رُعُيَرْ دَ عَكَيِ وَ يَحْيَى 12 - أَتَّوْرَتْ دَ أَنَّبَاوَا

وَتَ مَثٜىٰ دَ دُواْدُواْ مَيْ صِڢَّرْ مَثِيجِ

¹ سَيْ عَكَ غَ وَتَ بَبَّرْ عَلَمَ مَيْ بَنْ مَامَاكِ أَ سَمَ، وَتَ مَثٜىٰ تَنَ أَ لُلُّٻٜىٰ دَ رَانَ، تَنَ ڟَيٜىٰ عَكَنْ وَتَ، عَكَنْتَ كُوَ أَݣَويْ هُولَرْ مُلْكِ تَتَوْرَرِ غُواْمَشَا بِيُ؞

² تَنَدَ ثِكِ، تَنَ كُمَ كُوكَنْ حَيْڢُوَ سَبُواْدَ عَذَابَرْ ذَاڢِنْ حَيْڢُوَ؞

³ سَيْ عَكَ كُمَ غَ وَتَ عَلَمَ أَ سَمَ، غَ كُوَ وَنِ جَنْ دُواْدُواْ مَيْ صِڢَّرْ مَثِيجِ مَيْ كَوُنَ بَݣَويْ دَ ڧَهُواْنِ غُواْمَ دَ هُولُنَ بَݣَويْ نَسَرْكِے عَكُواْوَنٜىٰ كَنْسَ؞

⁴ سَيْ وُڟِيَرْسَ تَجَا كَشِ طَيَ بِسَ عُكُ نَتَوْرَرِ تَڢِدَّسُو دَغَ سَمَ، تَجِڢَرْ دَسُو عَڧَسَا؞ سَعَنً دُواْدُواْنَّنْ مَيْ صِڢَّرْ مَثِيجِ يَڟَيَ أَغَبَنْ مَثٜىٰنْ دَ نُڢِ ثٜىٰوَ عِدَنْ تَحَيْڢُ يَثِنْيٜىٰ طَنْتَ؞

⁵ تَا كُوَ حَيْڢِ طَا نَمِجِ، وَنْدَ ذَيْ يِمُلْكٍ دُكَنْ أَلْعُمَّيْ دَ سَنْدَنْ ڧَرْڢٜىٰ، عَمَّا عَكَ ڨُوثٜىٰ طَنْ، عَكَ كَيْ شِ أَوُرِنْ اللَّهْ دَ كُجٜىٰرَرْ مُلْكِنْسَ؞

⁶ مَثٜىٰنْ كُوَ تَغُدُ ذُوَا دَاجِ، ذُوَا وَنِ وُرِنْ دَ اللَّهْ يَشِرْيَ مَتَ، عِنْدَ ذَاعَ لُورَ دَ عِتَ حَرْ ݣُونَ دُبُو طَيَ دَ طَرِے بِيُ دَ سِتِّنْ؞

⁷ سَيْ يَاڧِ يَتَاشِ أَ سَمَ؞ مِيكَآءِيلُ تَرٜىٰدَ مَلاَىِٕكُنْسَ سُكَ يَاڧِ دُواْدُواْنَّنْ مَيْ صِڢَّرْ مَثِيجِ، دُواْدُوانْ كُوَ تَرٜىٰدَ مَلاَىِٕكُنْسَ سُكَيِ تَيَاڧِ؞

⁸ عَمَّا عَكَثِ دُواْدُواْنَّنْ دَ يَاڧِ، عَكَ كُواْرِ شِ تَرٜىٰدَ مَلاَىِٕكُنْسَ، عَكَ كُمَ حَنَ سُذَمَ أَ سَمَ دَغَ وَنَّنْ لُواْكَثِ؞

⁹ سَيْ عَكَ جٜىٰڢَ ڧَتُوانْ دُواْدُواْنَّنْ ڧَسَا، وَتُواْ دُواْدُواْ مَيْ صِڢَّرْ مَثِيجِنَّنْ نَتُنْدَا، وَنْدَ عَكٜىٰ ثٜىٰ دَشِ مُوغُنْ، كُواْ كُمَ شَيْطَنْ، وَنْدَ يَرُوطِ دُكَنْ دُونِيَا؞ عَكَ جٜىٰڢَشِ ڧَسَا عَدُونِيَا تَرٜىٰدَ مَلاَىِٕكُنْسَ؞

¹⁰ سَيْنَجِ وَتَ بَبَّرْ مُرْيَ أَ سَمَ تَنَ ثٜىٰوَ ‏«‏يَنْذُ ڢَا، ثٜىٰتُواْ دَغَ اللَّهْ نْمُ، دَ إِيكُوانْسَ دَ مُلْكِنْسَ، دَ إِيكُوانْ أَلْمَسِيحُنْسَ سُنْثِكَ؞ غَمَا أَنْجٜىٰڢَرْ دَ مَيْ ڧَارَرْ یَنْعُوَنْمُ ڧَسَا، شِے دَيَكٜىٰ ڧَارَرْ یَنْعُوَنْمُ أَغَبَنْ اللَّهْ نْمُ دَرٜىٰ دَ رَانَ؞

¹¹ سُنْ كُوَيِ نَصَرَا عَكَنْسَ تَوُرِنْ جِنِنْ طَنْ ضَغُواْنَّنْ، دَ كُمَ كَلْمُواْمِنْ شَيْدَرْسُ، غَمَا سُنْ يَرْدَ سُبَادَ رَنْسُ حَرْ غَ مُتُوَ؞

¹² سَبُواْدَ حَكَ سَيْكُيِ ڢَضٍ ثِكِ، يَا كُو سَمَّيْ دَ كُو مَذَوْنَ عَثِكِ!‏ يَا كٜىٰ دُونِيَا دَكَيْ تٜىٰكُ، كَيْتُوانْكُ!‏ غَمَا مُوغُنَّنْ يَا سَوْكُواْ مُكُ، ثِكٜىٰ دَ ڢُشِے غَمَا يَا سَنْ لُواْكَثِنْسَ يَا ضَغٜىٰ كَطَنْ!‏»‏

¹³ دَ دُواْدُواْنَّنْ مَيْ صِڢَّرْ مَثِيجِنْ يَغَانٜىٰ ثٜىٰوَ أَنْجٜىٰڢَشِ ڧَسَا، سَيْ يَڢَارَ بِنْ مَثٜىٰنَّنْ دَ تَحَيْڢِ طَا نَمِجِ؞

¹⁴ عَمَّا عَكَبَا مَثٜىٰنَّنْ ڢِكَڢِكَيْ بِيُ نَبَبَّرْ غَغَّڢَ دُواْمِنْ تَتَاشِ سَمَ تَرَبُ دَ مَثِيجِنَّنْ، تَجٜىٰ ثِكِنْ دَاجِ عِنْدَ عَكَ شِرْيَ ذَاعَ لُورَ دَ عِتَ حَرْ لُواْكَثِ طَيَ دَ لُواْكَتَيْ دَ رَبِنْ لُواْكَثِ؞

¹⁵ سَيْ دُواْدُوانْ يَڢِتَرْ دَ ضُوَ دَغَ بَاكِنْسَ كَمَرْ كُواْغِ عَبَايَنْ مَثٜىٰنْ، دُواْمِنْ أَمْبَلِيَرْ ضُوً يَتَڢِے دَ عِتَ؞

¹⁶ عَمَّا ڧَسَا تَتَيْمَكِ مَثٜىٰنْ؞ ڧَسَرْ تَبُوطٜىٰ بَاكِنْتَ تَشَنْيٜىٰ ضُوً كُواْغِنْ دَ يَڢِتُواْ دَغَ بَاكِنْ دُواْدُوانْ؞

¹⁷ سَيْ دُواْدُوانْ يَيِ ڢُشِے دَ مَثٜىٰنْ ڨُورَيْ، يَتَاسُواْ يَيِ ڢَطَ دَ سَوْرَنْ ذُرِيَرْ مَثٜىٰنْ، وَتُواْ دُكَنْ وَطَنْدَ سُكٜىٰ كِيَايٜىٰ دُواْكُواْكِنْ اللَّهْ، سُنَ كُمَ رِڧٜىٰ دَ شَيْدَرْ عِيسَىٰ؞

¹⁸ سَيْ دُواْدُوانْ يَڟَيَ عَكَنْ يَشِ نَبَاكِنْ تٜىٰكُنْ؞