زَبُورَا 15 - أَتَّوْرَتْ دَ أَنَّبَاوَا

وَنْدَ يَهْوٜىٰهْ يَيَرْدَ يَذُواْ غَبَنْسَ

﴿زَبُورَا تَ دَاوُدَ؞﴾

¹ يَهْوٜىٰهْ، وَ يَ إِسَ يَذَوْنَ عَتٜىٰنْتِنْكَ؟ وَ يَ إِسَ يَيِ سُجَّدَ أَ سِهِيُواْنَ، تُدُنْكَ مَيْ ڟَرْكِے؟

² سَيْ وَنْدَ يَكٜىٰ تَڢِيَ ثِكِنْ غَسْكِيَ، وَنْدَ يَكٜىٰ عَيْكَتَ أَبِنْدَ يَكٜىٰ دَيْدَيْ، وَنْدَ كُمَ يَكٜىٰ ڢَطِنْ غَسْكِيَ دَغَ ذُوثِيَارْسَ،

³ وَنْدَ بَايَ ٻَاتَ سُونَنْ وَنِ، وَنْدَ بَايَيِ وَ أَبُواْكَنْسَ مُغُنْتَا، كُواْ يَبَظَ جِيتَ جِيتَ غَمٜىٰدَ مَڨُوبْتَنْسَ،

⁴ وَنْدَ بَايَ دَرَجَرْتَ وَنْدَ يَهْوٜىٰهْ يَڧِ، عَمَّا يَكَنْ غِرْمَمَ مَاسُ ڟُواْرُوانْ يَهْوٜىٰهْ، يَكَنْ ثِكَ أَلْڧَوَرِنْسَ كُواْ دَمَا ذَيْ ظَڢٜىٰشِ،

⁵ وَنْدَ بَايَ بَادَ بَاشِ دُوانْ رِيبَ، بَايَ كَرْٻَرْ ثِنْ حَنْثِ دُواْمِنْ يَبَادَ شَيْدَرْ ڧَضْيَا عَكَنْ مَرَرْ لَيْڢِے؞ مَيْ يِنْ وَطَنَّنْ بَايَ تَٻَ جِجِّغُوَ، سَمْ!‏