زَبُورَا 63 - أَتَّوْرَتْ دَ أَنَّبَاوَا

سَا ذُوثِيَا غَ اللَّهْ

﴿زَبُورَا تَ دَاوُدَ، لُواْكَثِنْ دَيَكٜىٰ أَ دَاجِنْ يَنْكِنْ يَهُودَ؞﴾

¹ يَا اللَّهْ، كَيْنٜىٰ اللَّهْ نَا، دَنَاثٜىٰوَ نَنٜىٰمٜىٰكَ؞ رَيْنَ يَنَ مَرْمَرِنْكَ، جِكِينَ يَنَ جِنْ ڧِشِنْكَ كَمَرْ ڧَسَرْدَ تَبُوشٜىٰ، بَا كُواْمٜىٰ، بَا ضُوَ؞

² عِ، ذَنْ‌غَنْكَ أَ وُرِنْ ذَمَنْكَ مَيْ ڟَرْكِے، إِنْكُمَ دُوبِے إِيكُوانْكَ دَ طَوْكَكَرْكَ؞

³ دَرَجَرْ ڧَوْنَرْكَ مَرَرْ ثَنْجَاوَا تَڢِے مِنِ رَيْ عَدُونِيَا، سَبُواْدَ حَكَ بَاكِنَ ذَيْ يَبٜىٰكَ؞

⁴ ذَنْ يَبٜىٰكَ دُكَنْ ݣُونَكِنْ رَيْنَ، عَثِكِنْ سُونَنْكَ ذَنْ طَغَ حَنُّوَنَ إِنَ أَدُّعَ؞

⁵ رَيْنَ ذَيْ ڧُواْشِ دَكَيْ كَمَرْ دَ عَبِنْثِ مَڢِے ݣَوْ، بَاكِنَ ذَيْ يَبٜىٰكَ دَ وَاڧُواْڧِنْ ڢَضٍ ثِكِ؞

⁶ يَايِنْ دَ نَكٜىٰ ݣُونْثٜىٰ أَغَدُواْنَ، إِنَ تُنَانِنْكَ، دُكَنْ دَرٜىٰ إِنَ تَتُنَاوَ دَكَيْ،

⁷ غَمَا كَيْنٜىٰ مَيْ تَيْمَكُواْنَ؞ عَثِكِنْ إِنُوَرْ ڢِكَڢِكَنْكَ إِنَ رٜىٰرَ وَاڧَرْ ڢَضٍ ثِكِ؞

⁸ رَيْنَ يَمَنّٜىٰ مَكَ، حَنُّنْ دَامَنْكَ يَنَ رِڧٜىٰ دَنِے؞

⁹ وَطَنْدَ سُكٜىٰ نٜىٰمَ سُهَلَّكَ رَيْنَ، ذَاسُ غَنْ‌غَرَ ذُوَا وُرِنْ ذَمَنْ مَتَتُّو؞

¹⁰ ذَاعَكَكَّشٜىٰسُ دَ تَكُواْبِے، كَرْنُكَنْ دَاجِ ذَاسُثِنْيٜىٰسُ؞

¹¹ عَمَّا سَرْكِے ذَيْ يِڢَضٍ ثِكِ ثِكِنْ اللَّهْ؞ دُكَنْ مَاسُ ضَنْڟُوَارْ غَسْكِيَ دَ سُونَنْ اللَّهْ ذَاسُيِ مُرْنَ، عَمَّا ذَاعَ رُڢٜىٰ بَكُنَنْ مَاسُ ڧَضْيَا؞