زَبُورَا 16 - أَتَّوْرَتْ دَ أَنَّبَاوَا

وَاڧَرْ دُواْغَضَ غَ يَهْوٜىٰهْ

﴿زَبُورَا تَ دَاوُدَ؞ إِرِے تَ ‏«‏مِكْتَمْ؞»‏﴾

¹ كَكِيَايٜىٰنِ، يَا اللَّهْ، غَمَا كَيْنٜىٰ وُرِنْ ٻُيَنَ؞

² نَاثٜىٰ وَ يَهْوٜىٰهْ، ‏«‏كَيْ نٜىٰ عُبَنْ‌غِجِنَ، بَ نِے دَ وَنِ أَبُ مَيْ دَرَجَ سَيْ كَيْ؞»‏

³ غَمٜىٰ دَ ڟَرْكَكَا عَڧَسَرْ، سُونٜىٰ سُكٜىٰ دَ غِرْمَ!‏ سُونٜىٰ سُكٜىٰ ڢَرَنْتَ مِنِ رَيْ؞

⁴ وَطَنْدَ سُكَ ذَاٻَا سُبِے وَنِ اللَّهْ ذَاسُ ڧَارَ وَكَنْسُ وَهَلَ سُواْسَيْ؞ بَذَنْ حَطَكَيْ دَسُو ثِكِنْ مِيڧَ هَدَايَرْسُبَ، بَذَنْ عَمْبَثِ سُونَيٜىٰنْ أَلُّواْلِنْسُبَ؞

⁵ يَا يَهْوٜىٰهْ، كَيْ نٜىٰ أَبِنْدَ نَكٜىٰ دَشِ، كَيْنٜىٰ ݣُوڢْ نَبِيَنْ بُڧَاتَتَ؞ رَيْنَ يَنَ أَ حَنُّنْكَ؞

⁶ رَبُوانْ دَ عَكَ بَانِ يَنَدَ بَنْ شَعَوَ ڨُورَيْ؞ بَاشَكَّ إِنَدَ غَادُواْ مَيْݣَوْ؞

⁷ نَيَبِے يَهْوٜىٰهْ وَنْدَ يَكٜىٰبِے دَنِے، كُواْ دَ دَرٜىٰ ذُوثِيَاتَ تَنَيِ مِنِ غَرْغَطِے؞

⁸ يَا يَهْوٜىٰهْ، كُلُّمْ إِنَ سَنٜىٰ دَ كَسَنْثٜىٰوَرْكَ، سَبُواْدَ كَنَ أَ حَنُّنْ دَامَنَ، بَذَنْ جِجِّغُبَ؞

⁹ سَبُواْدَ حَكَ ذُوثِيَاتَ تَنَ مُرْنَ، رَيْنَ كُمَ يَنَ ڢَضٍ ثِكِ، جِكِينَ ذَيْ كَسَنْثٜىٰ بَا دَامُوَ؞

¹⁰ غَمَا بَذَاكَ بَرْ رَيْنَ أَوُرِنْ ذَمَنْ مَتَتُّو بَ، كُواْ كَبَرْ مَيْ ڧَوْنَرْكَ يَضُٻَبَ؞

¹¹ كَنَ نُونَ مِنِ حَنْيَ، حَنْيَرْ دَ ذَاتَ كَيْ غَ رَيْ، كَسَنْثٜىٰوَرْكَ تَرٜىٰدَنِ، ثِكَكّٜىٰنْ ڢَضٍ ثِكِنٜىٰ، ذَمَ أَ حَنُّنْ دَامَنْكَ، جِنْ دَاطِے نٜىٰ حَرْ أَبَدَا؞