زَبُورَا 44 - أَتَّوْرَتْ دَ أَنَّبَاوَاكُوكَنْ بَڧِنْ ثِكِنْ جَمَعَ ﴿عُمَرْنِ غَ شُوغَبَنْ مَوَاڧَ: زَبُورَا تَ یَیَ مَظَا نَ ڧَارُونَ؞ إِرِے تَ «مَسْكِلْ؞»﴾ 1 يَا اللَّهْ، دَ كُنُّوَنْمُ مُكَجِ، كَاكَنِّنْمُ سُنْ غَيَ مَنَ، أَيُّكَنْدَ كَيِ عَݣُونَكِنْسُ، أَ زَامَانِنْ دَا؞ 2 دَ حَنُّنْكَ كَكُواْرِ أَلْعُمَّيْ، كَكَڢَ كَاكَنِّنْمُ عَڧَسَرْسُ؞ كَكُمَ حُكُنْتَ ڧَبِيلُ، عَمَّا كَسَا مُتَنٜىٰنْكَ سُكَ يَلْوَتَ؞ 3 بَ دَ تَكُواْبِنْسُ نٜىٰ جَمَعَرْكَ سُكَثِ ڧَسَرْ بَ، بَ دَ ڧَرْڢِنْ حَنُّنْسُ نٜىٰ سُكَيِ نَصَرَا بَ، عَمَّا دَ إِيكُوانْ حَنُّنْ دَامَنْكَ، دَ ڧَرْڢِنْ حَنُّنْكَ، دَ حَصْكٜىٰنْ كَسَنْثٜىٰوَرْكَ نٜىٰ، وَنْدَ يَنُونَ كَنَ جِنْ دَاطِنْسُ؞ 4 كَيْنٜىٰ سَرْكِينَ دَ اللَّهْ نَا، كَا عُمَرْتَ نَصَرَا دُواْمِنْ جَمَعَرْ يَعْڧُوبَ؞ 5 دَ إِيكُوانْكَ مُكَ رُشٜىٰ أَبُواْكَنْ غَابَنْمُ؞ دَ سُونَنْكَ مُكَ تَتَّاكَ مَاسُ غَابَادَمُو؞ 6 بَانَ دُواْغَضَ غَ بَكَنَ، بَ تَكُواْبِنَ بَنٜىٰ ذَيْثٜىٰثٜىٰنِ؞ 7 عَمَّا كَثٜىٰثٜىٰمُ دَغَ أَبُواْكَنْ غَابَنْمُ، كَكُمَ كُنْيَتَرْدَ مَاسُ ڧِنْ غَنِنْمُ؞ 8 عَثِكِنْكَ، يَا اللَّهْ، مُكٜىٰ تَاڧَمَ كُلُّمْ، ذَامُ مِيڧَ غُواْدِيَرْمُ غَ سُونَنْكَ حَرْ أَبَدَا؞ 9 عَمَّا يَنْذُ كَا يَاشٜىٰمُ، كَا كُمَسَا عَكُنْيَتَرْ دَمُو، كَا دَيْنَ ڢِتَ تَرٜىٰدَ سُواْجُواْجِنْمُ؞ 10 كَا سَا مُكَ غُدُ دَغَ أَبُواْكَنْ غَابَنْمُ، مَاسُ ڧِنْمُ سُكَ ݣُوشِ كَايَنْمُ؞ 11 كَا سَا مُكَ ذَمَ كَمَرْ تُمَكِنْ يَنْكَ، كَا وَاڟَرْ دَمُو عَثِكِنْ أَلْعُمَّيْ؞ 12 كَا سَيَرْ دَ جَمَعَرْكَ عَكَنْ طَنْ كُطِ كَطَنْ، بَكَثِ رِيبَرْ ثِنِكِنْبَ؞ 13 كَا سَا مَڨُوبْتَنْمُ سُنْيِ مَنَ بَعَ، مُنْ ذَمَ أَبِنْ غُواْرِ دَ دَارِيَا أَعِدُوانْ وَطَنْدَ سُكٜىٰ كٜىٰوَيٜىٰ دَمُو؞ 14 كَا سَا مُنْ ذَمَ أَبِنْ مِصَالِ عَثِكِنْ أَلْعُمَّيْ، ڧَبِيلُ سُنَ كَطَ مَنَ كَيْ نَرٜىٰنِ؞ 15 دُكْ يِنِ إِنَ ثِكِنْ ڧَسْڧَنْثِ، كُنْيَا تَرُڢٜىٰنِ كَكَڢْ، 16 سَبُواْدَ مَاسُ مَغَنَرْ بَنْظَ دَ ذَاغِ، سَبُواْدَ أَبُواْكَنْ غَابَنَ مَاسُ سُوانْ رَامُوَا؞ 17 دُكَنْ وَنَّنْ يَڢَرُ دَمُو كُواْدَيَكٜىٰ بَمُ مَنْتَادَكَيْبَ، كُواْ مُكَرْيَ يَرْجٜىٰجٜىٰنِيَرْكَ دَمُوبَ؞ 18 ذُوثِيَارْمُ بَتَ جُويَا دَغَ وُرِنْكَبَ، ڧَڢَاڢُنْمُ بَسُ بَرْ حَنْيَرْكَبَ؞ 19 دُكْدَهَكَ كَامُرْڧُشٜىٰمُ، كَابَرْمُ أَ حَنُّنْ كَرْنُكَنْ دَاجِ، كَابَرْمُ ثِكِنْ بَڧِنْ دُهُ؞ 20 دَاعَثٜىٰ مُنْ مَنْتَادَ سُونَنْ اللَّهْ نْمُ، كُواْ مُنْيِ وَوَنِ غُنْكِ سُجَّدَ، 21 دَ دُواْلٜىٰ كَغَانٜىٰ، غَمَا كَاسَنْ أَسِيرِنْ ذُوثِيَارْمُ؞ 22 سَبُواْدَ كَيْنٜىٰ عَكٜىٰ تَكَشٜىٰمُ كُلُّمْ، أَنْمَيْشٜىٰمُ كَمَرْ تُمَكِنْ يَنْكَ؞ 23 تَاشِ، يَا يَهْوٜىٰهْ! مٜىٰيَسَا كَكٜىٰ بَرْثِ؟ تَاشِ! كَدَ كَيَاشٜىٰمُ حَرْ أَبَدَا! 24 مٜىٰيَسَا كَكٜىٰ ٻُواْيٜىٰ ڢُسْكَرْكَ؟ دُوانْمٜىٰ كَكٜىٰ مَنْتَادَ وَهَلَرْمُ؟ دُوانْمٜىٰ بَكَ كُلَ دَ دَنِّيَرْ دَ عَكٜىٰمَنَ؟ 25 مُنْ ڢَاطِ أَنِّڧَ رَنْمُ عَڧَسَا، أَنْبَرْمُ ݣُونْثٜىٰ بَا ڧَرْڢِے ثِكِنْ ڧُورَا؞ 26 تَاشِ، كَتَيْمَكٜىٰمُ، ڢَنْشٜىٰمُ سَبُواْدَ ڧَوْنَرْكَ مَرَرْ ثَنْجَاوَا! |
Hausa Common Language Ajami Bible © The Bible Society of Nigeria, 2020
Bible Society of Nigeria