زَبُورَا 38 - أَتَّوْرَتْ دَ أَنَّبَاوَاكُوكَنْ تُوبَ نَمَيْ شَنْ وُيَ ﴿زَبُورَا تَ دَاوُدَ؞ دُواْمِنْ تُنَاوَا؞﴾ 1 يَا يَهْوٜىٰهْ، كَدَ كَڟَاوَتَا مِنِ ثِكِنْ ڢُشِنْكَ، كُواْ كَهُواْرٜىٰنِ ثِكِنْ هَوْشِنْكَ؞ 2 غَمَا كَايِ مِنِ رَوْنِ دَ كِبِيُواْيِنْكَ، كَاكُمَ بُغٜىٰنِ دَ حَنُّنْكَ؞ 3 سَبُواْدَ ڢُشِنْكَ جِكِينَ يَكَمُ دَ رَشِنْ لَاڢِيَ، جِكِينَ يَيِ تَرَمٜىٰوَ سَبُواْدَ ذُنُبَيْنَ؞ 4 ذُنُبَيْنَ سُنْ شَا كَيْنَ، كَمَرْ كَايَ مَيْ نَوْيِ سُنْڢِے ڧَرْڢِينَ؞ 5 سَبُواْدَ وَوَنْثِنَ نَيِنْ ذُنُوبِ، مِيكِنَ سُنْ رُٻٜىٰ حَرْ سُنَ وَرِ؞ 6 أَنْ تَنْڨُورٜىٰنِ، أَنْدَنّٜىٰنِ، دُكَنْ يِنِ إِنَ تَكُوكَا؞ 7 إِنَ ڢَامَ دَ ظَظْذَاٻِ، جِكِينَ يَيِ ذَاڢِ، إِنَ رَشِنْ لَاڢِيَ ڨُورَيْ؞ 8 نَغَاجِ تِلَسْ، أَنْكُمَ تَتَّاكٜىٰنِ ڨُورَيْ، رَيْنَ يَدَامُ سُواْسَيْ، إِنَ نِيشِ سَبُواْدَ ذَاڢِ؞ 9 يَا يَهْوٜىٰهْ، كَا سَنْ أَبِنْدَ نَكٜىٰ بُڧَاتَ، كَنَ كُمَ جِنْ دُكَنْ نِيشِنَ؞ 10 ذُوثِيَاتَ تَنَ بُغَوَ، ڧَرْڢِينَ يَڧَارٜىٰ، عِدَنُونَ كُمَ سُنْيِ دُهُ؞ 11 أَبُواْكَيْنَ دَ مَڨُوبْتَنَ بَاسَ ذُوَا كُسَدَنِے سَبُواْدَ مِيكِنَ، حَرْ عِيَلِنَ مَا سُنْ غُجٜىٰنِ؞ 12 مَاسُسُواْ سُكَشٜىٰنِ سُنْ كَڢَ مِنِ تَرْكُواْ، مَاسُسُواْ سُثُوثٜىٰنِ سُنَ شِرِ سُيِ مِنِ ٻَرْنَ؞ دُكَنْ يِنِ سُنَ شِرْيَ مِنِ مُغُنْتَا؞ 13 نِے كَمَرْ كُرْمَ نٜىٰ دَ بَايَجِ، كَمَرْ بٜىٰبٜىٰنْ دَ بَايَ مَغَنَ؞ 14 نِے كَمَرْ مُتُمْ نٜىٰ دَ بَايَجِنْ مَغَنَ، وَنْدَ بَايَ بَادَ أَمْسَ؞ 15 عَمَّا أَغَرٜىٰكَ نَكٜىٰ سَا ذُوثِيَا، يَا يَهْوٜىٰهْ، كَيْنٜىٰ ذَاكَ أَمْسَ مِنِ، يَا عُبَنْغِجِ اللَّهْ نَا؞ 16 غَمَا أَدُّعَتَ عِتَثٜىٰ، «كَدَ كَبَرْسُ سُيِ ڢَضٍ ثِكِ عَكَنْ وَهَلَاتَ، كَدَ كَبَرْسُ سُبُغَ ڧِرْجِ سَبُواْدَ ڢَاطُوَتَ؞» 17 غَمَا إِنَ غَبْ دَ ڢَاطُوَ، كُلُّمْ إِنَ ثِكِنْ عَذَابَ؞ 18 نَڢُرْتَ لَيْڢُواْڢِنَ، ذُنُبَيْنَ سُنْسَا نَدَامُ ڨُورَيْ؞ 19 مَاسُ غَابَادَنِے بَادَلِيلِ، سُنَدَ ڧَرْڢِے، مَاسُ ڧِينَ بَادَلِيلِ، سُنَانَنْ جِنْغِمْ؞ 20 مَاسُ بِيَنْ أَلْحٜىٰرِنَ دَ مُغُنْتَا سُنَ غَابَادَنِے سَبُواْدَ إِنَ ڧُواْڧَرِنْ يِنْ أَلْحٜىٰرِ؞ 21 كَدَ كَيَاشٜىٰنِ، يَا يَهْوٜىٰهْ، يَا اللَّهْ نَا، كَدَ كَيِ نٜىٰسَ دَنِے؞ 22 كَيِ سَوْرِ كَتَيْمَكٜىٰنِ، يَا عُبَنْغِجِ مَيْ ثٜىٰتُواْنَ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria