زَبُورَا 31 - أَتَّوْرَتْ دَ أَنَّبَاوَا

أَدُّعَرْ دُواْغَضَ غَ يَهْوٜىٰهْ

﴿عُمَرْنِ غَ شُوغَبَنْ مَوَاڧَ:‏ زَبُورَا تَ دَاوُدَ؞﴾

¹ يَا يَهْوٜىٰهْ، أَغَرٜىٰكَ نَسَامِ وُرِنْ ٻُيَ، كَدَ كَبَرِ إِنْشَا كُنْيَا؞ دَيَكٜىٰ كَيْ مَيْيِنْ دَيْدَيْنٜىٰ، ثٜىٰثٜىٰنِ!‏

² كَسَ كُنّٜىٰ غَرٜىٰنِ!‏ يِسَوْرِ!‏ كُٻُتَرْ دَنِے!‏ بَرِ كَذَمَ مِنِ دُوڟٜىٰنْ ٻُيَ، كَتَنْ‌غَ مَيْ ڧَرْڢِے دَ ذَاتَ ثٜىٰثٜىٰنِ؞

³ حَڧِيڧَ، كَيْنٜىٰ دُوڟٜىٰنْ ٻُيَنَ، كَيْنٜىٰ كَتَنْ‌غَتَا مَيْ ڧَرْڢِے؞ نُونَ مِنِ، كَبِدَنِ أَ حَنْيَرْكَ دُواْمِنْ أَغِرْمَمَ سُونَنْكَ؞

⁴ ڢِتَرْ دَنِے دَغَ تَرْكُوانْ دَ عَكَيِ مِنِ، غَمَا كَيْنٜىٰ وُرِنْ ٻُيَنَ؞

⁵ عَثِكِنْ حَنُّوَنْكَ نَكٜىٰ دَنْڧَ رَيْنَ، كَيْ كَڢَنْشٜىٰنِ، يَا يَهْوٜىٰهْ اللَّهْ مَيْ أَمِنْثِ؞

⁶ نَاڧِ مَاسُ دُواْغَضَ غَ أَلُّواْلِنْ بَنْظَ، عَمَّا نِے، غَ يَهْوٜىٰهْ نَكٜىٰ دُواْغَضَ؞

⁷ ذَنْيِ مُرْنَ دَ ڢَضٍ ثِكِ سَبُواْدَ ڧَوْنَرْكَ مَرَرْ ثَنْجَاوَا، غَمَا كَاغَ وَهَلَاتَ، كَا سَنْ دَامُوَرْ ذُوثِيَاتَ؞

⁸ بَكَ بَادَنِ ثِكِنْ حَنُّوَنْ أَبُواْكَنْ غَابَنَبَ؞ كَسَانِ عِنْدَ بَابُ حَڟَرِ؞

⁹ يِمِنِ جِنْڧَيْ، يَا يَهْوٜىٰهْ، غَمَا إِنَ ثِكِنْ وَهَلَ؞ عِدَنُونَ سُنْ كُمْبُرَ دَ كُوكَا، رَيْنَ دَ جِكِينَ دُكْ يَغَجِ تِلِسْ؞

¹⁰ نَايِ رَايُوَتَا ثِكِنْ بَڧِنْ ثِكِ، شٜىٰكَرُنَ كُمَ سُنْ رَغُ سَبُواْدَ كُوكَا، ڧَرْڢِينَ يَڧَارٜىٰ سَبُواْدَ نَوْيِنْ لَيْڢِے، حَرْ ڧَسُسُوَنَ سُكَ مُتُ؞

¹¹ نَاذَمَ أَبِنْ بَعَ، أَبِنْ بَعَ أَغَبَنْ دُكَنْ أَبُواْكَنْ غَابَنَ، أَبِنْ رٜىٰنِ غَ مَڨُوبْتَنَ، أَبِنْ ڟُواْرُواْ غَ وَطَنْدَ سُنْ سَنْ نِے؞ عِدَنْ سُنْ هَنْ‌غٜىٰنِ عَكَنْ تِيتِ، سَيْ سُغُدُ؞

¹² أَنْ مَنْتَادَنِے كَمَرْ وَنْدَ يَمُتُ؞ نَذَمَ كَمَرْ تُكُنْيَرْ دَ تَڢَشٜىٰ؞

¹³ نَجِ مَغَنْ‌غَنُنْ بَنْ ڟُواْرُواْ دَيَوَ، بَبَّنْ ڟُواْرُواْ يَكٜىٰوَيٜىٰنِ؞ سُنَ حَطَ بَاكِ غَمٜىٰدَنِ، سُنَيِنْ دَبَرَ دُواْمِنْ سُكَشٜىٰنِ؞

