رُعُيَرْ دَ عَكَيِ وَ يَحْيَى 16 - أَتَّوْرَتْ دَ أَنَّبَاوَا

ݣُونُواْنِ بَݣَويْ نَڢُشِنْ اللَّهْ

¹ سَيْنَجِ وَتَ بَبَّرْ مُرْيَ تَنَ مَغَنَ دَغَ هَيْكَلِنْ، تَنَ غَيَ وَمَلاَىِٕكُ بَݣَويْ طِنَّنْ ثٜىٰوَ ‏«‏كُتَڢِے كُجُويٜىٰ وَدُونِيَا وَطَنَّنْ ݣُونُواْنِ بَݣَويْ نَڢُشِنْ اللَّهْ؞»‏

² دَغَ نَنْ مَلاَىِٕكَ نَڢَرْكُواْ يَتَڢِے يَجُويٜىٰ أَبِنْدَ يَكٜىٰ عَݣُونُوانْسَ عَكَنْ دُونِيَا؞ سَيْ وَطَنْسُ مُوغَيٜىٰنْ مِيكِ مَاسُ ذَاڢِ سُواْسَيْ سُكَ ڢِتُواْ أَجِكِنْ مُتَنٜىٰنْ دَسُكٜىٰ دَ لَمْبَرْ وَنَّنْ دَبَّ، وَطَنْدَ سُكَ كُمَيِ وَصِڢَّرْتَ سُجَّدَ؞

³ مَلاَىِٕكَ نَبِيُ يَجُويٜىٰ أَبِنْدَ يَكٜىٰ ثِكِنْ ݣُونُوانْسَ عَكَنْ تٜىٰكُ؞ ضُوً تٜىٰكُ كُوَ يَا جُويَا يَا ذَمَ كَمَرْ جِنِنْ مُتُمِنْ دَ يَمُتُ، سَيْ دُكَنْ حَلِتُّنْ دَسُكٜىٰ دَ رَيْ وَطَنْدَ سُكٜىٰ ثِكِنْ تٜىٰكُ سُكَ مُتُ؞

⁴ سَيْ مَلاَىِٕكَ نَعُكُ يَجُويٜىٰ أَبِنْدَ يَكٜىٰ ثِكِنْ ݣُونُوانْسَ عَكَنْ كُواْغُنَ دَ مَٻُٻُّغَرْ ضُوَ، سَيْ سُكَ ذَمَ جِنِ؞

⁵ نَاكُوَجِ مَلاَىِٕكَ وَنْدَ يَكٜىٰدَ إِيكُواْ عَكَنْ ضُوَ يَاثٜىٰ، ‏«‏كَيْ مَيْغَسْكِيَانٜىٰ أَ شَرِيعَرْكَ، يَا مَيْ ڟَرْكِے، وَنْدَ كَكٜىٰ عَيَنْظُ، كَكٜىٰ كُمَ أَدَا؞

⁶ غَمَا مُتَنٜىٰ سُنْ ظُبْدَ جِنِ، جِنِنْ ڟَرْكَكَا دَ نَأَنَّبَوَ؞ غَاشِ يَنْذُ كَبَاسُ جِنِ سُشَا، سَكَمَكُوانْسُ كٜىٰنَنْ!‏»‏

⁷ سَيْنَجِ مُرْيَ دَغَ بَغَدٜىٰنْ تَنَ ثٜىٰوَ ‏«‏يَا عُبَنْ‌غِجِ اللَّهْ مَيْ إِيكُواْ دُكَ!‏ شَرِيعَرْكَ مَيْ غَسْكِيَثٜىٰ، مَيْ أَدَلْثِنٜىٰ كُمَ؞»‏

⁸ سَيْ مَلاَىِٕكَ نَهُطُ يَجُويٜىٰ أَبِنْدَ يَكٜىٰ ثِكِنْ ݣُونُوانْسَ عَكَنْ رَانَ، عَكَ كُوَ يَرْدَ مَتَ تَڧُواْنٜىٰ مُتَنٜىٰ دَ ڟَنَنِنْ ذَاڢِنْتَ؞

⁹ سَيْ ڟَنَنِنْ ذَاڢِنَّنْ يَڧُواْنٜىٰ مُتَنٜىٰ، حَرْ سُكَيِ مَغَنْ‌غَنُنْ صَاٻُواْ غَ سُونَنْ اللَّهْ، شِے دَ يَكٜىٰدَ إِيكُواْ عَكَنْ وَطَنَّنْ بَلَعِ؞ عَمَّا بَسُ تُوبَ سُنْ طَوْكَكَ غِرْمَنْسَبَ؞

¹⁰ سَيْ مَلاَىِٕكَ نَبِيَرْ يَجُويٜىٰ أَبِنْدَ يَكٜىٰ ثِكِنْ ݣُونُوانْسَ عَكَنْ كُجٜىٰرَرْ مُلْكٍ وَنَّنْ دَبَّ؞ سَيْ دُهُ يَرُڢٜىٰ مُلْكٍ دَبَّرْ، مُتَنٜىٰ كُوَ سُكَ ثِجِ هَرْشٜىٰنْسُ سَبُواْدَ عَذَابَ،

¹¹ سُكَ كُمَيِ صَاٻُواْ غَ اللَّهْ نَسَمَ سَبُواْدَ عَذَابَرْسُ دَ مِيكِنْسُ؞ عَمَّا بَسُ تُوبَ دَغَ مُوغَيٜىٰنْ أَيُّكَنْسُبَ؞

¹² مَلاَىِٕكَ نَشِدَ يَجُويٜىٰ أَبِنْدَ يَكٜىٰ ثِكِنْ ݣُونُوانْسَ عَكَنْ بَبَّنْ كُواْغِنْ يُڢِرٜىٰتِسْ؞ سَيْ كُواْغِنْ يَبُوشٜىٰ، دُواْمِنْ أَ شِرْيَ وَسَرَاكُنَنْ دَغَ غَبَسْ حَنْيَ؞

¹³ سَيْنَغَ أَلْجَنُ مَاسُ ڧَظَنْتَا غُدَا عُكُ وَطَنْدَ سُكَيِ كَمَ دَ ݣُوطِ؞ طَيَ يَنَ ڢِتُواْوَ دَغَ بَاكِنْ دُواْدُواْنَّنْ مَيْ صِڢَّرْ مَثِيجِ، طَيَ كُمَ دَغَ بَاكِنْ وَنَّنْ دَبَّ، طَيَ كُمَ دَغَ بَاكِنْ أَنَّبِنَّنْ نَڧَضْيَا؞

¹⁴ سُو رُوحُواْحِنْ أَلْجَنُ نٜىٰ وَطَنْدَ سُكٜىٰيِنْ عَلَمُنْ بَنْ مَامَاكِ، سُنَ كُوَ ڢِتَ ذُوَا وُرِنْ دُكَنْ سَرَاكُنَنْ دُونِيَا، دُواْمِنْ سُتَتَّرَاسُ سَبُواْدَ يَاڧِ عَبَبَّرْ رَانَرْ نَنْ تَ اللَّهْ مَيْ إِيكُواْ دُكَ؞

¹⁵ كُتُنَ أَلْمَسِيحُ يَاثٜىٰ ‏«‏غَانِ نَنْ ذُوَا كَمَرْ ٻَرَوُاْ!‏ مَيْ أَلْبَرْكَنٜىٰ دُكْ وَنْدَ يَكٜىٰ ذَمَنْ ڟَرُواْ، يَكٜىٰ كُمَ سَنْيٜىٰ دَ رِيغُنَنْسَ، دُواْمِنْ كَدَ يَيِ تَڢِيَ ڟِرَرَ، أَغَ ڟِرَيْثِنْسَ؞»‏

¹⁶ سَيْ أَلْجَنُنْ سُكَ تَتَّارَ سَرَاكُنَنَّنْ وُرِے طَيَ، أَوُرِنْ دَ عَكٜىٰثٜىٰ دَشِ أَرْمَغٜىٰدُّوانْ؞

¹⁷ مَلاَىِٕكَ نَبَݣَويْ يَجُويٜىٰ أَبِنْدَ يَكٜىٰ ثِكِنْ ݣُونُوانْسَ أَسَرَرِنْ سَمَ؞ سَيْ وَتَ بَبَّرْ مُرْيَ تَڢِتُواْ دَغَ كُجٜىٰرَرْ مُلْكٍ عَثِكِنْ هَيْكَلِنْ، تَنَ ثٜىٰوَ ‏«‏أَنْ‌غَمَ!‏»‏

¹⁸ سَيْ عَكَيِ وَلْڧِيَ دَ ڧَرَرَّكِ دَ ڟَاوَ دَ كُمَ بَبَّرْ ضَوَرْ ڧَسَا إِرِ وَدَّ بَعَتَٻَيِبَ تُنْ حَلِتَّرْ مُتُمْ؞ بَبَّرْ ضَوَرْ ڧَسَاثٜىٰ ڨُورَيْ؞

¹⁹ بَبَّنْ بِرْنِنَّنْ كُوَ يَا رَبُ كَشِ عُكُ، بِرَنٜىٰنْ دُكَنْ أَلْعُمَّيْ كُوَ سُكَ رُشٜىٰ؞ سَيْ اللَّهْ يَا تُنَ دَ بَابِيلَ مَيْغِرْمَ، يَا كُمَسَا تَشَا ݣُوڢْ نَڢُشِنْسَ مَيْ ڟَنَنِنْ غَسْكٜىٰ؞

²⁰ كُواْوَنٜىٰ ڟِبِرِے يَنُڟٜىٰ، مَنْيَنْ تُدَّيْ كُمَ بَعَڧَارَ غَنِنْسُبَ؞

²¹ مَنْيَنْ ڧَنْڧَرَ، مَاسُ نَوْيِ وَجٜىٰنْ كِلُواْ حَمْسِنْ، سُكَ ڢَاطُواْ دَغَ سَمَ عَكَنْ مُتَنٜىٰ حَرْ مُتَنٜىٰ سُكَيِ صَاٻُواْ غَ اللَّهْ سَبُواْدَ بَلَعِنْ ڧَنْڧَرَرْ، غَمَا بَلَعِنْ يَيِ مُونِ ڨُورَيْ!‏