زَبُورَا 45 - أَتَّوْرَتْ دَ أَنَّبَاوَا

وَاڧَرْ طَوْرِنْ عَوْرٜىٰنْ سَرْكِے

﴿عُمَرْنِ غَ شُوغَبَنْ مَوَاڧَ:‏ عَيِتَ بِسَغَ مُرْيَرْ ‏«‏ڢُلَوَرْ دَاجِ»‏؞ زَبُورَا تَ یَیَ مَظَا نَ ڧَارُونَ؞ إِرِے تَ ‏«‏مَسْكِلْ»‏؞ وَاڧَرْ ڧَوْنَ؞﴾

¹ ذُوثِيَاتَ تَثِكَ دَ ݣَوَوَنْ كَلْمُواْمِ، نَا ڧِرْڧِرُواْ وَاڧَرْ نَنْ دُواْمِنْ سَرْكِے؞ هَرْشٜىٰنَ كَمَرْ أَبِنْ رُبُوتُو نَ مَيْ ڠُونِنْ رُبُوتُو؞

² يَا سَرْكِے، كَيْنٜىٰ مَڢِے ݣَوْ عَثِكِنْ دُكَنْ مَظَا، بَاكِنْكَ يَنَ ڢِتَرْدَ مَغَنَرْ أَلْحٜىٰرِ، اللَّهْ كُوَ يَ أَلْبَرْكَثٜىٰكَ حَرْ أَبَدَا؞

³ يَا كَيْ ڠُونِنْ يَاڧِ، كَيْ مَيْ طَوْكَكَ نٜىٰ مَيْ دَرَجَ، طَوْرَ تَكُواْبِنْكَ!‏

⁴ هَوْ كَيِتَڢِيَ ثِكِنْ دَرَجَرْكَ، يِتَڢِيَ ثِكِنْ نَصَرَا، دُواْمِنْ كَڟَرٜىٰ غَسْكِيَ دَ أَدَلْثِے؞ بَرِ حَنُّنْ دَامَنْكَ يَعَيْكَتَ أَيُّكَنْ بَنْ مَامَاكِ!‏

⁵ كِبِيُواْيِنْكَ سُنْيِ ڟِنِ سُواْسَيْ سُنَ سُواْكِ ظُكَاتَنْ أَبُواْكَنْ غَابَنْ سَرْكِے، ڧَبِيلُ سُنَ تَڢَاطُوَ عَڧَرْڧَشِنْكَ؞

⁶ كُجٜىٰرَرْ مُلْكِنْكَ دَغَ اللَّهْ نٜىٰ، نَهَرْ أَبَدَا أَبَدِنْ نٜىٰ، سَنْدَنْ مُلْكِنْكَ نَغَسْكِيَ نٜىٰ؞

⁷ عَيْكِنْ أَدَلْثِے نٜىٰ كَكٜىٰسُواْ، مُغُنْتَا كُمَ كَڧِ سَمْ!‏ شِيَسَا اللَّهْ، وَتُواْ اللَّهْ نْكَ، يَكٜىٰٻٜىٰكَ يَشَاڢٜىٰكَ دَ مَنْ ڢَضٍ ثِكِ يَغِرْمَمَكَ ڢِيٜىٰدَ أَبُواْكَنْكَ؞

⁸ رِيغُنَنْكَ سُنَ ڧَنْشِنْ تُرَارٜىٰنْ مُرْ، دَ نَأَلُواسْ دَ كُمَ نَكَسِّيَ؞ كَطٜىٰ كَطٜىٰ دَغَ غِدَاجٜىٰنْ سَرَاكُنَ، دَغَ غِدَاجٜىٰ مَاسُ أَدُوانْ هَڧُواْرَنْ غِيوَ، سُنَ ڢَرَنْتَ مَكَ رَيْ؞

⁹ عَثِكِنْ مَاتَانْدَ سُكٜىٰ أَغِدَنْكَ أَݣَويْ یَیَنْ سَرَاكُنَ، أَدَمَنْ كُجٜىٰرَرْ مُلْكِنْكَ سَرَوْنِيَ تَنَ ڟَيٜىٰ، سَنْيٜىٰ دَ كَايَنْ ظِينَارِيَ مَڢِے ݣَوْ؞

¹⁰ يَا كٜىٰ یَتَ، كِسَوْرَرَ كِجِ أَبِنْدَ ذَنْثٜىٰ، كِمَنْتَادَ مُتَنٜىٰنْكِ دَ دَنْ‌غِنْكِ؞

¹¹ سَرْكِے ذَيْ غَا ݣَنْكِ يَيِ مَرْمَرِنْكِ؞ تُنْدَ شِ مَيْغِدَنْكِ نٜىٰ، سَيْ كِيِمَسَ بِيَيَّ؞

¹² مُتَنٜىٰنْ تَيَ ذَاسُ كَٰوُاْ مِكِ ݣَوْتَيْ، مَاسُ أَرْزِڧِ ذَاسُ نٜىٰمِ أَلْحٜىٰرِنْكِ؞

¹³ أَمَرْيَرْ سَرْكِے تَنَ شِغُواْوَ غِدَنْ سَرْكِے، إِنَا مِصَالِنْ ݣَنْتَ!‏ أَنْ طِنْكَ رِغَرْتَ دَ ظَرٜىٰنْ ظِينَارِيَ؞

¹⁴ سَنْيٜىٰ دَ كَايَنْ أَدُواْ مَاسُ ݣَوْ، أَنَ كَيْ تَوُرِنْ سَرْكِے، أَبُواْكَنْتَ بُدُرْوَيْ سُنَ رَكِيَرْتَ؞

¹⁵ ثِكِنْ ڢَضٍ ثِكِ دَ مُرْنَ أَنَ بِيدَسُو، سُنَ شِغُواْوَ غِدَنْ سَرْكِے؞

¹⁶ يَا سَرْكِے، ذَاكَ حَيْڢِ یَیَ مَظَا دَيَوَ، ذَاسُ طَوْكِ مَڟَيِنْ كَاكَنِّنْكَ، ذَاكَسَا سُيِ مُلْكٍ دُكَنْ دُونِيَا؞

¹⁷ ذَنْسَا عَتُنَ دَ سُونَنْكَ دَغَ ڟَارَا ذُوَا ڟَارَا دُواْمِنْ ڧَبِيلُ سُيَبٜىٰكَ حَرْ أَبَدَا أَبَدِنْ؞