِ دَغَ مَنَّ دَ عَكَ ٻُواْيٜىٰ؞ ذَنْ كُمَ بَاشِ ڢَضٍ دُوڟٜىٰ وَنْدَ عَكَ رُبُوتَ سَابُوانْ سُونَ عَكَنْسَ وَنْدَ بَابُوَنِ وَنْدَ يَسَنْ سُونَنْ، سَيْ وَنْدَ يَكَرْٻِ دُوڟٜىٰنْ؞» سَڧُواْ ذُوَاغَ تَيَتِرَ 18 «رُبُوتَ وَمَلاَىِٕكَنْ جَمَعَرْ مَاسُبِے نَ تَيَتِرَ ثٜىٰوَ «غَا سَڧُواْ دَغَ طَنْ اللَّهْ، مَيْ إِدَانُو كَمَرْ هَرْشٜىٰنْ وُتَا، وَنْدَ ڧَڢَاڢُنْسَ سُنَ ڨَلِّ كَمَرْ تَغُلَّرْ دَ عَكَغُواْغٜىٰ؞ 19 نَاسَنْ أَيُّكَنْكَ دَ ڧَوْنَرْكَ دَ أَمِنْثِنْكَ؞ نَاسَنْ حِدِمَرْكَ دَ جِمْرٜىٰوَرْكَ؞ نَاسَنِ ثٜىٰوَ أَيُّكَنْكَ نَيَنْظُ سُنْڢِے نَڢَرْكُوانْ؞ 20 عَمَّا غَا لَيْڢِنْدَ نَسَامٜىٰكَ دَشِ، كَنَ حَڧُرِ دَ مَثٜىٰنَّنْ يٜىٰظٜىٰبٜىٰلْ، وَدَّ تَكٜىٰثٜىٰ دَ كَنْتَ أَنَّبِيَ؞ تَوُرِنْ كُواْيَرْوَرْتَ تَنَ رُوطِنْ بَايِنَ حَرْ سُكَيِ لَلَتَ سُكَ كُمَثِ عَبِنْثِنْ دَ عَكَ مِيڧَا وَغُمَكَ هَدَايَ؞ 21 نَا بَاتَ ظَرَڢِ دُواْمِنْ تَتُوبَ دَغَ كَارُوَنْثِنْتَ عَمَّا تَڧِے؞ 22 غَاشِ، ذَنْسَا تَيِ مُوغُنْ ثِيوُاْ، إِنْكُمَسَا وَطَنْدَ سُكٜىٰ ظِنَ دَ عِتَ سُشَا عَذَابَ مَيْ ذَاڢِ، عِدَنْ بَسُ تُوبَ دَغَ مُوغَيٜىٰنْ أَيُّكَنْ دَسُكٜىٰيِ تَرٜىٰدَ عِتَبَ؞ 23 ذَنْ كَشٜىٰ وَطَنْدَ سُكٜىٰبِنْ كُواْيَرْوَرْتَ؞ دُكَنْ جَمَعَرْ مَاسُبِے كُوَ ذَاسُسَنِ ثٜىٰوَ نِنٜىٰ مَيْبِنْثِكٜىٰنْ تُنَانِ دَ ذُوثِيَارْ كُواْوَ، ذَنْ كُوَ سَاكَ وَكُواْوَ ڠُورْڠُودُوانْ أَيُّكَنْسَ؞ 24 «عَمَّا سَوْرَنْكُ أَ تَيَتِرَ بَكُبِے مُوغُوَرْ كُواْيَرْوَرْتَبَ؞ بَكُ كُواْيِ أَبِنْدَ مَاسُبِنْتَ سُكٜىٰثٜىٰ دَشِ، ‹أَسِيرَنْ شَيْطَنْ مَاسُ ظُرْڢِ› بَ؞ إِنَثٜىٰ مُكُ، بَذَنْ سَا مُكُ وَنِ نَوْيِبَ، 25 سَيْدَيْ كُرِڧٜىٰ بَنْغَسْكِيَرْكُ دَ ڧَرْڢِے، سَيْ نَا سَاكٜىٰ دَاوُاْوَ؞ 26 دُكَ وَنْدَ يَثِنَصَرَا، يَكُمَ ثِيغَبَدَ يِنَبِنْدَ نَكٜىٰسُواْ حَرْ ڧَرْشٜىٰ، ذَنْبَاشِ إِيكُواْ يَيِ مُلْكِ عَكَنْ أَلْعُمَّيْ؞ 27 ذَيْ يِمُلْكِ عَكَنْسُ دَ سَنْدَنْ ڧَرْڢٜىٰ، ذَيْ ڢَرْڢَشٜىٰسُ كَمَرْ تُݣُونٜىٰنْ لَاكَ؞ 28 «كَمَرْ يَدَّ نِے مَا نَكَرْٻِ إِيكُواْ دَغَ وُرِنْ عُبَانَ، ذَنْبَاشِ إِيكُوانْ؞ ذَنْ كُمَ بَاشِ تَوْرَرُوانْ سَڢٜىٰ؞ 29 «دُكْ مَيْ كُنّٜىٰنْجِ، بَرِ يَجِ أَبِنْدَ رُوحُ يَكٜىٰثٜىٰ وَجَمَعَرْ مَاسُبِے!» |
Hausa Common Language Ajami Bible © The Bible Society of Nigeria, 2020
Bible Society of Nigeria