زَبُورَا 51 - أَتَّوْرَتْ دَ أَنَّبَاوَا

كُوكَنْ نٜىٰمَنْ غَاڢَرَ

﴿عُمَرْنِ غَ شُوغَبَنْ مَوَاڧَ:‏ زَبُورَا تَ دَاوُدَ سَعَدَّ أَنَّبِے نَتَنْ يَذُواْ وُرِنْسَ بَايَنْدَ يَݣُونَ دَ بَتْشٜىٰبَةُ؞﴾

¹ يِمِنِ جِنْڧَيْ، يَا اللَّهْ، بِسَغَ ڧَوْنَرْكَ مَرَرْ ثَنْجَاوَا؞ بِسَغَ يَوَنْ تَوْسَيِنْكَ، كَكَوَرْدَ ذُنُبَنْ غَنْ‌غَنْثِنَ؞

² وَنْكٜىٰنِ سَرَيْ دَغَ لَيْڢُواْڢِنَ، كَڟَبْتَثٜىٰنِ دَغَ ذُنُبَيْنَ!‏

³ غَمَا إِنَ سَنٜىٰ دَ ذُنُبَنْ غَنْ‌غَنْثِنَ، ذُنُبَيْنَ سُنَ أَغَبَنَ كُلُّمْ؞

⁴ كَيْ نٜىٰ كَطَيْ نَيِمَكَ ذُنُوبِ، نَيِ أَبِنْدَ يَكٜىٰ مُوغُ أَعِدُوانْكَ؞ دَيَكٜىٰ كَكَنْيِ غَسْكِيَ أَ شَرِيعَرْكَ، حُكُنْثِنْدَ كَيِ دَيْدَيْنٜىٰ؞

⁵ لَلَّيْ مَيْ لَيْڢِے نٜىٰنِ تُنْدَغَ رَانَرْ دَ عَكَ حَيْڢٜىٰنِ، مَيْ ذُنُوبِ نٜىٰنِ تُنْ مَامَاتَ تَطَوْكِ ثِكِنَ؞

⁶ لَلَّيْ كَنَ سُواْ إِنْيِ غَسْكِيَ دَغَ ذُوثِيَاتَ؞ كُواْيَ مِنِ حِكِمَ ثِكِ ثِكِنْ ذُوثِيَاتَ؞

⁷ يَيَّڢَا نِے دَ إِظُوابْ مَيْ جِنِنْ هَدَايَ، ذَنْ كُوَ ذَمَ مَرَرْ ڧَظَنْتَا ڟَڢْ!‏ وَنْكٜىٰنِ دَغَ ذُنُبَيْنَ، ذَنْ كُوَڢِ أَوْدُغَ ڢَرِ!‏

⁸ سَا إِنْجِ لَابَرِنْ غَاڢَرَرْكَ، ذَنْيِ ڢَضٍ ثِكِ دَ مُرْنَ؞ كَاكَرْيَ مِنِ ڠُوِوُاْيِنَ، يَنْذُ بَرِ كَسَا إِنْيِ ڢَضٍ ثِكِ؞

⁹ جُويَا ڢُسْكَرْكَ دَغَ ذُنُبَيْنَ، كَكَوَرْدَ دُكَنْ لَيْڢُواْڢِنَ؞

¹⁰ يَا اللَّهْ، بَرِ كَحَلِثِّ ذُوثِيَا مَرَرْ ڧَظَنْتَا عَثِكِنَ، كَبَانِ سَابُوانْ رُوحُ دَ ذُوثِيَا مَرَرْ ثَنْجَاوَا؞

¹¹ كَدَ كَكُواْرٜىٰنِ دَغَ غَبَنْكَ، كَدَ كَطَوْكٜىٰ مِنِ رُوحُنْكَ مَيْ ڟَرْكِے؞

¹² مَيَرْ مِنِ ڢَضٍ ثِكِ نَثٜىٰتُوانْكَ، كَبَانِ رُوحٌ بِيَيَّ دَ ذَيْ رِڧٜىٰنِ؞

¹³ سَعَنً ذَنْ كُواْيَرْ دَ حَنْيَرْكَ غَ مَاسُ ذُنُبَنْ غَنْ‌غَنْثِ، مَاسُ ذُنُوبِ كُوَ ذَاسُ جُويُواْ وُرِنْكَ؞

¹⁴ كُٻُتَرْ دَنِے دَغَ أَلْحَكِنْ ظُبْدَ جِنِ، يَا اللَّهْ، اللَّهْ نَثٜىٰتُواْنَ، هَرْشٜىٰنَ كُوَ ذَيْ يِشٜىٰلَرْ أَلْحٜىٰرِنْكَ؞

¹⁵ يَا يَهْوٜىٰهْ، بُوطٜىٰ مِنِ بَاكِ، بَاكِنَ كُوَ ذَيْ يِشٜىٰلَرْ يَبُوانْكَ؞

¹⁶ دَ هَدَايَ ثٜىٰ كَكٜىٰ جِنْ دَاطِنْتَ، أَيْ دَ نَمِيڧَ مَكَ؞ عَمَّا هَدَايَ تَڧُواْنَاوَا بَاتَ غَمْشٜىٰكَ؞

¹⁷ يَا اللَّهْ، هَدَايَ تَغَسْكٜىٰ أَوُرِنْكَ، عِتَثٜىٰ حَلِنْ سَوْڧِنْ كَيْ، حَلِنْ سَوْڧِنْ كَيْ دَ ذُوثِيَا مَيْ تُوبَ بَذَاكَڧِبَ، يَا اللَّهْ؞

¹⁸ بِسَغَ سُوانْ رَنْكَ، يَا اللَّهْ، كَيِ وَبِرْنِنْ سِهِيُواْنَ أَلْحٜىٰرِ، كَسَاكٜىٰ غِنَا كَتَنْ‌غَرْ عُرُوشَلِيمَ؞

¹⁹ سَعَنً نٜىٰ ذَاكَجِے دَاطِنْ هَدَايُ نَعَّيْنِحِ، هَدَايُنْ ڧُواْنَاوَا ذَاسُ ذَمَ مَكَ أَبِنْ كَرْٻَ، تَرٜىٰدَ وَطَنْدَ عَكَ مِيڧَ مَكَ طُنْ‌غُمْ؞ ذَاعَمِيڧَ هَدَايُنْ بِجِمَيْ عَكَنْ بَغَدٜىٰنْكَ؞