زَبُورَا 28 - أَتَّوْرَتْ دَ أَنَّبَاوَا

كُوكَنْ ضُواْڧُواْ دَ وَاڧَرْ غُواْدِيَ

﴿زَبُورَا تَ دَاوُدَ؞﴾

¹ يَا يَهْوٜىٰهْ، أَغَرٜىٰكَ نَكٜىٰ كِرَا!‏ جِ كُوكَنَ، يَا دُوڟٜىٰنْ ٻُيَنَ!‏ عِدَنْ كَا يِشِضُ، ذَنْ ذَمَ كَمَرْ مَاسُ غَنْ‌غَرَ ذُوَا رَامِنْ مَتَتُّو؞

² جِ ضُواْڧُواْنَ سَعَدَّ نَطَغَ مُرْيَ، إِنَ يِنْ كُوكَنْ نٜىٰمَنْ تَيْمَكُواْ أَغَرٜىٰكَ، يَايِنْدَ نَطَغَ حَنُّوَنَ ثِكِنْ أَدُّعَ إِنَ ڢُسْكَنْتَرْ طَاكِنْكَ مَڢِے ڟَرْكِے؞

³ كَدَ كَلِسَّڢْتَ نِے تَرٜىٰدَ مُوغَيٜىٰ، تَرٜىٰدَ وَطَنْدَ سُكٜىٰيِنْ مُغُنْتَا، إِرِنْسُ كَمْ، مَغَنَرْسُ تَظُمُنْثِثٜىٰ، عَمَّا ظُكَاتَنْسُ ثِكٜىٰ سُكٜىٰ دَ ڧِيَيَّ؞

⁴ بَرِ كَسَاكَ مُسُ بِسَغَ أَبِنْدَ سُكَيِ، كُمَ سَبُواْدَ مُغُنْتَارْ دَسُكَ عَيْكَتَ؞ سَاكَ مُسُ بِسَغَ دُكَنْ أَيُّكَنْسُ، كَبَاسُ أَبِنْدَ يَدَاثٜىٰ دَسُو؞

⁵ بَاسَ كُلَ دَ أَبِنْدَ يَهْوٜىٰهْ يَيِ، كُواْ كُمَ أَبِنْدَ يَحَلِتَّ؞ سَبُواْدَ حَكَ ذَيْ رُشٜىٰسُ، بَ كُوَ ذَيْ ڧَارَ غِنَسُبَ؞

⁶ أَلْبَرْكَ تَا تَبَّتَا غَ يَهْوٜىٰهْ، غَمَا يَا جِ كُوكَنَ نَنٜىٰمَنْ تَيْمَكُواْ؞

⁷ يَهْوٜىٰهْ نٜىٰ ڧَرْڢِينَ دَ غَرْكُوَتَ، ذُوثِيَاتَ تَدُواْغَرَ غَرٜىٰشِ؞ يَتَيْمَكٜىٰنِ، ذُوثِيَاتَ تَيِ ڢَضٍ ثِكِ، دَ وَاڧَتَ ذَنْيِ مَسَ غُواْدِيَ؞

⁸ يَهْوٜىٰهْ نٜىٰ ڧَرْڢِنْ مُتَنٜىٰنْسَ، كَتَنْ‌غَرْ ثٜىٰتُواْ نٜىٰ غَ سَرْكِنْدَ يَكٜىٰٻٜىٰ؞

⁹ بَرِ كَثٜىٰثِ مُتَنٜىٰنْكَ كَأَلْبَرْكَثِ جَمَعَرْ غَادُوانْكَ؞ لُورَ دَسُو كَمَرْ مَكِيَايِ، كَضُنْ‌غُمٜىٰسُ حَرْ أَبَدَا؞