زَبُورَا 25 - أَتَّوْرَتْ دَ أَنَّبَاوَاكُوكَنْ نٜىٰمَنْ غَاڢَرَ دَ كِيَايٜىٰوَا ﴿زَبُورَا تَ دَاوُدَ؞﴾ 1 أَغَرٜىٰكَ، يَا يَهْوٜىٰهْ، نَكٜىٰ سَا ذُوثِيَاتَ؞ 2 أَغَرٜىٰكَ، يَا اللَّهْ نَا، نَكٜىٰ دُواْغَضَ؞ كَدَ كَبَرْ نِے إِنْ شَا كُنْيَا، كَدَ كَبَرْ مَاسُ ڧِينَ سُيِ مِنِ دُوبَنْ رٜىٰنِ؞ 3 كَدَ مَاسُ سَا ذُوثِيَا غَرٜىٰكَ سُشَا كُنْيَا؞ عَمَّا مَاسُثِنْ أَمَانَ، بَرِ سُشَا كُنْيَا؞ 4 يَا يَهْوٜىٰهْ، سَا إِنْ سَنْ هَنْيُواْيِنْكَ، كَكُواْيَ مِنِ أَلْعَمُرَنْكَ؞ 5 بِدَنِ ثِكِنْ حَنْيَرْ غَسْكِيَ، كَكُمَ كُواْيَ مِنِ، غَمَا كَيْنٜىٰ اللَّهْ مَيْ ثٜىٰتُواْنَ؞ كُواْيَوْشٜىٰ نَكَنْ سَا ذُوثِيَا غَرٜىٰكَ؞ 6 تُنَ دَ جِنْڧَنْكَ، يَا يَهْوٜىٰهْ، دَ ڧَوْنَرْكَ مَرَرْ ثَنْجَاوَا، وَطَنْدَ كَنُونَ تُنْدَا؞ 7 كَدَ كَتُنَ دَ ذُنُبَنْ غَنْغَنْثِنَ كُواْ ذُنُبَنْدَ نَيِ تُنْ إِنَ مَتَاشِ؞ بِسَغَ ڧَوْنَرْكَ مَرَرْ ثَنْجَاوَا، تُنَ دَنِے، غَمَا كَيْ مَيْ أَلْحٜىٰرِ نٜىٰ، يَا يَهْوٜىٰهْ؞ 8 يَهْوٜىٰهْ مَيْ أَدَلْثِے نٜىٰ، مَيْ أَلْحٜىٰرِ نٜىٰ كُمَ؞ غَمَا يَكَنْ كُواْيَوَ مَاسُ ذُنُوبِ حَنْيَرْسَ؞ 9 يَكَنْبِدَ مَاسُ سَوْڧِنْ كَيْ، يَكَنْبِيدَسُو أَ حَنْيَرْ دَتَكٜىٰ دَيْدَيْ، يَكُمَ كُواْيَ مُسُ حَنْيَرْسَ؞ 10 دُكَنْ هَنْيُواْيِنْ يَهْوٜىٰهْ ڧَوْنَ مَرَرْ ثَنْجَاوَا نٜىٰ دَ أَمِنْثِ، غَ مَاسُ كِيَايٜىٰ يَرْجٜىٰجٜىٰنِيَرْسَ غَ مَاسُبِنْ ڧَٰعِدُواْدِنْسَ؞ 11 دُواْمِنْ أَغِرْمَمَ سُونَنْكَ، يَا يَهْوٜىٰهْ، إِنَ ضُواْڧُوانْكَ كَغَاڢَرْتَا مِنِ لَيْڢُواْڢِنَ غَمَا سُنْيِيَوَ؞ 12 يَيَ ذَيْ كَسَنْثٜىٰ دَ مَيْ ڟُواْرُوانْ يَهْوٜىٰهْ؟ يَهْوٜىٰهْ ذَيْ كُواْيَ مَسَ حَنْيَرْ دَ ذَيْبِے؞ 13 كُلُّمْ ذَيْ كَسَنْثٜىٰ دَ رَنْسَ عَݣُونْثٜىٰ، یَیَنْسَ كُمَ ذَاسُ غَاجِ ڧَسَرْ؞ 14 يَهْوٜىٰهْ أَبُواْكِنْ مَاسُ ڟُواْرُوانْسَ نٜىٰ، يَكَنْسَا سُسَنْ يَرْجٜىٰجٜىٰنِيَرْسَ؞ 15 كُلُّمْ إِنَ ظُبَ عِدُواْ غَ يَهْوٜىٰهْ، غَمَا يَكَنْ ڢِدَّ ڧَڢَاڢُنَ دَغَ تَرْكُواْ؞ 16 جُويُواْ وُرِينَ، كَيِ مِنِ أَلْحٜىٰرِ، غَمَا بَ نِے دَ وَنِ، كُمَ بَ نِے دَ ڧَرْڢِے؞ 17 دَامُوَرْ ذُوثِيَاتَ تَڧَارُ، ڢِتَرْ دَنِے دَغَ دُكَنْ وَهَلُواْلِنَ؞ 18 دُوبِے وَهَلَاتَ دَ عَذَابَتَ، كَغَاڢَرْتَ دُكَنْ ذُنُبَيْنَ؞ 19 دُوبِے يَوَنْ أَبُواْكَنْ غَابَنَ! دُوبَ يَدَّ سُكٜىٰ ڧِينَ دَ ڧِيَيَّ مَيْ ذَاڢِ! 20 كِيَايٜىٰ رَيْنَ! كُٻُتَرْ دَنِے! كَدَ كَبَرْنِ إِنْشَا كُنْيَا! غَمَا كَيْنٜىٰ وُرِنْ ٻُيَنَ! 21 بَرِ مُتُنْثِ دَ غَسْكِيَ سُكِيَايٜىٰنِ، غَمَا أَغَرٜىٰكَ نَكٜىٰسَا ذُوثِيَا؞ 22 يَا اللَّهْ، ڢَنْشِ مُتَنٜىٰنْ إِسْرَٰٓءِيلَ، دَغَ دُكَنْ وَهَلُواْلِنْسُ! |
Hausa Common Language Ajami Bible © The Bible Society of Nigeria, 2020
Bible Society of Nigeria