زَبُورَا 6 - أَتَّوْرَتْ دَ أَنَّبَاوَا

كُوكَنْ نٜىٰمَنْ غَاڢَرَ لُواْكَثِنْ دَامُوَ

﴿عُمَرْنِ غَ شُوغَبَنْ مَوَاڧَ:‏ عَيِتَ دَ كَايَنْ كَطٜىٰ كَطٜىٰ إِرِنَّمُواْلُواْ بِسَغَ ‏«‏شٜىٰمِنِتْ»‏؞ زَبُورَا تَ دَاوُدَ؞﴾

¹ يَا يَهْوٜىٰهْ، كَدَ كَڟَاوَتَا مِنِ ثِكِنْ ڢُشِنْكَ، كَدَ كَهُواْرٜىٰنِ ثِكِنْ ذَاڢِنْ ڢُشِنْكَ؞

² يَا يَهْوٜىٰهْ، إِنَ مُتُوَ أَ حَنْكَلِ، جِ تَوْسَيِنَ، ڧَسُسُوَنَ سُنْ غَجِ تِلِسْ، سَابُنْتَا نِے!‏

³ يَا يَهْوٜىٰهْ، ذُوثِيَاتَ تَدَامُ ڨُورَيْ، حَرْ يَوْشٜىٰ ذَنْيِ تَجِرَا؟

⁴ جُويَا، يَا يَهْوٜىٰهْ، كَكُٻُتَرْدَ رَيْنَ!‏ سَبُواْدَ ڧَوْنَرْكَ مَرَرْ ثَنْجَاوَا، كَثٜىٰثٜىٰنِ؞

⁵ غَمَا عَثِكِنْ مَتَتُّو، وَ ذَيْ تُنَ دَكَيْ؟ بَاوَنْدَ ذَيْ يَبٜىٰكَ أَوُرِنْ ذَمَنْ مَتَتُّو؞

⁶ نَغَاجِ تِلِسْ سَبُواْدَ بَڧِنْ ثِكِ، كُواْوَنٜىٰ دَرٜىٰ غَدُواْنَ يَكَنْ جِڧٜىٰ سَبُواْدَ كُوكَنَ، مَتَاشِنْ كَيْنَ يَكَنْ جِڧٜىٰ شَرَڢْ دَ هَوَيٜىٰ؞

⁷ عِدَنُونَ سُنْ كُمْبُرَ دَݣَرْ نَكٜىٰ غَنِ، سَبُواْدَ يَوَنْ كُوكَنَ، كُوكَنْ دَ أَبُواْكَنْ غَابَنَ سُكَسَانِ؞

⁸ كُرَبُ دَنِے، كُو مَاسُ مُغُنْتَا!‏ غَمَا يَهْوٜىٰهْ يَا رِغَا يَا جِ كُوكَنَ؞

⁹ يَهْوٜىٰهْ يَا رِغَا يَاجِ ضُواْڧُواْنَ يَكَرْٻِ أَدُّعَتَ؞

¹⁰ بَرِ دُكَنْ أَبُواْكَنْ غَابَنَ سُشَا كُنْيَا، سُڢِرْغِتَ ڨُورَيْ؞ بَرِ سُجُويَا بَايَ، بَا ظَتُواْ سُشَا كُنْيَا؞