زَبُورَا 79 - أَتَّوْرَتْ دَ أَنَّبَاوَا

أَدُّعَ دَ كُوكَا غَمٜىٰدَ عُرُوشَلِيمَ

﴿زَبُورَا تَ أَسَڢْ؞﴾

¹ يَا اللَّهْ، أَرْنَ سُنْ شِغَ ڧَسَرْ غَادُوانْكَ، سُكَ ڧَظَنْتَرْدَ هَيْكَلِنْكَ مَيْ ڟَرْكِے، سُكَ رُرُّشٜىٰ عُرُوشَلِيمَ كَكَڢْ؞

² سُكَ بَرْ غَوَوَّكِنْ بَايِنْكَ سُذَمَ عَبِنْثِنْ ڟُنْڟَيٜىٰ، سُكَ بَرْ جِكُنَنْ مَاسُ ڧَوْنَرْكَ سُذَمَ عَبِنْثِنْ نَمُواْمِنْ دَاجِ؞

³ سُكَ ظُبْدَ جِنِنْ جَمَعَرْكَ كَمَرْ ضُوَ كُواْعِنَ أَ عُرُوشَلِيمَ، بَا كُوَ وَنِنْدَ يَرَغُ دُواْمِنْ يَبِنّٜىٰسُ؞

⁴ مُنْ ذَمَ أَبِنْ بَعَ غَ مَڨُوبْتَنْمُ، أَبِنْ دَارِيَا دَ غُواْرِ غَ وَطَنْدَ سُكٜىٰ كٜىٰوَيٜىٰ دَمُو؞

⁵ حَرْ يَوْشٜىٰ، يَا يَهْوٜىٰهْ؟ ذَاكَيِ ڢُشِے حَرْ أَبَدَا نٜىٰ؟ ذَاڢِنْ ڢُشِنْكَ ذَيْ يِتَثِ كَمَرْ وُتَانٜىٰ؟

⁶ ظُبَ ڢُشِنْكَ عَكَنْ أَلْعُمَّيْ أَرْنَنْ دَ بَسُ سَنْكَبَ، عَكَنْ مُلْكُواْكِ، مُلْكُواْكِنْ دَ بَسُ كِرَا غَ سُونَنْكَبَ،

⁷ غَمَا سُنْثِنْيٜىٰ ذُرِيَرْ يَعْڧُوبَ، سُنْ كُمَ مَيْدَ وُرَارٜىٰنْ ذَمَنْتَ كُڢَيْ؞

⁸ كَدَ كَحُكُنْتَمُ سَبُواْدَ ذُنُبَنْ كَاكَنِّنْمُ، بَرِ جِنْڧَنْكَ يَسَوْكُواْ دَ سَوْرِ عَبِسَنْمُ، غَمَا مُنْ ڢِدَّ ذُوثِيَا سَرَيْ؞

⁹ يَا اللَّهْ مَيْ ثٜىٰتُوانْمُ، كَتَيْمَكٜىٰمُ، دُواْمِنْ أَغِرْمَمَ سُونَنْكَ؞ كَكُٻُتَرْ دَمُو كَغَاڢَرْتَا مَنَ ذُنُبَنْمُ سَبُواْدَ غِرْمَنْ سُونَنْكَ؞

¹⁰ دُوانْمٜىٰ أَرْنَ ذَاسُثٜىٰ مَنَ، ‏«‏إِنَا اللَّهْ نْكُ؟»‏ أَ عِدُوانْمُ بَرِ كَسَا أَلْعُمَّيْ سُسَنِ كَنَ طَوْكَرْ ڢَنْسَرْ جِنِنْ بَايِنْكَ؞

¹¹ بَرِ نِشٜىٰ نِشٜىٰنْمُ، مُو دَ عَكَ كَامَ، يَكَيْ غَبَنْكَ؞ تَوُرِنْ إِيكُوانْكَ مَيْغِرْمَ، كُٻُتَرْدَ وَطَنْدَ عَكَ ڧَدَّرَ ذَاسُ مُتُ؞

¹² يَا عُبَنْ‌غِجِ، كَسَاكَ وَمَاسُ ذَمَ كُسَ دَمُو حَرْ سَوْ بَݣَويْ، سَبُواْدَ ذَاغٜىٰ ذَاغٜىٰنْ دَ سُكَيِ مَكَ؞

¹³ مُو جَمَعَرْكَ كُوَ، تُمَكِنْ غَرْكٜىٰنْكَ، ذَامُيِ تَغُواْدٜىٰ مَكَ حَرْ أَبَدَا، دَغَ ڟَارَا ذُوَا ڟَارَا ذَامُ لِسَّڢْتَا يَبُوانْكَ؞