زَبُورَا 58 - أَتَّوْرَتْ دَ أَنَّبَاوَا

كُوكَا دُواْمِنْ رَامُوَا عَكَنْ مُوغَيٜىٰ

﴿عُمَرْنِ غَ شُوغَبَنْ مَوَاڧَ:‏ عَيِتَ بِسَغَ مُرْيَرْ ‏«‏كَدَ أَ هَلَّكَرْ؞»‏ زَبُورَا تَ دَاوُدَ؞ إِرِے تَ ‏«‏مِكْتَمْ»‏؞﴾

¹ كُو مَاسُ مُلْكِ، كُنَ بَادَ عُمَرْنِنْ دَيَكٜىٰ دَيْدَيْ كُوَ؟ كُنَيِ وَ یَنْ أَدَمْ شَرِيعَ ثِكِنْ غَسْكِيَ؟

² سَمْ!‏ كُو دَيْ، كُنَ ڧُلّٜىٰ ڧُلّٜىٰنْ مُغُنْتَا أَذُوثِيَارْكُ، عَيْكِنْ حَنُّوَنْكُ شِينٜىٰ تَادَ حَنْكَلِ عَدُونِيَا؞

³ تُنْدَغَ ثِكِنْ ثِكِ، مُوغَيٜىٰ سُكٜىٰ بَرِنْ حَنْيَرْ غَسْكِيَ؞ تُنْ كَاڢِنْ رَانَرْ حَيْڢُوَرْسُ، مَاسُ ڧَضْيَا سُكٜىٰبِنْ نَاسُ حَنْيَرْ؞

⁴ سُنَ ثِكٜىٰ دَ دَڢِ كَمَرْ نَمَثِظَيْ، سُكَنْ تُواْشٜىٰ كُنّٜىٰنْسُ كَمَرْ كُرْمَنْ مَثِيجِنَّنْ غُواْبٜىٰ دَنِيسَ،

⁵ كَمَرْ مَثِيظَنْ دَ بَاسَجِنْ مُرْيَ، مُرْيَرْ مَيْ وَسَ دَ مَثِيظَيْ، كُواْ كُمَ وَاڧَرْ ڠُونِنْ سِحِرِ؞

⁶ يَا اللَّهْ، كَكَّرْيَ هَڧُواْرَنْ دَسُكٜىٰ ثِذُواْ دَسُو!‏ يَا يَهْوٜىٰهْ، ثِثِّرٜىٰ هَڧُواْرَنْ ذَاكُواْكِنَّنْ مَاسُ ڧَرْڢِے!‏

⁷ بَرِ سُٻَثٜىٰ كَمَرْ يَدَّ ضُوَ يَكٜىٰ وُثٜىٰوَ دَ سَوْرِ، بَرِ عَتَتَّاكٜىٰسُ كَمَرْ ثِيَوَ عَكَنْ حَنْيَ؞

⁸ بَرِ سُذَمَ كَمَرْ كُواْطِنْ دَ يَكَنْ نَرْكٜىٰ يَذَمَ يَوْڧِ، بَرِ سُذَمَ كَمَرْ جَرِرِنْ دَ أَنْحَيْڢٜىٰشِ مَتَثّٜىٰ، كَمَرْ جَرِرِنْ دَ بَيْغَ حَصْكٜىٰنْ رَانَبَ؞

⁹ كَاڢِنْ تُݣُونٜىٰنْسُ سُجِ ذَاڢِنْ وُتَرْ إِتَاثٜىٰ، كُواْ إِتَاثٜىٰنْ سُنَ طَنْيٜىٰ كُواْ سُنْ بُوشٜىٰ، اللَّهْ ذَيْ كَوَرْدَ مُوغَيٜىٰنْ كَمَرْ إِسْكَرْ غُوغُوَ؞

¹⁰ مَاسُ أَدَلْثِے ذَاسُيِ ڢَضٍ ثِكِ سَعَدَّ سُكَغَ أَنَ رَامُوَا عَكَنْ مَاسُ مُغُنْتَا، سَعَدَّ سُكَ وَنْكٜىٰ ڧَڢَاڢُنْسُ ثِكِنْ جِنِنْ مُوغَيٜىٰ؞

¹¹ سَعَنً مُتَنٜىٰ ذَاسُثٜىٰ، ‏«‏لَلَّيْ، أَݣَويْ لَادَ غَ مَاسُ أَدَلْثِے، حَڧِيڧَ، أَݣَويْ اللَّهْ وَنْدَ ذَيْ شَرْعَنْتَ دُونِيَا؞»‏