زَبُورَا 17 - أَتَّوْرَتْ دَ أَنَّبَاوَا

كُوكَنْ مُتُمْ مَرَرْ لَيْڢِ

﴿أَدُّعَ تَ دَاوُدَ؞﴾

¹ يَا يَهْوٜىٰهْ، جِ ضُواْڧُواْنَ نَنٜىٰمَنْ غَسْكِيَ، جِ كُوكَنَ نَنٜىٰمَنْ تَيْمَكُواْ، كَكَسَ كُنّٜىٰ غَ أَدُّعَتَ، غَمَا بَابُ ڧَضْيَا عَبَاكِنَ؞

² بَرِ كَيِ شَرِيعَ، شَرِيعَرْ دَ ذَاتَ نُونَ نِے مَرَرْ لَيْڢِينٜىٰ، بَرِ عِدَنُونْكَ سُدُوبِے أَبِنْدَ يَكٜىٰ دَيْدَيْ؞

³ عِدَنْ كَبِنْثِكَ ذُوثِيَاتَ، عِدَنْ كَظِيَرْثٜىٰنِ دَ دَرٜىٰ، عِدَنْ كَڠُودَانِ سَرَيْ، بَذَاكَسَامِ مُوغُنْ نُڢِ عَثِكِنَبَ؞ نَيِ نِيَّ بَذَنْيِ مَغَنَ بَاكِ بِيُبَ،

⁴ كَمَرْ يَدَّ سَوْرَنْ مُتَنٜىٰ سُكٜىٰيِ؞ نَيِ بِيَيَّ دَ مَغَنَرْ بَاكِنْكَ، بَنْبِے حَنْيَرْ مَاسُ تَادَ حَنْكَلِبَ؞

⁵ ڧَڢَاڢُنَ سُنْ مَنّٜىٰ أَ حَنْيَرْكَ، بَسُ تَٻَ كَوْثٜىٰوَبَ؞

⁶ نَيِ كِرَا غَرٜىٰكَ، غَمَا كَيْنٜىٰ ذَاكَ أَمْسَ مِنِ، يَا اللَّهْ؞ بَرِ كَسَوْرَرَتَ، كَكَسَ كُنّٜىٰ غَ مَغَنَاتَ؞

⁷ نُونَ بَنْ مَامَاكِنْ ڧَوْنَرْكَ، ڧَوْنَرْكَ مَرَرْ ثَنْجَاوَا، كَيْ مَيْ ثٜىٰتُوانْ مَاسُ نٜىٰمَنْ وُرِنْ ٻُيَ، مَاسُ نٜىٰمَنْ وُرِنْ ٻُيَ أَ حَنُّنْ دَامَنْكَ دَغَ أَبُواْكَنْ غَابَنْسُ؞

⁸ بَرِ كَكِيَايٜىٰنِ كَمَرْ ڨُويَرْ عِدُواْ، كَٻُواْيٜىٰنِ عَڧَرْڧَشِنْ ڢِكَڢِكَنْكَ،

⁹ دَغَ مُوغَيٜىٰ مَاسُ كَٰوُاْ مِنِ هَرِ، دَغَ مَاسُ ڧِينَ وَطَنْدَ سُكَ كٜىٰوَيٜىٰنِ؞

¹⁰ أَ ذُوثِيَارْسُ، بَا تَوْسَيِ، عَبَاكِنْسُ، مَغَنْ‌غَنُنْ غِرْمَنْ كَيْنٜىٰ؞

¹¹ سُنْبِينِ، يَنْذُ سُنْ كٜىٰوَيٜىٰنِ، سُنَ جِرَا سُجٜىٰڢَنِ عَڧَسَا؞

¹² كَمَرْ ذَاكُواْكِ سُنَ نٜىٰمَ سُيَيَّاغٜىٰنِ، كَمَرْ ذَاكُواْكِ مَاسُ ڧَرْڢِے سُنَيِنْ ݣُونْتُوانْ ٻَوْنَ؞

¹³ تَاشِ، يَا يَهْوٜىٰهْ!‏ ڢُسْكَنْثِ أَبُواْكَنْ غَابَنَ دَ يَاڧِ، كَيِنَصَرَا عَكَنْسُ؞ دَغَ مُوغَيٜىٰ، ثٜىٰثٜىٰنِ دَ تَكُواْبِنْكَ؞

¹⁴ يَا يَهْوٜىٰهْ، دَغَ یَنْ أَدَمْ، ثٜىٰثٜىٰنِ، دَغَ مُتَنٜىٰنْ دَ دُونِيَرْ نَنْ نٜىٰ أَبِنْدَ سُكٜىٰ دَشِ؞ حُكُنْتَسُ دَ ثِكَكّٜىٰنْ أَبِنْدَ كَشِرْيَ مُسُ؞ بَرِ یَیَنْسُ سُغَاجِ إِسَشّٜىٰنْ شِرِنْ، حَرْ مَا يَكَيْ كَنْ جِيكُواْكِنْسُ؞

¹⁵ نِے كُوَ، ذَنْ‌غَ ڢُسْكَرْكَ، غَمَا نِے مَرَرْ لَيْڢِينٜىٰ؞ سَعَدَّ نَڢَرْكَ كَسَنْثٜىٰوَ أَغَبَنْكَ ذَاتَسَا إِنْڧُواْشِ؞