زَبُورَا 52 - أَتَّوْرَتْ دَ أَنَّبَاوَا

حُكُنْثِنْ اللَّهْ دَ أَلْحٜىٰرِنْسَ

﴿عُمَرْنِ غَ شُوغَبَنْ مَوَاڧَ:‏ زَبُورَا تَ دَاوُدَ؞ إِرِے تَ ‏«‏مَسْكِلْ؞»‏ لُواْكَثِنْ دَ دُواْوٜىٰكْ مُتُمِنْ عٜىٰدُوامْ يَذُواْ يَڢَطَا وَ سَرْكِے طَالُوتَ ثٜىٰوَ أَهِمٜىٰلٜىٰكْ ڢِرِسْتِ يَٻُواْيٜىٰ دَاوُدَ أَغِدَنْسَ؞﴾

¹ مٜىٰيَسَا كَكٜىٰ تَاڧَمَ دَ مُغُنْتَارْكَ، يَا كَيْ بَبَّنْ مُتُمْ؟ مٜىٰيَسَا كَكٜىٰ تَاڧَمَ دُكَنْ يِنِ، يَا كَيْ مَيْ كُنْيَتَرْدَ اللَّهْ؟

² كَكَنْ شِرْيَ مُغُنْتَا، هَرْشٜىٰنْكَ كَمَرْ رٜىٰظَ يَكٜىٰ، كَيْ دَ كَكٜىٰ تَيَنْكَ ڧَضْيَا؞

³ كَا ڢِسُوانْ عَيْكَتَ مُغُنْتَا ڢِيٜىٰدَ أَلْحٜىٰرِ، دَ ڢَطِنْ ڧَضْيَا ڢِيٜىٰدَ غَسْكِيَ؞

⁴ كَا ثِكَ سُوانْ ڢَطِنْ مَغَنَ مَيْ كَٰوُاْ هَلَّكَ، يَا كَيْ سَرْكِنْ ڧَضْيَا!‏

⁵ دُواْمِنْ حَكَ اللَّهْ ذَيْ هَلَكَاكَ حَرْ أَبَدَا، ذَيْ كَامَكَ يَڢِظْغٜىٰكَ دَغَ غِدَنْكَ، ذَيْ تُمْٻُكٜىٰكَ دَغَ دُونِيَرْ مَاسُ رَيْ؞

⁶ مَاسُ أَدَلْثِے ذَاسُ غَا وَنَّنْ سُبُوطٜىٰ بَاكِ دُوانْ ڟُواْرُواْ، ذَاسُيِ مَكَ دَارِيَا سُثٜىٰ،

⁷ ‏«‏دُوبَ، حَكَ ذَيْ ڢَرُ دَ بَبَّنْ مُتُمْ وَنْدَ يَڧِ نٜىٰمَنْ ٻُيَ وُرِنْ اللَّهْ، عَمَّا يَدُواْغَرَ غَ يَوَنْ دُوكِيَرْسَ، يَڧَرْڢَڢَ كَنْسَ ثِكِنْ عَيْكَتَ مُغُنْتَارْسَ؞»‏

⁸ عَمَّا نِے دَيْ كَمَرْ طَنْيٜىٰنْ إِتَاثٜىٰنْ ظَيْتُنْ نٜىٰ عَثِكِنْ غِدَنْ اللَّهْ، إِنَ دُواْغَضَ غَ ڧَوْنَرْ اللَّهْ مَرَرْ ثَنْجَاوَا حَرْ أَبَدَا أَبَدِنْ؞

⁹ ذَنْ ثِيغَبَدَ يِمَكَ غُواْدِيَ حَرْ أَبَدَا سَبُواْدَ أَبِنْدَ كَيِ، ذَنْيِ شٜىٰلَرْ سُونَنْكَ أَغَبَنْ مَاسُ حَلِ إِرِنَّاكَ، دُواْمِنْ كَيْ مَيْ أَلْحٜىٰرِنٜىٰ؞