زَبُورَا 148 - أَتَّوْرَتْ دَ أَنَّبَاوَا

وَاڧَرْ يَبُواْ نَ دُكَنْ حَلِتَّ

¹ يَبِے يَهْوٜىٰهْ!‏ يَبِے يَهْوٜىٰهْ دَغَ سَمَّيْ، يَبٜىٰشِ أَ سَمَنْ سَمَّيْ!‏

² يَبٜىٰ شِ، يَا كُو مَلاَىِٕكُ دُكَ، يَبٜىٰشِ، يَا كُو حَلِتُّنْ سَمَ دُكَ!‏

³ يَبٜىٰ شِ، يَا كُو رَانَ دَ وَتَ، يَبٜىٰشِ، يَا كُو تَوْرَرِ مَاسُ حَصْكٜىٰ دُكَ!‏

⁴ يَبٜىٰ شِ، يَا كُو سَمَنْ سَمَّيْ، يَبٜىٰشِ، يَا كُو ضُوَيٜىٰنْ سَمَنْ سَمَّيْ!‏

⁵ بَرِ سُيَبِے سُونَنْ يَهْوٜىٰهْ، غَمَا شِينٜىٰ يَبَادَ عُمَرْنِ، سَيْ سُكَ كَسَنْثٜىٰ؞

⁶ يَسَسُ أَوُرَارٜىٰنْسُ حَرْ أَبَدَا أَبَدِنْ، يَكَڢَ مُسُ إِيَاكَرْسُ بِسَغَ دُواْكَرْسَ، وَدَّ بَذَاسُ ڧٜىٰتَرٜىٰبَ؞

⁷ يَبِے يَهْوٜىٰهْ دَغَ دُونِيَا، مَنْيَنْ دَبُّواْبِنْ ضُوَ دَ دُكَنْ ظُرْڢَڢَّنْ تٜىٰكُ،

⁸ وَلْڧِيَ دَ مَنْيَنْ ڧَنْڧَرَ، ضُوً سَمَ دَ دُوسَرْ ڧَنْڧَرَ، هَدَرِ مَيْ إِسْكَ مَيْ ثِكَ عُمَرْنِنْسَ،

⁹ مَنْيَنْ تُدَّيْ دَ دُكَنْ دُوَڟُو، عِتَتُوَ مَاسُ بَادَ یَیَ دَ دُكَنْ عِتَتُوَنْ سٜىٰدَ،

¹⁰ دَبُّواْبِنْ دَاجِ دَ دُكَنْ دَبُّواْبِنْ غِدَا، مَاسُ جَا دَ ثِكِ دَ ڟُنْڟَيٜىٰ مَاسُ ڢِكَڢِكَيْ،

¹¹ سَرَاكُنَنْ دُونِيَا دَ دُكَنْ ڧَبِيلُ، شُوغَبَنِّ دَ دُكَنْ مَاسُ شَرِيعَ عَدُونِيَا،

¹² سَمَارِ دَ كُمَ یَنْ مَاتَا، ڟُواْڢَڢِّ تَرٜىٰدَ یَنْ يَارَا!‏

¹³ بَرِ دُكَنْسُ سُيَبِے سُونَنْ يَهْوٜىٰهْ، غَمَا سُونَنْسَ نٜىٰ كَطَيْ مَڢِے غِرْمَ، دَرَجَرْسَ تَرُڢٜىٰ دُونِيَا دَ سَمَّيْ؞

¹⁴ يَتَادَ سَرْكِے مَيْ ڧَرْڢِے دُواْمِنْ مُتَنٜىٰنْسَ، دُواْمِنْ دُكَنْ مَاسُ ڧَوْنَرْسَ سُيَبٜىٰشِ، جَمَعَرْ إِسْرَٰٓءِيلَ مَاسُ كُسَدَشِ؞ يَبِے يَهْوٜىٰهْ!‏