زَبُورَا 91 - أَتَّوْرَتْ دَ أَنَّبَاوَا

تَبَّثِنْ كِيَايٜىٰوَا تَ اللَّهْ

¹ دُكْ وَنْدَ يَٻُواْيٜىٰ كَنْسَ أَوُرِنْ مَڢِے طَوْكَكَ، يَنَ يِنْ ذَمَنْسَ عَ إِنُوَرْ مَيْ إِيكُواْ دُكَ،

² ذَيْ عِيَثٜىٰ وَ يَهْوٜىٰهْ، ‏«‏كَيْ نٜىٰ وُرِنْ ٻُيَنَ دَ كَتَنْ‌غَتَا، كَيْنٜىٰ اللَّهْ نَا، أَغَرٜىٰكَ نَكٜىٰ دُواْغَضَ؞»‏

³ غَمَا شِينٜىٰ ذَيْ كُٻُتَرْ دَكَيْ دَغَ تَرْكُوانْ مَيْ ڢَرَوْتَ، دَغَ كُمَ بَلَعِ مَيْ كَٰوُاْ مُتُوَ؞

⁴ ذَيْ رُڢٜىٰكَ دَ ڢِكَڢِكَنْسَ، عَڧَرْڧَشِنْ ڢِكَڢِكَنْسَ ذَاكَسَامِ وُرِنْ ٻُيَ، أَمِنْثِنْسَ كُوَ يَنَ كٜىٰوَيٜىٰكَ يَنَ كُمَ ڟَرٜىٰكَ؞

⁵ بَذَاكَ جِڟُواْرُوانْ أَبُبُوَنْ بَرَظَنَرْ دَرٜىٰبَ، كُواْ كِبِيَرْ مَسِيڢَرْ دَ عَكٜىٰ هَرْبِے دَ رَانَ،

⁶ كُواْ بَلَعِنْ دَيَكٜىٰ ݣُونْتُوانْ ٻَوْنَ أَدُهُ، كُواْ مَسِيڢَرْ دَتَكٜىٰ كَٰوُاْ هَلَّكَرْوَ دَ رَانَ؞

⁷ كُواْ دَ مُتُمْ دُبُو سُنْ ڢَاطِ كُرْكُسَ دَكَيْ، مُتُمْ دُبُو غُواْمَ كُمَ أَ حَنُّنْ دَامَنْكَ، عَمَّا كَيْ، بَابُ أَبِنْدَ ذَيْسَامٜىٰكَ؞

⁸ كَيْ دَيْ سَيْ كَبُوطٜىٰ عِدُوانْكَ كَوَيْ كَنَ كَلُّوانْ حُكُنْثِنْ مُوغَيٜىٰ؞

⁹ دَيَكٜىٰ كَيْ كَثٜىٰ، ‏«‏يَهْوٜىٰهْ نٜىٰ وُرِنْ ٻُيَنَ، مَڢِے طَوْكَكَ كُمَ وُرِنْ ذَمَنَ،»‏

¹⁰ بَابُوَنِ مُوغُنْ أَبِنْدَ ذَيْسَامٜىٰكَ، كُواْ وَتَ ثُوتَرْ دَ ذَاتَ يِكُسَدَ غِدَنْكَ؞

¹¹ غَمَا ذَيْ عُمَرْثِ مَلاَىِٕكُنْسَ غَمٜىٰدَكَيْ سُكِيَايٜىٰكَ ثِكِنْ دُكَنْ هَنْيُواْيِنْكَ؞

¹² ذَاسُ تَرٜىٰكَ دَ حَنُّوَنْسُ دُواْمِنْ كَدَ كَبُغَ ڧَڢَرْكَ أَدُوڟٜىٰ؞

¹³ ذَاكَ تَاكَ ذَاكُواْكِ دَ مَثِيظَيْ، ذَاكَ تَتَّاكَ ذَاكُواْكِ مَاسُ ڧَرْڢِے دَ كُمَ مَثِيظَيْ مَاسُ دَڢِ؞

¹⁴ اللَّهْ يَثٜىٰ، ‏«‏تُنْدَ يَڧَوْنَثٜىٰنِ، ذَنْثٜىٰثٜىٰشِ، ذَنْ كِيَايٜىٰشِ سَبُواْدَ يَسَنْ سُونَنَ؞

¹⁵ ذَيْ كِرَا غَرٜىٰنِ، ذَنْ كُوَ أَمْسَ مَسَ، ذَنْ كَسَنْثٜىٰ تَرٜىٰ دَشِ أَ لُواْكَثِنْ وَهَلَ، إِنْكُٻُتَرْ دَشِ، إِنْكُمَ غِرْمَمَشِ؞

¹⁶ ذَنْ ڧُواْسَرْ دَشِ دَ ڟَوُانْ ݣُونَكِے، إِنْكُمَ نُونَ مَسَ ثٜىٰتُواْنَ؞»‏