¹⁴ عَمَّا نِے، نَدُواْغَرَ غَرٜىٰكَ، يَا يَهْوٜىٰهْ، نَثٜىٰ ‏«‏كَيْنٜىٰ اللَّهْ نَا؞»‏

¹⁵ ݣُونَكِنْ رَايُوَتَا سُنَ أَ حَنُّوَنْكَ؞ كُٻُتَرْ دَنِے دَغَ حَنُّوَنْ أَبُواْكَنْ غَابَنَ، دَ وَطَنْدَ سُكٜىٰ ڟَنَنْتَ مِنِ؞

¹⁶ دُوبِے بَاوَنْكَ دَ ڢُسْكَرْ أَلْحٜىٰرِ، ثٜىٰثٜىٰنِ سَبُواْدَ ڧَوْنَرْكَ مَرَرْ ثَنْجَاوَا؞

¹⁷ كَدَ كَبَرِ إِنْشَا كُنْيَا، يَا يَهْوٜىٰهْ، غَمَا إِنَ كِرَا غَرٜىٰكَ؞ سَا مُوغَيٜىٰ سُشَا كُنْيَا، سُغَنْ‌غَرَ شِضُ ذُوَا وُرِنْ ذَمَنْ مَتَتُّو؞

¹⁸ رُڢٜىٰ بَكُنَنْ مَاسُ ڧَضْيَا، مَاسُ طَغَ كَيْ، مَاسُ مَغَنَرْ رٜىٰنِ دَ بَعَ عَكَنْ مُتَنٜىٰ مَاسُ أَدَلْثِے؞

¹⁹ إِنَا مِصَالِنْ يَوَنْ أَلْحٜىٰرِنْكَ أَلْحٜىٰرِنْدَ كَشِرْيَ وَ مَاسُ ڟُواْرُوانْكَ، أَلْحٜىٰرِنْدَ كَعَيْكَتَ أَعِدُوانْ یَنْ أَدَمْ، غَ مَاسُ نٜىٰمَنْ وُرِنْ ٻُيَ أَغَرٜىٰكَ!‏

²⁰ كَكَنْ ٻُواْيٜىٰسُ أَوُرِنْ كَسَنْثٜىٰوَرْكَ، دَغَ ڧُلّٜىٰ ڧُلّٜىٰنْ مُتَنٜىٰ؞ كَكَنْ أَجِيٜىٰسُ لَاڢِيَ أَوُرِنْ ذَمَنْكَ، كَدَ سُجِ ذَاغِنْ مُتَنٜىٰ؞

²¹ أَلْبَرْكَ تَا تَبَّتَا غَ يَهْوٜىٰهْ!‏ غَمَا يَنُونَ مِنِ ڧَوْنَرْسَ، ڧَوْنَرْسَ مَرَرْ ثَنْجَاوَا مَيْ بَنْ مَامَاكِ، سَعَدَّ عَكَ كٜىٰوَيٜىٰنِ كَمَرْ بِرْنِ، بِرْنِنْ دَ عَكَ ڢَاطَوَ دَ يَاڧِ؞

²² عَثِكِنْ ڟُواْرُواْنَ نَطَوْكَ ثٜىٰوَ يَكَوَرْ دَنِے دَغَ غَبَنْسَ؞ عَمَّا يَجِ مُرْيَتَ تَنٜىٰمَنْ جِنْڧَيْ، سَعَدَّ نَكِرَا غَرٜىٰشِ نٜىٰمَنْ تَيْمَكُواْ؞

²³ كُڧَوْنَثِ يَهْوٜىٰهْ، دُكَنْكُ مَاسُ ڧَوْنَرْسَ!‏ يَهْوٜىٰهْ يَنَ كِيَايٜىٰ مَاسُ أَمِنْثِ، عَمَّا يَكَنْ سَاكَ وَمَاسُ غِرْمَنْ كَيْ سُواْسَيْ؞

²⁴ كُڧَرْڢَڢَ، كُيِ ڧَرْڢِنْ ذُوثِيَا، دُكَنْكُ مَاسُسَا ذُوثِيَا غَ يَهْوٜىٰهْ؞