زَبُورَا 83 - أَتَّوْرَتْ دَ أَنَّبَاوَا

كُوكَنْ نٜىٰمَ أَ حُكُنْتَ أَبُواْكَنْ غَابَنْ إِسْرَٰٓءِيلَ

﴿زَبُورَا تَ أَسَڢْ؞ وَاڧَثٜىٰ؞﴾

¹ يَا اللَّهْ، كَدَ كَيِ شِضُ، كَدَ كَڟَيَ ثِكْ، كَدَ كُمَ كَيِ ڟِتْ، يَا اللَّهْ!‏

² غَاشِ!‏ أَبُواْكَنْ غَابَنْكَ سُنَ هَيَانِيَ، مَاسُ ڧِنْكَ سُنَ تَادَكَيْ؞

³ سُنْيِ ڧُلّٜىٰ ڧُلّٜىٰ نَغَابَا دَ جَمَعَرْكَ، سُنْ حَطَ بَاكِ سُنَ غَابَا دَ مُتَنٜىٰنْ دَ كَكٜىٰ ڟَرٜىٰوَ؞

⁴ سُنَ ثٜىٰوَ ‏«‏كُذُواْ مُشَرٜىٰسُ دُوانْ أَلْعُمَّرْسُ تَا ڧَارٜىٰ، كَدَ عَڧَارَ تُنَ دَ سُونَنْ إِسْرَٰٓءِيلَ!‏»‏

⁵ سُنْ حَطَ بَاكِ دَ ذُوثِيَا طَيَ، سُنْيِ ڧُلّٜىٰ ڧُلّٜىٰ نَغَابَادَكَيْ، يَا اللَّهْ،

⁶ سُو مُتَنٜىٰنْ عٜىٰدُوامْ دَ نَ إِسْمَٰعِيلُ، دَ نَ مُواْوَبْ دَ نَ هَغَرَ،

⁷ حَرْ مَا دَ نَ غٜىٰبَلْ، دَ نَ أَمُّوانْ دَ نَ أَمَلٜىٰكْ، دُكْ دَ مُتَنٜىٰنْ ڢِلِسْتِيَ، تَرٜىٰدَ مَذَوْنَنْ تَيَ،

⁸ غَ مُتَنٜىٰنْ أَسُّرِيَ مَا سُنْ حَطَكَيْ دَسُو، سُكَ ڧَارَ وَظُرِيَرْ لُوطُ ڧَرْڢِنْ ڠُوِوَ؞

⁹ يِ دَسُو كَمَرْ يَدَّ كَيِ دَ مُتَنٜىٰنْ مَدْيَنَ، كَمَرْ سُواْجُواْجِنْ سِسٜىٰرَ دَ يَبِنْ أَ كُواْغِنْ كِشُوانْ،

¹⁰ سُو دَ سُكَ هَلَّكَ عَثَنْ غَرِنْ عٜىٰنْدُوارْ، غَوَوَّكِنْسُ سُكَ ذَمَ تَاكِ؞

¹¹ يِ دَ مَنْيَنْ مُتَنٜىٰنْسُ يَدَّ كَيِ دَ عُواْرٜىٰبْ دَ ظٜىٰيٜىٰبْ، يِدَ یَیَنْ سَرْكِنْسُ يَدَّ كَيِ دَ ظٜىٰبَ دَ ظَلْمُنَّ،

¹² وَطَنْدَ سُكَثٜىٰ، ‏«‏ذَامُ ڨُوثٜىٰ ڧَسَرْدَ تَكٜىٰ تَ اللَّهْ تَذَمَ تَامُ؞»‏

¹³ يَا اللَّهْ نَا، مَيْدَسُو كَمَرْ ڧُورَرْ غُوغُوَ، كَمَرْ دُوسَرْ دَ إِسْكَ تَكٜىٰ هُورَاوَ؞

¹⁴ كَمَرْ يَدَّ وُتَا تَكٜىٰثِنْ كُرْمِ، كَمَرْ يَدَّ هَرْشٜىٰنْ وُتَا يَكٜىٰثِنْ تُدَّيْ،

¹⁵ حَكَ نَنْ، كُواْرٜىٰسُ دَ إِسْكَ مَيْ ڧَرْڢِے، بَاسُ ڟُواْرُواْ دَ إِسْكَرْ غُوغُوَ؞

¹⁶ رُڢٜىٰ ڢُسْكَرْسُ دَ كُنْيَا دُواْمِنْ سُنٜىٰمِ سُونَنْكَ، يَا يَهْوٜىٰهْ؞

¹⁷ بَرِ سُشَا كُنْيَا سُكُمَ ڢِرْغِتَ حَرْ أَبَدَا، بَرِ سُهَلَّكَ ثِكِنْ ڧَسْڧَنْثِ!‏

¹⁸ بَرِ سُسَنْ ثٜىٰوَ كَيْ كَطَيْ نٜىٰ مَيْ سُنَ يَهْوٜىٰهْ، مَڢِے طَوْكَكَ أَدُكَنْ دُونِيَا؞